Muk Trần Kim Yến, Akok UB MTTQ TPHCM khan lac: langiu di bruk jak ba bhap bini rik daong ye danak dak  daok paglong jalan sahaneng  di urang jakar, urang đảng saong  bhap bini Ban raya ngan haong bruk dak padang saong khik caga taneh ia. Meng thun 2013 tal thun 2022, danak dak ini taduan hu labaih 360 tỷ đồng saong buh ka dom bruk kuhria daong labaih 301 tỷ đồng.

Trà Vinh lac tỉnh tapen tasik bhum taneran kraong Cửu Long, hu labaih 1 triệu menuac, dalam nan hu 1 dalam 3 menuac sia lac urang bangsa takik. Urak ini, bruk ngak mbang ngak huak di bhum bangsa takik dak harei dak tani tanat. Rilo urang kumei bangsa takik daok di bhum atah bayah thau yam tagok ngak mbang, jeng po doanh nghiệp. Piah daong paglaong akaok sahneng dalam bruk ngak mbang kinh tế ka urang kumei, Kapul urang kumei tỉnh Trà Vinh hu jhul khang pathau khan Danak dak 8 ka bruk salih "jalan sahneng, jalan ngak” piah pasiam jalan ngak mbang duah jien, patagok jien mek tame ka urang kumei, abih di nyu lac urang bangsa takik, urang kumei daok di bhum atah bayah.

Mbang akok meti, phun sâm bố chính hu pala iek di huyen Tân Phú, tỉnh Đồng Nai. Ini lac pajaih phun sâm bhian hu bhap bini ieu angan lac "sâm brei ka patao". Tui muk Huỳnh Thị Phước Minh, Tổng giám đốc Công ty Kim Nguyên, urak ini bruk pala iek di Phú An di taneh praong 5 ha, tukvak anak tal meda peih pambak praong dom bhum taneh karei meng 150 - 200 ha, tui nan padang ngak sang mac ngak tabiak pandap sâm di Đồng Nai. Ong Trần Lâm Sinh, Pho akok Sở NN-PTNT tỉnh Đồng Nai caong khin  Kong ty  Kim Nguyên brei pambuak haong dom bhum palei, đơn vị po glai piah pasang iek, taong yaom iek taneh riya, langik tasik piah palih ruah labik hu lagaih peih ngak.

Di huyện U Minh, tỉnh Cà Mau urak ini daok tame bilan yuak padai Hè Thu, min kayua hajan praong dui atah dalam dom harei tapa ngak brei dom mblang hamu dauk ia, biak kan yuak padai. Dalam huyện U Minh bilan padai Hè Thu ini trun pajaih 3.300 ha. Tal urak ini yuak hu 300 ha. Langik oh lagaih ngak kan kandah tal bruk yuak padai, mbuan ba tal trun năng suất padai di rahra.

Urang ngak nong pala manaih di tỉnh Hậu Giang daok chreih chrai kayua paik baoh pablei  hu yaom glong. Dom harei tapa, urang blei manaih tame tal apuh blei janih ka 1 yaom 10.000 – 11.000 đồng sa baoh. Yaom manaih urak ini tagok jang meng 3.000 -4.000 đồng sa kilo dut saong bilan dahlau. Tui dom baoh sang pala manaih, yaom manaih tagok khang kayua lac daok dalam tuk paih baoh suan bilan, dalam tuk urang khin blei di darak pasar biak ralo. Yaom manaih tagok glong jeng lac pabak prein piah mikva patui bruk buh jien tame  pala, pandar ilamu ky thuat tame pala drak ngak brei rilo baoh.

Hu mbaok dalam nyaom biai pakat glaong Đông Á di Indonesia dalam harei 7/9, Phó Tổng thống Mỹ Kamala Harris hu ndom veik ka panuac sanya di Mỹ ngan saong Ấn Độ Dương-Thái Bình Dương saong bruk lac pasak di ASEAN, saong brei thau bruk pachreih tui di Mỹ ngan saong Meta maong ASEAN ka Ấn Độ Dương-Thái Bình Dương. Phó Tổng thống Mỹ ndom lac, tự do pajeng ba angaok tasik saong angaok langik brei hu iek praong di Biển Hoa Đông saong Biển Đông, yaok bruk meriak gauk brei hu langyah dalam sron mbon saong tui hukum dunya, dalam nan hu Công ước Liên hợp quốc ka hukum tasik thun 1982 saong phán quyết di tòa thường trực thun 2016.

LHQ daok “ kham merat hu mbaok tame” ngak brei pasiam bruk pablei ngũ cốc saong khak drak di Nga, piah pachrei taneh ia pambuak veik Sang kien ngu coc, brei adat pablei ngu coc tabiak negar Ukraine tapa Biển Đen hu salamat. TTK António Guterres mboh lac njauk brei hu sa jalan ngak piah hu tani tanat yau gauk. Dalam nan, Liên bang Nga meda yam tapa hu dom kan kandah daok mboh di meta, piah pamong tal bruk pasiam veik Sáng kiến Ngũ cốc ​​Biển Đen.

Dom sang bac di ban Kumamoto (Japon) hu blei 2 trợ lý robot piah daong patrun bruk klaak bac di anek saih. Karja ban caong lac robot meda pachreih anek saih klaak bac hu mbaok bac online saong mai veik tal bac. Mintri Pato megru Japon khan lac, meng puac bilan 3/2022 tal ini, hu tal 244.940 anek saih di taneh ia ini oh nao bac dalam labaih 30 harei. Mintri Pato megru Japon mboh lac bruk pambuak tal hatai sahneng saong prein yava kayua jit COVID-19 lac makna praong abih ba tal bruk nan./.