UBND TP.HCM bahrau ba tabiak jalan pasang iek bruk quy hoạch đô thị, pasiam veik quy hoạch rah tui dua gah jalan saong bhum jaik taphia jalan Vành đai 3 piah pabak ka jalan peih ngak hu siam lagaih kadung taneh, ba jien tame ka kadung jien kanja ban raya. Tui kuhria, kadung taneh bhum jaik taphia jalan Vành đai 3 di dalam  TP.HCM lac labaih 2.400 ha, dalam nan hu labaih 500 ha taneh ngak nong lac kayua kanja khik ramik meda pablei to yaom pataom mek mai jaik 27.000 tỷ đồng. Langiu di nan hu jaik 1.900 ha taneh rahra pandar, mayah pasang iek, pataom mek saong pasiam veik bruk quy hoạch hu siam lagaih, peih bruk to yaom meda ba jien tame biak rilo ka kadung jien kanja.

Hadei di jaik 3 thun kuhria caga, tal urak ini, palei thông minh di Bình Dương meng hu buh jien tame ngak dom bruk tui jalan padang ngak thông minh, anek menuac thông minh, karja thông minh saong bruk ngak nong thông minh. Bruk ngak di danak dak ngak ka  xã Bạch Đằng, ban Tân Uyên jeng labik cakrok ngak nong thông minh, du lịch sinh thái, jeng sa labik brei mboh bruk hijao ka Bình Dương. Ini meda lac bruk ngak iek piah pambak praong di dom xã hu bruk dreih yau nan di dalam tỉnh. Xã Bạch Đằng praong tok labaih 1.090ha, hu pacang vil val meng kraong Đồng Nai. Ini lac sa dalam takik palei daok khik hu bruk joa lange, oh hu sang mac ngak pandap saong oh hu ia nerak meng ngak kong.

Ủy ban Mat tran negar Việt Nam tỉnh An Giang bahrau hu nao rivang saong tadhau ayuh harei Sene Dolta di mikva bangsa Khmer di 6 paha Khmer dalam huyện Tri Tôn.  Kapul hu payua panuac sua tangi, tadhau ayuh prein yava tal dom ong bhik, thượng tọa, à cha, mikva phật tử Khmer rok harei Sene Dolta thun 2023 biak bui sambai, siam makre. Gam tui di nan, pathau khan tal dom ong mbik ka dom bruk ngak jak jeng dalam bruk cak rok patagok kinh tế - xã hội di tỉnh An Giang dalam tukvak tapa. Dalam nan hu bruk rik tame biak siam makre di dom halau janeng, dom urang hu angan je dalam bruk pathau khan, jak ba dom phật tử saong mikva bangsa diukrai siam ka dunya, mekre ka agama, sangka cak rok patagok kinh tế.

Kapul dam dara Việt Nam tỉnh Kiên Giang pambuak haong Báo Tiền Phong saong Tập đoàn Tân Á Đại Thành bahrau peih bruk padang ngak sa baoh sang anit ranam brei ka sang kathaot daok di palei Tân Thành, xã Thạnh Đông, huyện Tân Hiệp. Tapa nan, Tập đoàn Tân Á Đại Thành hu alin hadiah 30 pok jien bac, yaok pok yaom 1 triệu đồng brei ka dom adei anek saih sang kan kandah daok di huyện Tân Hiệp saong aln hadiah 30 mac halang ia ka Bộ đội Biên phòng tỉnh Kiên Giang yaom 200 triệu đồng.  

Ong Cũng Hoàng Phương, umo 60 thun, daok di huyện Thới Lai, ban Cần Thơ hu taduan harak Dược sĩ di Sang bac Đại học Tây Đô meng puac bilan 9 blaoh. Ong Phương jeng lac sinh viên umo praong thun abih di sang bac, bac tamat đại học. Ong Phương meng di tuk daok sit tuk halei jeng caong  hu nao bac. Hadei di tuk bac tamat bac di Sang bac Trung học Y tế Cần Thơ, ong mai ngak bruk di Bilai Y tế xã Trường Thành, huyện Thới Lai. Hadei di nan, ong likau padeih mai sang peih bilik pablei jru tavao. Thun 2014, ong eng drei pasram bac saong pakacah tame gah Jru tavao. Tal thun 2019, ong Phương hu bac salah abih tih dom mon bac di sang bac, tok daok tín chỉ Anh văn lac ginup ilamo piah tamat bac. Tal harei 30/9 meng blaoh, ong Phương hu taduan harak bac tamat.

Akaok Mintri Quốc phòng Israel tabiak adat pacang veik abih Dải Gaza, 2 harei hadei di tuk gah Hamas taong tame dalam taneh ia Israel ngak ka labaih 1.000 urang matai. Urak ini dom pabah mbang negar di Israel haong Gaza brei kreik veik. Gah daong brei saong bruk ngak di Liên hợp quốc ngan saong urang tị nạn Palestine (UNRWA) hu panuac lac, prein pabak pandap daong ka 75.000 urang di tản di Dải Gaza daok plaih njaik mesruh meda tapa prein dalam dom harei tal, meyah Israel oh peih dom pabah mbang negar tame Dải Gaza. 

Gah Y tế dunya (WHO) brei thau lac urang kumei saong uranaih meblah 2/3 dalam dom urang njauk bala tame sang iek ruak kayua njauk rambuac trak dalam dom mbang bala magei baoh taneh rahtabiak di harei 7/10 bahrau blaoh di Afghanistan. Kanja Taliban- lac kapul daok pan quyen di Afghanistan tui kuhria lac takik di nyu 2.400 urang metai saong labaih 2.000 urang njauk rambuac dalam dom mbang magei baoh taneh di puac adit blaoh. Urang lambaok ka kapul pacang caga samar drah di Gah y tế dunya brei thau lac bruk pabak jien padai ka dom bruk ngak pahla jeng daok hu makna biak praong, dalam tuk bruk njauk caik hatai tal saong kadung jien kanja daong ba di dunya daok hu salih jalan brei tabiak truh Afghanistan.

Thủ tướng Ai Cập bahrau njauk hatai haong dom labik ngak pandap saong Cty pablei pandap ka bruk patrun 15 tal 25% yaom dom janih pandap mbang yaok harei saong oh kak je hải quan dalam 6 bilan. Bruk njauk gauk nan mek hu dalam tuk Ai Cập daok kham merat pacang lạm phát. Tui nan, dom labik pablei pandap meda klaak kein laba meng dom pandap mbang yaok harei, lac đậu tằm, đậu lăng, dom pandap ngak meng ia tasau, phô mai, mì ống, brah, saradang, ralow manuk saong baoh menuk ada. Rajaei jeng brei jhul samar dom adat hải quan saong brei tapa di dom pabah lamnge. Lạm phát bilan 9 meng blaoh di Ai Cập lac jaik 38%./.