Hoi dong bhap bini TPHCM birau brei tapa du thao sarak ka jien bac ngan haong  pakat mam non, pakat pho thong di karja meng thun 2024 - 2025 saong dom thun anak tal di ban raya. Dut saong  thun dahlau, jien bac birau ini trun labaih 100.000 - 240.000 đồng sa anek saih sa bilan kuhria tui pakat bac saong sumu yaom di thun bac 2021-2022. Jien bac hu parabha jeng dua nyaom. Nyaom 1 lac anek saih di dom sang bac di Ban Thu Duc saong dom quận. Nyaom ka 2 lac anek saih di dom sang bac di dom huyện. Uranaih mam non 5 thun hu mien jien bac meng thun 2024 -2025. Anek saih  THCS hu mien jien bac meng thun 2025-2026.

Di tuk pahadar 77 thun Harei TBLS (27-7-1947 - 27-7-2024), tỉnh Bến Tre hu peih ngak rilo bruk thau dhar thau phor. Dalam nan, pok meyaom dom menuac urang, dom kapul nyaom ngak siam bruk TBLS saong urang buh prein ka taneh ia, dom thương binh, bệnh binh, sang liệt sĩ ngak KT naih joi, ngak bruk puk palei siam. Peih bruk padang ngak 250 baoh sang anit ranam daong ka urang buh prein ka  cách mạng oh ka hu sang daok siam mekre, samar ba pandap alin hadiah di Akaok negar, di karja palei tal urang ngak bruk cách mạng.

Meng akok thun tal ini, dalam negar hu labaih 660 sruh jit ruak aih caraoh pabui chau Phi di 44 tỉnh, ban brei am cuh klak labaih 42.400 drei, ngak khat lahik ka urang raong. Anak bruk jit ruak aih caraoh pabui chau Phi rah tabiak sraw kadau, Mentri Ngak nong saong patagok palei pala hu padang 35 kapol ngak bruk mai pasang iek. Gam haong nan iew dom bhum palei  pataom tame  dom preih khang  piah peih bruk ngak brei catang, sumu  dom jalan pacang caga jit ruak; langyah brei sumu, abih dom sruh jit ruak, oh luai jit ruak njom mbak praong.

Kraong 28 lac sa dalam dom jalan kraong nao mai praong di huyện Cái Bè, tỉnh Tiền Giang. Dua gah takai kraong hu rilo sang bhap bini daok meng lavik rai saong hu dom sang mac chai padai. Kayua rilo makna ngak brei dua gah takai kraong ini njauk glut jaleih khang. Thun ini, Rajaei hu daong ka tỉnh Tiền Giang 200 tỷ đồng saong binah daok veik lac  49 tỷ đồng meng kadung jien karja tỉnh piah ngak pasiam veik dom labik glut jaleih khang di jalan kraong ini.

Urang raong ikan caklaik kadoc di tỉnh Trà Vinh daok tame tuk kuac mek tagok pablei mbang akaok meti dalam thun. Ikan kadoc mek hu rilo dut saong tukvak ini thun dahlau, yau nan min yaom trun biar 36.000 – 38.000 đồng sa kilo. Tui So Ngak nong saong patagok palei pala tỉnh Trà Vinh, meng akok bilan mbiah tal ini, urang raong palao ikan trun labaih 207 ha danao ikan caklaik, mek hu labaih 30.774 tấn, meblah hu jaik 70% ikan raong dalam thun 2030. Anak yaom pablei ikan caklaik oh hu tani tanat, gah ngak nong tỉnh kakei urang raong ikan brei salih, raong atah bilan, piah plaik njiak bruk raong ralo tapa prein blei di darak pasar, yaom ikan trun ba tal khat lahik.

Kuhria tal mon 3 harei 18/7 (tui mon pak nan), bruk khuah pasak pablei salih Cửu Đỉnh daok di ban Tự Cống dalam tỉnh Tứ Xuyên, Tây Nam Trung Quốc ngak brei 16 urang matai. Hu thau, hu labaih 30 urang njauk rambus daok hu cấp cứu di sang iek ruak. Duah thau tuk camereip mboh lac khuah kayua bruk padang ngak ba tal.  Bruk khuah ini rah tabiak dom harei hadei di bruk khuah di kreh melam 19/1 di sang bac dalam tỉnh Hà Nam, ngak brei 13 anek saih matai tuk daok ndih dalam ký túc xá. Bilan 2, sa bruk khuah karei di sa sang chung cư di ban Nam Kinh, tỉnh Giang Tô, ngak brei takik di nyu 15 urang matai.

Bruk cakrok patagok ban ine Nusantara di Đông Kalimantan lac sa danak dak atah tukvak bo Indonesia meda lahik 15 tal 20 thun piah ngak salah. Ini lac panuac di urang tacei pato dac biet di Tổng thống Indonesia ndem dalam tuk hu rilo panuac haduh hatai ka tukvak padang ngak ban ine birau. Dahlau di nan, Tổng thống Joko Widodo jeng hu khan lac bruk padang ngak ban ine birau hu  meng 15% di harei 17/8 anak tal. Danak dak jeng daok caong hu dom urang dalam jeng yau langiu  negar brei bruh jien tame saong Indonesia daok jhul patagok bruk nan.

Meng harei 1/4/2025, Bỉ pakauk oh brei pablei taong abih dom janih pakao, hu pakao kaok, pakao xì gà, pakao điện tử saong dom janih pandap dreih yau đầu lọc saong ba-ar ngak pakao hala di siêu thị, cửa hàng báo chí, bilai pablei xăng saong labik pablei pandap oh kak je. Dom menuac ngak suan njauk mek caik guk tal 1 thun saong njauk phạt meng 2.000 Euro tal 800.000 Euro./.