Danak dak ini praong 7km tatua tame labik cảng saong 2km tapen kapal njuak brei hu taneh praong labaih 571 ha. Cảng pajeng ba pandap dunya Cần Giờ meda taduan kapal gilai pajeng ba  hu prein khang meng 10.000 -65.000 tấn saong kapal  hu preih pajeng trak 8.000 tấn. Kuhria taong abih jien buh tame ngak danak dak ini jaik 129.000 tỷ đồng. Ban raya HCM kham merat tuk ba tame pandar abih prein khang  di thun 2047, yaok thun  Cảng meda rik tame kadung jien karja  34.000 -40.000 tỷ đồng.

Labaih 300 urang jakar công an, urang đoàn dam dara di Bình Dương bahrau pataom mbaok tame bruk peih parang iek “75 thun - Công an bhap bini ngak tui panuac Wa” kayua Mintri Công an pambuak bruk haong Công an tỉnh Bình Dương peih ngak. Parang iek hu parang tabiak, yaih khan jaik 650 thaot binguk, 350 harak gar, pandap panda saong dom jamriak mac moc pandar di gah công an. Tapa parang iek ini, hu daong pok meyaom dom jak jeng, dom jayah di Công an bhap bini tapa 75 thun bac megru, ngak tui “6 paka Wa Hồ pato” saong dom rik daong dalam joa kandang di dom rai urang jakar, urang lin công an dalam bruk cách mạng, dak padang saong khik caga taneh ia.

Tui Sở LĐ, TB saong XH tỉnh Cà Mau, urak ini tỉnh oh ka hu sang bac cao đẳng, trung cấp tư thục. Jien piah padang ngak cơ sở vật chất, mac moc saong jien buh tabiak ka bruk bhian ngak ralo meng lac kadung jien karja. Bruk pato pasram di dom labik pato bruk ngak yaom lac hu salih birau, min oh ka pabak sumu bruk ngak. Bruk caong khin bac dom bruk ngak birau di urang ngak jeng yau darak pasar bruk ngak oh ka sumu. Bruk nan kayua kurang gru pato, pandap pato bac saong angan bruk ngak hu mbaoh tangin tok takik, hu dom bruk oh lagaih, bruk birau oh ka hu pabak.

Tui Pasak pasang iek ruak kik tỉnh Bà Rịa - Vũng Tàu, tinh ini gam gam hu urang njauk ruak tangin takai cambuai saong ruak meda tagok khang di tuk anek saih nao bac veik, nan ye bruk njaom mbak lac mbuan hu rilo. Dalam 186 sruh jit, hu 27 sruh jit di sang bac. Nan ye tỉnh hu panuac ieu gah y tế ba tabiak rilo jalan pacang caga ruak tangin takai cambuai. Dom labik y tế saong sang bac brei caga ginup pandap panda, jru tavao duh ka bruk iek ruak, taong ruak saong langyah sruh jit ruak samar drah. Gam haong nan, kakei dom sang bac brei ngak hacih sa-at tal bac, nhà trẻ.

 Bilan padai Thu đông ini, urang ngak nong tỉnh Hậu Giang trun pajaih jaij 25.000 ha, tagok jaik 500 ha dut saong bruk ba tabiak. Tal tuk vak ini, birau hu labaih  5.500 ha padai daok chroh, yau nan min urang mai iek tal hamu brei caik jien takai chip ngan haong yaom biak glong meng 7.000-7.900 đồng/kg padai tathak, tui janih padai. Taphia di nan yaom padai tagok glong, ye rilo janih khak jeng daok trun yaom catang, daong mikva trun takik jien buh tame ngak hamu. Yaom padai tagok, yaom khak trun, yau nan ye mikva urang ngak padai thu đông meda mek jien tame hu ralo.

Di dom nhà hàng Nanchengxiang di Bắc Kinh, Trung Quốc, tuai meda eng drei pilih ruah pandap mbang panal, mbang mesup haong 3 janih lac bu, súp mesam hăng saong ia tasau. Taong abih jeng hu yaom 3 nhân dân tệ (lac jaik 10.000 đồng). Nan lac sa pagap brei mboh bruk trun yaom di Trung Quốc. Prein blei trun ba tal bruk meriak gauk yaom kaom di dom nhà hàng pakat biar di Trung Quốc. Trung Quốc daok laik tame bruk trun yaom tuk bruk blei pandar di taneh ia ini trun mbang camereip kuhria dalam labaih 2 thun. Bruk cai pandar takik daok ngak kan kandah tal bruk pasiam veik kinh tế hadei di jit praong COVID-19.

 Dom mbang khuah glai di kaoh pulao Maui di tiểu bang Hawai, Mỹ ngak palai tayak jaik 300 cơ sở hạ tầng saong ba tal takik abih 36 urang metai saong yaok pluh urang njauk rambuac. Rilo pasak ngak labik daok hu peih pabah mbang ka bhap bini tame daok. Rilo urang njauk trun tasik piah plaik njiak dom apui khuah glai saong gah khik iek tasik Mỹ daong ba tagok. Tổng thống Joe Biden brei panuac jak ba dom gah piah daong padam dom apui khuah. Gah gah khik iek tasik saong urang lin Mỹ caga blaoh piah daong, Mentri jalan mbak pajeng ba brei pambuak bruk  ba tuai dulich tabiak truh kaoh pulao.

Tui kuhria, 42% urang kumei Japon urak ini umo 18 thun oh ndih tapui hu, oh menek anek hu. Bruk ini di urang likei tagok tal 50%. Kadha ini, meda ngak jeng bruk kan kandah jang ka harei hadei di danak dak an sinh xã hội di taneh ia. Japon jeng daok kham merat meng dom sahaneng duah yau ye salih bahrau jalan ngak bruk piah daong palagaih jang ka dom amaik ame di harei hadei. Min dom kadha yau ye bruk oh tantu ka harei hadei saong jien bilan oh tagok daok ngak kan kandah tal bruk khin gauk, bruk lakhah caga di dam dara urang daok ranaih./.