Cục Y tế dự phòng kakei lac, bhap bini njauk brei bhian duah thau khaw tin ka jit ruak, brei ba uranaih nao klauk jru vaccine ginup, njauk tukvak tui tacei ba di gah y te. Klauk jru vaccine lac jalan lagaih piah pacang ruak. Meda pacang hu jit ruak sởi njom mbak tuk pacang hu labaih 95% dalam bhap bini.

Meng phun jien di Danak dak bruk ngak negar cak rok patagok KT-XH bhum bangsa takik saong bhum ceik tukvak 2021-2030, tỉnh Cà Mau hu daong buh jien tame padang ngak bahrau 90 danak dak jalan mbak puk palei natah abih tih labaih 58km; 5 jabat ilamo puk, 1 danak dak paga pacang Salatel saong 1 danak dak tathuak ia; khik ramik pasiam veik 52 danak dak. Urak ini, daok ngak harak gar, piah buh jien tame padang ngak bahrau 16 danak dak saong daong ngak pasiam veik, ngak pasiam 24 danak dak hạ tầng di xa, palei, abih di nyu nan lac labik kan kandah, bhum mikva bangsa takik. Thun blaoh, tỉnh Cà Mau trun hu 329 sang kan kathaot.

Tui Sở Pato megru tỉnh Bạc Liêu, dalam thun bac birau 2024 -2025 ini kan kandah, tavak tavaiy abih di tỉnh nan lac bruk kurang gru pato, min bruk palih ruah oh peih ngak tui jalan ba tabiak kayua cang UB bhap bini tỉnh ba tabiak. Kuhria tal puac bilan 5/2024, tỉnh hu 283 labik pato megru; labaih 162.000 anek saih, urang bac megru; hu 7.680 urang gru tapa palih ruah. Piah hu ginup gru pato, dom labik pato dalam tỉnh Bạc Liêu brei parabha bruk ka gru pato rilo mon jang atau da-a gru gah langiu tame pato.

Kapul Chữ Thập đỏ tỉnh Bình Phước bahrau tabiak mbaok Gilang pandap mbang Bình Phước saong peih ngak danak dak daong urang gaok kan kandah di dalam tinh gam haong bhum jaik taphia. Gilang pandap mbang meda pataom mek saong parabha pandap mbang ka dom urang gaok kan kandah, trun manieng bruk palai pajoa pandap mbang saong ngak pasiam veik chat luong raidiuk di rahra. Gam haong nan, daong ngak tabiak sa bruk daong khang kadang haong bruk pambuak gauk di dom kapul, nyaom, doanh nghiệp saong rahra. Gilang pandap mbang Bình Phước lac nyaom ka 18 dalam dom Gilang pandap mbang pak Việt Nam.

Dalam dua harei ini saong harei paguh, bhum tasik meng Ninh Thuận tal Cà Mau saong gah Timur  bhum Nam Biển Đông hu hangin khang pakat 6, pakat 7 tal pakat 8. Piah caga bala, Mentri Ngak nong saong patagok palei pala ieu dom tỉnh, ban tapen tasik khan brei urang peih gilai, po dom kapal gilai daok peih angaok tasik thau piak plaik njiak saong hu jalan ngak mbang pala drak ka lagaih, khik brei salamat ka urang saong drap ar; bhian pambuak phone nao mai piah langyah sumu tuk hu dom bruk kan kandah rah tabiak. Brei ginup mauac urang, kapal gilai piah peih bruk daong urang gaok bala tuk gaok kan kandah. 

Meng bilan 4/2025, Nhật Bản meda daong ka dom urang kumei ka oh tok pasang daok di ban ine Tokyo nao tal dom bhum palei piah ngak krein haong ayut saabat saong tok pasang. Sarak nan hu ba tabiak dalam tuk dom urang kumei dara di palei pala daok dak harei dak trun, cagar veik haong Tokyo. Rajaei meda pabak tal 1 triệu Yen (labaih 7.000 USD) ka dom urang mai tal meng 23 quận di Tokyo. Langiu di nan, rajaei meda biyar jien sahui ka urang kumei hu mbaok tame dom mbang mayaih khan saong meda biyar veik jien mayah dom urang ini caong nao tal dom labik nan piah daok saong hu hatai caong tok pasang, padang mbang ngui.

Hàn Quốc daok jhul pakhang dom kham merat pacang caga ruak la-ar dom tuk urang ruak la-ar dom tagok labaih 700 urang. Sa dalam dom bruk praong di chien dich lac pametai jamoh di dom labik atah bayah, oh hu menuac daok. Urak ini, dom jabat y tế Hàn Quốc hu pagam 76 jamraih tui iek jamoh di negar, dalam nan hu dom labik ralo urang ruak jiak bhum kalin kan di Triều Tiên. Dom urang ilamo mboh lac, BĐKH ba tal ban bilan xuan pandiak jang, meda hu rilo ruak njom mbak kayua jamoh.

Meng akaok thun tal urak ini hu jaik 20.000 urang di cu nao tapa tasik piah tal Anh, oh huac metai lahik tuk pandar gilai sit pajeng biak rilo manuac. Bahrau ini, gah  Biên phòng Anh hu pacang cakak 8 sruh gilai pajeng 526 urang di cu di eo tasik Manche, yaok sruh pajeng tal jaik 66 urang. Bruk njauk caik hatai nan lac, dom manuac di yaok gilai rilo jang 3 mbang dut saong thun 2021. Bruk ini ba tal takik di nyu 25 urang metai meng di akaok thun, jaik abih kayua mblung ia saong kan suak yava./.