Sở padang ngak TP.HCM bahrau hu harak pathau khan ka bruk peih ngak danak dak patagok sang daok tukvak 2021-2030. Thun 2022, TP padang ngak bahrau 8 triệu 450 rabau m2 sàn sang daok. Dalam quý I thun ini, TP bahrau cakrok hu 950 rabau m2 sàn sang daok. Piah ngak hu bruk ba tabiak tal thun 2025, TP brei cakrok 36 triệu 650 rabau m2 sàn. Tui Sở padang ngak TP.HCM, sang daok di danak dak bahrau hu 30% saong labik pabak dak harei dak trun. Ngan saong sang daok xã hội, meyah oh khang hatai lang talaih kan kandah, tavak tavaiy gah adat buh jien tame ngak, meda ba tal bruk oh ginup pok jien mesraiy 120.000 tỷ đồng tui Sarak 33/2023 di rajaei ka lang talaih, jhul patagok darak pasar sang danaok taneh riya cakrok salamat, siam mekre, khang kajap.

Sở jalan mbak pajeng ba tỉnh Bình Dương brei thau, dom gah daok jhul samar bruk peih jien, peih mbaok taneh piah peih bruk padang ngak jalan Vành đai 3 TP.HCM di jhung bilan 6/2023. Kuhria tal harei 8/6, mBan khik ramik danak dak padang ngak jalan mbak tỉnh Bình Dương hu khan brei thau bruk mek veik taneh tal taong abih dom baoh sang hu danak dak jalan Vành đai 3 nao tapa. Bruk duah thau, pasang iek, yaok pataom ngak hu 97% dalam abih tih dom bruk.

Tây Ninh hu veik 6 urang njauk jru mek kayua mbang bimao glai. Tui panuac khan meng UBND huyện Dương Minh Châu, tỉnh Tây Ninh, labik ini bahrau hu 6 urang njauk jru mek hadei di tuk mbang bimao glai.  6 urang nan jeng daok di xã Phước Ninh, huyện Dương Minh Châu, hu ba tame cấp cứu di pasak Y tế huyện di dom harei 3, 6 saong 7/6 dalam tuk daok taglaoh ta-ok, aih craoh, pandik tian, pandik akaok. Urak ini 2 urang hu tabiak truh sang iek ruak, hu nao sang saong 4 urang daok hu tui iek, taong ruak. Dahlau di nan, dom urang nan tame glai paik bimao baoh menuk, baoh ada kangan mai mbang. UBND huyện Dương Minh Châu hu tabiak harak payua Pasak y tế huyện saong dom kapul nyaom, dom xã, ban sit ka bruk patagok pathau khan, pacang caga njauk jru mek dalam bhap bini.

Biar harei kabroi (8/6), mBan tacei jalan pakat negar mbang pakacah tamat THPT thun 2023 hu ngak bruk haong tỉnh Bạc Liêu ka bruk kuhria caga, peih mbang pakacah.  Bạc Liêu hu 6.382 anek saih tut angan tame pakacah tamat THPT anak tal saong hu rami ramik pakacah di 277 bilik pakacah, yaok bruk hu caga blaoh blai ka mbang pakacah. Sở Pato megru tỉnh Bạc Liêu brei thau, yaok labik pakacah jeng hu rami ramik dom bilik caga tuk hu anek saih pakacah njauk ruak COVID-19. Mban tacei pato hu panuac kakei Bạc Liêu brei paglaong hatai sangka dalam yaok janih, yaok bruk saong brei pambuak bruk khang kajap haong gah an ninh hu mbaok tame piah pacang caga bruk bleik saleik dalam pakacah.

UBND tỉnh Bình Thuận bahrau hu harak ieu Công ty TNHH Nhật Hoàng samar peih ngak dom harak gar njauk tui adat piah ba sang mac langyah hareik nerak TP Phan Thiết tame ngak bruk di bilan 9 tal. Meyah tapa tukvak ini bo sang mac daok oh ka peih pabah mbang ngak bruk, UBND tỉnh Bình Thuận meda mek veik harak adat brei  ngak saong oh langyah bruk khiếu nại halei di công ty.  Danak dak ini hu peih bruk padang ngak di thun 2016, hu phun jien buh tame ngak lac 495 tỷ đồng, prein langyah nerak hu 400 tấn yaok harei saong tui kuhria hu ba tame ngak di thun 2020. 3 thun tapa, danak dak ini oh ka hu ngak salah saong oh ka hu ba tame ngak, tui nan ngak ka bhap bini biak pandik hatai.

UB Bầu cử Thái Lan (EC) hu panuac ieu pasang iek veik dom phiếu di 47/95.000 labik buh phiếu dalam taneh ia, hadei di tuk mboh dom phiếu bầu dalam mbang Tổng tuyển cử harei 14/5 oh njauk haong dom cử tri hu mbaok buh phiếu. UB Bầu cử Thái Lan (EC) brei thau lac meda peih bruk pasang iek veik dom phiếu bầu dalam mbang Tổng tuyển cử meng bloh di dom labik buh phiếu di 16 tỉnh, ban dalam taneh ia, dalam nan hu ban ine Bangkok.  Bruk pasang iek veik phiếu bầu tui kuhria hu peih tabiak ngak di harei adit tal (11/6) saong UB bầu cử Thai Lan EC caong lac meda khan brei thau bruk pilih ruah dalam bilan ini.

Jien dola Mỹ gaok khat lahik biak ralo di harei kabroi 8/6 tuk dom harak đơn likau daong lahik bruk ngak di Mỹ di adit dahlau tagok glong jang caga dahlau, tal tanut glong abih kuhria meng thun 2021. Chỉ số dola Mỹ dut saong 6 janih jien praong nan lac euro, jien bảng Anh, frang Thụy Sĩ, Yên Nhật, dola Canada 0,71% di puac mbang pablei salih. Dữ liệu kayua Mentri Lao dong Hoa Kỳ  brei thau harei labroi brei mboh harak likau daong lahik bruk ngak  mbang akok meti  dalam adit dahlau tagok jaik 10 mbang, meng 28.000 tagok tal 261.000 , glong jang rilo mbang dut saong tamut kuhria rah tapa dahlau di tuk jit ruak praong thun 2019.

Tổng thư ký NATO bahrau hu panuac ieu dom urang dalam liên minh tagok samar bruk daong ngak pahla ka Ukraine hadei di bruk pacah talah binek thủy điện Kakhovka di tỉnh Kherson. Bruk pacah talah binek Kakhovka ba tal kan kandah biak trak damak ka yaok rabau urang saong alam môi trường. Dom taneh ia đồng minh brei mboh hatai jum pataom khang kadang haong Ukraine. Hu dom taneh ia hu daong pabak brei dom pandap hu yaom glaong yau ye jamriak halang ia, jamriak njuk ia saong mac phát điện hadei di bruk talah pacah binek./.