Tui danak dak pataom tame 3 don vi di karja pakat tinh hu tinh Ba Ria - Vung Tau, tinh Binh Duong, Ban raya Ho Chi Minh bahrau hu labaih 13 trieu 7 rituh ribau urang, 168 don vi di karja, padang do thi praong birau di bhum Dong Nam bo. Ngak brei hadei tuk ramik veik Ban raya Ho Chi Minh lac ban raya di Trung uong, patagok dom kein lagaih di 3 tinh, ban ka taneh riya, bhap bini, dom bruk patagok kinh te, kham merat ngak jeng bhum taneh cak rok patagok birau di negar saong bhum Dong Nam bo.

Klau tinh, ban nan lac Ban Can Tho, Soc Trang saong Hau Giang brei ramik tame jeng hasa, hu angan Ban Can Tho (ban di Trung uong). Pasak chinh tri - hanh chinh labik ngak bruk di Ban Can Tho urak ini (quan Ninh Kiều). Kuhria abih tih urang jakar, kong chuc, vien chuc urak ini hu labaih 61.100 urang. Hadei pataom tame blaoh, Ban Can Tho birau hu taneh praong labaih 6.400 km2, labaih 4 trieu urang, dalam nan hu 30 phuong saong 69 xa. 

Tui Mentri Ngak nong saong Alam moi truong, baoh thanh long saong patei  meblah hu labik dang akaok jien mek tame meng bruk pablei njam patam baoh kayau tabiak negar langiu dom bilan akaok thun. Dalam nan 2 bilan  akaok thun, baoh thanh long pablei tabiak negar langiu hu jaik 94 trieu dola My. Bruk nan daong ka baoh thanh long  yam tagok  hu jeng baoh kayau pablei tabiak negar langiu dang labik akaok di Viet Nam. Njam patam baoh kayau di Viet Nam ralo hu pablei tabiak darak pasar Trung Quoc, hadei di nan lac Hoa Kỳ saong Han Quoc ngan haong jien mek tame patui di nan lac 9,6% saong 6%.

Urak ini durian di tinh Tien Giang daok trun veik, ba tal rilo urang ikak caik jien takei blei ka po bein daok huac kanda. Di dom labik Cái Bè, huyen Cai Lậy, ban sit Cai Lậy, tinh Tien Giang saong dom labik karei di tinh Ben Tre, durian Ri6 blei di bein  yaom 35.000 tal 40.000 dong sa kilo, durian Monthong hu yaom meng 60.000 – 70.000 dong sa kilo. Urak ini, rilo labik padeih blei tame, daok takik min daok blei durian Thái. Yaom nan trun labaih 2 angaok 3 dut haong tukvak ini thun dahlau.

Kong an tinh Binh Thuan ba trun ia sa sruh kano praong peih khang piah pasang iek duah thau bhum tapen ar tasik. Sruh kano praong atah jaik 12m, praong labaih 3 m, pajeng hu tal 8 urang, peih di labik jaik ar tathik, atah 12 hai ly. Bruk ba kano tame peih nao pasang iek di tasik lac bruk njauk ngak samar chip, piah duh ka bruk pacang caga kol kanjiak jhak suan hukum, pasang iek bruk ngak mbang cap mek ikan tasik, pajeng ba ndap nda, jeng yau langyah dom bruk rah tabiak oh thau dahlau di tasik.

Gah y te saong dom urang ilamo jit ruak negar Mỹ daok kakei ka bruk patagok oh pacang hu jit ruak soi tuk dom urang ruak soi di taneh ia ini meda tagok rilo jang urang ruak kuhria mboh. Kuhria ta-eng harei 15-4, di bang Texas, hu 561 urang ruak. Kuhria tal kreh bilan 4 ini, takik abih di nyu lac 735 urang ruak soi hu mboh di negar Mỹ. Yau nan min, dom urang ilamo mboh lac urang ruak meda tagok tal yaok ribau urang. Bruk ini mboh huac tuk uranaih di My takik klauk jru caga ruak.

Kadung jien Uranaih LHQ (UNICEF) khan brei thau, tui dom harak pathau khan, di Cong hoa Dan chủ Congo, dalam 2 bilan  akaok thun, hu jaik 10.000 mbang rambeik rapai saong taong paoh bao luc tinh duc, dalam nan uranaih kuhria mboh meng 35% tal 45% dalam dom bruk nan. Tui UNICEF, bruk sraw kadau di Congo kayua kalin kan, yaok ribau uranaih oh daok dalam baoh sang, ba tal dom uranaih mbuan jeng gaok laba urang taong paoh bao luc tinh duc rilo jang.

Canh sat Italy chap mek 24 urang di Camorra ini lac kapol nyaom mafia sahanak di ban Naples, ngan haong dom duis pablei matuy, khik piah phao ndao saong ngak bruk khik radaih suan hukum. Tui harak pathau khan di Lien minh ndang Xanh – Cánh tả, labaih 2.400 “urang ngak bruk” khik radaih suan hukum daok ngak di Naples. Rilo urang dalam nan  hu pambuak tal kapol nyaom Camorra saong ngak suan hukum duah jien laba labaih 100 trieu euro yaok thun.