Di labik di, Mban Bangsa tỉnh Trà Vinh likau Thủ tướng Rajaei patagok jien daong sang daok 80 trieu đồng sa baoh sang saong iek brei patagok jien daong taneh daok saong taneh pala drak kayua yaom taneh urak ini dalam tỉnh biak glong. Ngan hoang jien daong 40 trieu đồng sa baoh sang saong phun jien daong hu brei dahlau di karja palei oh ginup piah padang ngak sang hu 3 bruk khang kajap nan lac takai sang kajap, danieng khang, tabung kajap tui bruk ba tabiak.  

UBND tỉnh Bình Dương caga peih bruk padang ngak sang ga metro di vòng xoay A1 di ban bahrau Bình Dương. Danak dak ini hu padang ngak haong yaom jien abih tih jaik 2.400 tỷ đồng. Kuhria peih ngak di harei 26/9 ini, saong hu ngak salah hadei di 18 bilan. Sang ga praong 5.800 m2, hu dom dịch vụ pablei salih. Sang ga metro lac sa binah di tổ hợp vòng xoay A1, pambuak pagam jalan metro meng TP.HCM mai Bình Dương. Tuk tame ngak bruk, sang ga hu prein duh ka 14.700 mbang tuai saong 1.630 menuac ngak bruk yaok harei. 

Tukvak jaik ini, bhap bini pala manaih di tỉnh Hậu Giang biak uan tabuan tuk yaom manaih hu yaom biak glong. Urak ini janih 1 hu yaom meng 14.000 tal 15.000 đồng sa baoh, tagok meng 4.000 tal 5.000 đồng sa baoh dut saong tukvak ini thun dahlau. Dalam tỉnh Hậu Giang urak ini hu labaih 3.000 ha manaih, pala ralo lac manaih Queen. Mikva urang ngak nong daok jhul pakhang bruk ba ilamo kong nghe birau tame pala, peih praong taneh pala manaih tui jalan huu co, tui tanut VietGAP, GlobalGAP pambuak chuoi pandap piah brei rilo baoh, praong siam yamen bingi saong jien laba mek tame rilo.

Pa-ok cuah Hòa Lộc lac sa dalam 11 janih baoh kayau angan je di tỉnh Tiền Giang, min taneh pala daok takik veik. Piah duh ka bruk pabam pajaih saong khik ramik, patagok bein phun pa-ok cuah Hòa Lộc, dom gah chức năng tỉnh Tiền Giang bahrau pok brei angan labik bein phun đầu dòng. Urak ini, tỉnh hu pilih ruah bein paok cuah Hòa Lộc di xã Hòa Hưng hu 50 phun lac phun đầu dòng. Ini lac 50 phun pa-ok cuah Hòa Lộc praong siam samu gauk, ginup kadha piah tui iek, pataom mek tanut piah tut angan lac bein đầu dòng, taong mã số phun saong sơ đồ hóa dom bein piah lagaih ka bruk tui iek saong khik ramik. Ini jeng lac labik njauk caik hatai jia dalam pabak pajaih pa-ok cuah Hòa Lộc di tỉnh Tiền Giang.  

Bruk ia sua, ia ndik di gah ala kraong Đồng Nai daok rah tabiak dalam sraw kadau. Di Ban Biên Hòa, tuk camereip mboh lac ia ndik tagok ngak kan kandah tal raidiuk bhap bini saong bruk caga ia ndik daok hu ngak catang. Di phường Long Bình Tân, TP Biên Hoà, ia tagok meng 30 -50 cm, nan ye bhap bini brei pandon tagok glong  drap ar klaik di khut palai. Di phường Hiệp Hòa, Ban Biên Hòa, yaok rituh baoh sang urang raong ikan long be di kraong Đồng Nai brei caga dahlau dom jalan pacang caga hajan ribuk, glut jaleih.

Kadung jien uraniah Liên hợp quốc (UNICEF) bahrau brei thau, hu tal jaik 6 triệu uranaih gaok kan kandah meng ia dauk ia sua saong glut jaleih taneh hadei di rabuk Yagi palai pajoa Đông Nam Á. Hadei di rabuk, labaih 850 sang bac saong labaih 550 pasak y tế khut, tayah, rilo meng lac di Việt Nam, taneh ia gaok trak damak abih meng rabuk Yagi. UNICEF, daok pambuak bruk haong dom gah piah daong ngak pahla, daok daong samar drah ka uraniah saong dom sang njauk kan kandah kayua ia dauk ia sua di dalam bhum Đông Nam Á.  

Pasak Pasang eik saong Pacang caga jit ruak châu Phi (CDC Châu Phi) kakei lac, jit ruak đậu mùa khỉ di châu Phi oh ka pacang hu tuk manuac ruak daok tagok rilo veik di dom taneh ia. Urak ini, urang ruak tagok 177% saong dom urang metai tagok labaih 38% dut saong tukvak ini thun dahlau. Kayua oh ka pacang hu jit ruak yau nan ye chau luc ini brei peih bruk klauk jru vaccine pacang ruak đậu mùa khỉ. Dalam nan, “pasak jit” Cộng hoà Dân chủ Công-gô kuhria brei klauk jru di bilan 10 anak tal.

Cảnh sát Australia bahrau taong tayah sa jalan pablei salih ma túy hu angan ieu lac "Ủy ban". Kol tội phạm nyu ba labaih 1 tấn cocaine tame Australia tok dalam dom bilan. 6 urang umo meng 25 - 34 njauk cap mek dalam dom mbang pagui mek. Cảnh sát duah mboh labaih 30 kg cocaine hu kol nan khik piah, kuhria tabiak yaom jien lac jaik 1 tỷ USD. Tui panuac di gah  cảnh sát, ini tok lac sa binah sit dalam dom cocaine bo kol ini ba tame Australia. Meng bilan 2 tal bilan 7 thun ini, kol nan nyu ba tame Australia 1,2 tấn cocaine./.