Tui Mentri Ke hoach saong Dau tu, bruk kinh te - xa hoi di negar drei dalam 7 bilan tapa hu siam veik mboh di anak meta, bilan hadei siam jang bilan dahlau, quý hadei siam jang quý dahlau, mek hu rilo jak jeng praong, jaik abih gah. Cambaic laic ye, bruk patagok kinh te Quy II sumu 6,93%, kuhria dalam 6 bilan mek hu 6,42%. Ini lac bruk patagok siam mekre, glong jang tanut ba tabiak glong abih di Rajaei dalam Sarak 01 lac 6%. Dom bruk ngak brei salih birau, salih pandar số, pandar hacih sa-at, kinh te tuan hoan, dom gah, bruk ngak kong nghiep birau yau chip, bán dẫn, tri tue nhan tao…daok hu jhul tagok khang.

Kuhria tal jhung bilan 7, TP.HCM peih pakak 12 sang bac bahrau piah pabak ka thun bac bahrau. Dalam nan quận Bình Tân hu rilo di abih lac 7 sang bac. Patui di nan lac di dom quận huyện karei yau ye huyện Hóc Môn, Bình Chánh, Quận 12, 8, 6. Sở Pato Megru TP.HCM jeng brei thau, hu ieu dom quận huyện pasang iek, tut angan danak dak pato megru pabak tame bruk đầu tư công tukvak mbiah vaktu 2021 - 2025. Meng nan, ban raya jhul samar bruk padang ngak danak dak 4.500 bilik bac tui jalan ba tabiak. 

Nyaom roya Mặt trận Negar (MTTQ) Việt Nam tỉnh Bà Rịa - Vũng Tàu mbang VII, vaktu 2024 -2029 hu peih ngak praong prang di page ini, hu mbaok 300 urang. Vaktu 2019-2024, mat tran negar dom pakat di Bà Rịa - Vũng Tàu hu padang ngak jiak 3.500 bruk ngak rik tame peih ngak dom tanut padang ngak palei pala birau; rik pataom hu labaih 203 tỷ đồng, alin brei jiak 861.000m2 taneh ngak danak dak duh ka bhap bini, jalan mbak nao mai. Tal tuk ini, dom bhum palei hu daong padang ngak sang ka taong abih baoh sang kathaot, jaik kathaot hu ginup paka padang ngak sang Jum pataom.

Tui yaok pataom di Mban Bangsa tỉnh Kon Tum, bangsa Brâu urak ini hu 161 sang gam haong 513 urang, daok di palei Đăk Mế, xã Pờ Y, huyện Ngọc Hồi. Meng prein khang di dom danak dak, daong cakrok dom bangsa biak takik memuac, raidiuk di bangsa Brâu hu glaong tagok. Urak ini taong abih sang bangsa Brâu hu pandar ia hacih, hu paglaong bruk tui pang, tui iek tuk tỉnh Kon Tum hu buh jien ngak sa bilai thu, phát sóng rayo papar binguk di xã Pờ Y, saong brei saoh pandap pang, pandap iek ka bhap bini. 

Labaih 1 bilan mai ini, dom labik ngak ahar di tỉnh Vĩnh Long tame ngak ahar Trung thu piah pablei. Tỉnh Vĩnh Long urak ini hu labaih 10 labik ngak ahar Trung thu, hu caga ginup dom pandap lagaih piah ngak brei hacih meng pandap tamo tal bruk ngak tabiak ahar, papaok, khik piah saong pajeng ba, brei hacih sa-at pandap mbang. Dom gah chức năng tỉnh Vĩnh Long jneg brei pakhang bruk pasang iek ahar hu meng halei mai, ahar siam hacih khik brei ka urang mbang hu salamat.

Quốc hội Thái Lan khan lac Hạ viện brei peih bruk pilih ruah pok ngak Thủ tướng bahrau di harei pagaiy 16/8 hadei di tuk ong Srettha Thavisin njauk Tòa án Hiến pháp tabiak panuac brei padeih ngak Thủ tướng. Tui adat di Quốc hội Thái Lan, sa urang hu pok angan piah pilih ruah pok ngak Thủ tướng brei hu bruk pachreih tui di labaih meteh dom menuac di Hạ viện, urak ini hu 493 nghị sĩ. Dahlau di nan, Tòa án Hiến pháp Thái Lan hu tabiak panuac brei padeih ngak Thủ tướng di ong Srettha kayua ngak suan hukum negar dalam bruk pok sa urang tame ngak dalam rajaei 

Tổng thống Hàn Quốc Yoon Suk Yeol brei padang sa jabat tacei pato pakat chuyen vien haong Triều Tiên piah ginum biai ka dom jalan ngak brei takik catang tagok saong pambuak veik bruk ngak mbang kinh te. Khan ka bruk pamong tal yasa haong Triều Tiên, ong Yoon Suk Yeol brei mboh Hàn Quốc caga blaoh blai pambuak bruk chính trị saong kinh te chip tuk Triều Tiên peih ngak sa takai yam tal bruk atah klak abih hạt nhân. Langiu di nan, Hàn Quốc brei padang Kadung jien Tự do saong Nhân quyền Triều Tiên kham merat daong dom bruk langiu rajaei piah jhul khang bruk tự do saong nhân quyền di taneh ia ini.

Dom urang roh duah Peru kuac rok hu 4 bộ talang menuac hu meng labaih 3.000 thun dahlau di sa bhum taneh thu lagu daok di gah brak taneh ia ini. Tui dom urang roh duah, labik ini dahlau daih meda lac sa baoh kandhi pok kakuh dom yang di sa nền ilamu. Peru lac palei negar di dom zaman patao Inca hu mbaok dalam labaih 500 thun dahlau, ngak patao sa bhum taneh praong meng gah meraong Ecuador saong Colombia tal bhum kreh negar Chile./.