HĐND TP.HCM hu ba tabiak Sarak ka bruk brei pabak tame 2.900 tỷ đồng jien di kadung jien kanja di ban raya piah daong ka bruk padang ngak danak dak hạ tầng kỹ thuật danak dak PPP piah paglaong yaom jien rik tame phun jien  Kanja dalam danak dak, patagok bruk meda ngak hu piah dui pachreih dom po buh jien tame. UBND TP.HCM taduan bruk ngak di drei anak Thủ tướng Rajaei, gam tui di nan jeng samar drah ngak salah dom harak gar pataom mek, langyah ngak pasiam pathau khan roh duah dom bruk dahlau di tuk peih ngak danak dak piah payua tagok Thủ tướng Rajaei brei ngak.

Biar harei 12/7, UBMT negar Việt Nam TP. Cần Thơ peih nyaom biai pataom iek veik 20 thun peih ngak “harei jum pataom abih bangsa”, vaktu 2003 - 2023. Dalam 20 thun tapa, MT negar dom pakat di Cần Thơ hu ieu pataom saong kaoh tabiak meng kadung jien “Kayua urang kathaot” alin hadiah jaik 965 rabau pok pandap ka sang kathaot, sang tabiak truh kathaot, sang sarak karja, sang kan kandah, haong yaom pandap abih tih labaih 337 tỷ đồng; di tuk uan harei pataom, dom puk palei hu padang ngak, alin hadiah 1.128 baoh sang jum pataom, yaom labaih 50 tỷ đồng; pasiam veik 609 baoh sang, haong yaom jien ngak abih labaih 12 tỷ đồng.

Tỉnh Bình Phước hu 5.300 ha durain, dalam nan hu labaih 2.400 ha hu brei paik baoh. Tui kuhria, thun ini tỉnh meda mek hu labaih 23.000 tấn durain (tagok labaih 108% dut saong thun 2022). Urak ini, durain di Bình Phước hu Trung Quốc pabak 17 ma bhum pala di mblang taneh praong 1.015ha. Tui urang lambaok di HĐND tỉnh Bình Phước, phun durain hu pagap yau phun ngak kaya mada. Jaik di ini, rahra daok jak gauk kaoh phun pa-aok blaic, phun cao su piah pala durain saong oh duah thau cambaih ilamo pala. Bruk ini ba tal dom kan kandah di harei hadei nan ye jabat chức năng njauk hu dom jalan langyah, ba jalan piah ka durain oh jeng phun “ngak kan kathaot”.

Tri Tôn lac huyện bhum ceik di tỉnh An Giang, hu rilo urang bangsa Khmer daok, bruk pandar dom jalan ngak piah plaih di metian urak ini oh ka glaong, jeng daok mbuan tagok dân số veik saong lahik bruk likei kumei samu gauk tuk menek. Kayua yau nan ye, UBND huyện Tri Tôn ieu dom pakat karja meng huyện tal puk palei, njauk paglaong hatai sahneng,  sangka tal bruk dân số, piah pasang iek saong patrun patakik bruk likei kumei oh samu gauk tuk menek, bhian tacei pato, tui iek kajap dom uranaih menek tabiak, hadom likei kumei tuk menek. Huyện Tri Tôn urak ini hu 108,6 anek kamar likei dalam 100 anek kamar kumei tuk menek

Labaih sa thun ini, yaom limo ralaow di tỉnh Tiền Giang saong Bến Tre rilo mbang trun khang. Dut saong tukvak ini 2 thun dahlau, yaom limo ralaow praong 1 thun trun labah 10 trieu daong sa drei.  Yaom limo ralaow trun lac kayua bruk raong limo di dom bhum palei tagok khang, sản lượng tagok; dalam tuk nan dom limo ralaow blei meng negar langiu tame lac biak rilo, yaom bier jang dalam taneh ia. Jaik di ini, chất lượng tapon limo hu patagok min yaom kaom bier jang, nan ye mikva oh khin raong veik saong daok patrun patakik veik var raong piah salih tapa bruk raong karei.

Triều Tiên khan lac tên lửa bo taneh ia ini cuh nao dahlau di nan sa harei, lac tên lửa đạn đạo xuyên lục địa (ICBM) Hwasong-18. Theo Hãng thông tấn negar Triều Tiên KCNA, Chủ tịch Kim Jong Un ndom lac, dom bruk  ngak quân sự khang jang meda hu peih ngak mbiah tal tuk Mỹ saong Hàn Quốc tabiak panuac taduan lah saong klaak bruk thù địch Triều Tiên. Dahlau di nan, Hàn Quốc brei thau lac meda ieu sa bruk cagar veik pakat dunya ka bruk bo taneh ia ini mboh lac ngak pa-pandik oh ka bhian mboh saong dom bruk đe dọa hạt nhân di Triều Tiên.

Pathau khan di Liên hợp quốc brei thau lac, bruk tavak sraiy di karja di dunya tagok tal tanut glaong di abih lac 92 ribau tỷ đôla di thun 2022 dalam tuk dom rajaei njaukk masaiy jien piah pacang caga haong dom mbang sarau kadau yau ye jit ruak praong COVID-19. Sraiy daok jeng naong trak ngan haong dom taneh ia daok cak rok patagok kayua prein pambuak haong jien padai daok patakik, jien nao masaiy tagok glaong, jien lahik yaom saong bruk patagok daok suai damuai. Gam tui di nan, cấu trúc jien padai dunya ngak ka bruk pambuak jien padai ngan haong dom taneh ia daok cak rok patagok lac oh ginup. Di châu Phi, paok jien bayar ka jien laba tavak sraiy daok glaong jang jien ka pato magru atau y tế.

Sa mbang pandiak khang di grauk labik dalam bhum Tây Nam taneh ia Mỹ, haong langik pandiak tagok tal 43 độ C di rilo labik, ngak kan kandah tal raidiuk di jaik 100 triệu menuac. Pasak Thời tiết negar Mỹ kakei bhap bini, abih di nyu lac urang taha saong uranaih sit, plaih di ia harei pandiak khang, takik tabiak langiu saong menyum rilo ia. Tui dom urang ilamu gah langik tasik, bruk langik tasik dak harei dak catang di grauk labik dalam taneh ia Mỹ, lac sa bruk brei mboh ka biến đổi khí hậu dunya./.