Pahadar 100 thun harei manek ong Võ Văn Kiệt (23/11/1922 – 23/11/2022), dah page ini, di TP.HCM hu peih Ginum biai ilamo pakat negar “Ong Võ Văn Kiệt –  urang par akaok naih gheih di Đảng saong cách mạng Việt Nam”. Brei panuac di mbang ginum biai, Phó Thủ tướng Thường trực Phạm Bình Minh brei thau, ini lac bruk hu makna praong, hadar veik raidiuk, bruk ngak hadah hadai di ong Võ Văn Kiệt, pataom veik dom kadha hu yaom glaong gah lý luận saong thực tiễn, rik daong jhul khang, praong dalam, abih gah bruk salih bahrau. Dahlau di nan, kapul urang lambaok ka Trung ương, TP.HCM saong tỉnh Vĩnh Long hu nao cuh gilau, pok bingu di kubo  aruah Thủ tướng Võ Văn Kiệt di Sang kubo TP.HCM.

Di tuk pahadar 100 thun harei ndih tapui Thủ tướng Võ Văn Kiệt, mesup 22/11, di Cần Thơ, Miuyim Quân khu 9 peih parang iek ngan saong kadha “Thủ tướng Võ Văn Kiệt, Bí thư Khu ủy gam lac Chính ủy Quân khu 9 dahlau daih saong dom ayut sahabat hu rilo prein yava padang tapon nyaom bol pan phao kraong Quân khu 9”. Peih tabiak tal abih harei 30/12, parang iek hu parang tabiak 300 thaot binguk, harak gar, pandap panda yaih khan ka raidiuk, bruk ngak cách mạng di Thủ tướng Võ Văn Kiệt, jeng yau dom ong tướng hu buh rilo prein yava dalam bruk padang tapon nyaom bol pan phao kraong.

Parang iek "Adit ilamo Du lịch inem krung hijao – Labik taom gaok di anek manuac saong langik tasik" bahrau hu peih tabiak di Hà Nội, kayua Pasak parang iek Ilamo Nghệ thuật Việt Nam pambuak haong Sở Ilamo TTDL dom tinh, ban lac: Hà Giang, Điện Biên, Hải Phòng, Ninh Bình, Thanh Hóa, Quảng Nam peih tabiak di tuk Harei inem krung ilamo Việt Nam. 120 blah thaot binguk hu yaih khan dom siam gheih di langik tasik, yaih khan dom prein khang, yaom glaong, prein dui  pachreih di du lịch hijao, du lịch sinh thái di Việt Nam. Di pak ini daok hu danak dak taom gaok, pok mayaom inem krung ilamo oh maong mboh di Việt Nam, dom janih ilamo, rija roya praong di bhum palei dom bangsa.

Bruk brei thau saong pok angan kaya pandap ngak kong palei pala gheih mekre pakat tỉnh jeng yau bhum gah Meraong thun 2022 bahrau peih tabiak di Bình Thuận. Abih tih hu 45 kaya pandap tut angan tame pilih ruah, rilo meng lac dom pandap dalam kapul : Thủ công mỹ nghệ; Chế biến kaya nong – kaya glai – kaya ikan saong pandap menyum; Jamriak – mac moc – saong pandap gam tui… UBND tỉnh Bình Thuận hu tabiak harak brei angan 30 pandap ngak kong palei pala hadah krah thun 2022.

Tamat binah tangi sua ka bruk blah mek di karja labaih 3,8 triệu USD jien blei pandap, jru tavao pacang caga jit cúm A (H5N1), rahtabiak di Công ty cổ phần jru tavao Cửu Long (Công ty Cửu Long) saong Mintri Y tế, dah page ini, phiên tòa salih tapa bruk tranh tụng. Urang lambaok ka viện kiểm sát hu brei thau harak luận tội saong ba tabiak múc án ka 8 bị cáo. Bị cáo Cao Minh Quang (Thu truong Mintri Y tế dahlau deih) njauk kaoh meng 30 tal 36 bilan tù treo ka duas "oh ngak njauk bruk ngak di drei ba tal khat lahik biak trak damak"

Tập đoàn Sinopec di Trung Quốc saong Cty Năng lượng Ca-ta (Qatar) bahrau mbaoh tangin tame harak sanya pablei salih khí tự nhiên hóa lỏng (LNG) dalam 27 thun. Ini hu maong lac bruk pablei salih atah abih dalam sajarah. Tui nan, yaok thun Qatar Energy pabak 4 triệu tấn khí đốt brei ka Sinopec. Sanya ini lac sa binah praong dalam bruk pambuak gauk di dua gah pambuak tal danak dak peih praong công suất di mỏ khí đốt gah brak Qatar, kayua yau nan ye nyu hu makna biak praong. Thun bloh, Trung Quốc blei tame 81,4 triệu tấn LNG, jeng taneh ia blei LNG tame praong abih di dunya.

Bruk mesuh gauk di Xéc-bi-a saong Kô-sô-vô mbuan tamuh tabiak veik hadei di tuk dua gah oh njauk gauk dalam bruk pabak biển số radaih. Kuhria meng di tuk Kô-sô-vô  tabiak panuac lac độc lập tabiak truh Xéc-bi-a meng di thun 2008, labaih 50 ribau urang Xéc-bi-a daok di gah barak Kô-sô-vô jeng daok pandar biển số saong harak gar di karja Xéc-bia . Bruk catang tagok nyu khang jang dalam dom bilan jaik di ini, hadei di tuk Kô-sô-vô tabiak hukum ieu rahra Xéc-bi-a takik manuac di Kô-sô-vô salih biển số radaih klak meng biển số bahrau kayua bhum taneh ini pabak brei.  

Hu 162 urang metai saong 326 urang njauk rambus hadei di mbang megei baoh taneh khang 5,6 độ Richter rah tabiak tuk jala pandiak harei 21/11 di Indonesia, dom menuac metai rilo meng lac uranaih. Hu 13.782 menuac njauk panduan nao daok di labik karei, hu takik di abih lac 2.345 baoh sang khut, jaleih. Indonesia bhian hu dom mbang megei baoh taneh saong ceik pui pruh tabiak kayua daok di mangaok “Vành đai lửa” Thái Bình Dương, labik hu bruk địa chấn khang abih di baoh taneh./.