Mban Khik ramik jalan pasei đô thị TP.HCM brei thau, tui kuhria, tal bilan 10 anak tal, rahra meda hu pandar jalan Metro ka 1 (Bến Thành – Suối Tiên). Urak ini Metro ka 1 hu ngak salah 98% dom bruk di nyu saong ngak hu blaoh bruk padang ngak. Min, piah ba Metro ka 1 tame peih nduac pajeng tuai, TPHCM daok peih ngak 6 nyaom bruk ngak lac: ngak dom tatua nao takai rah tui jalan Xa lộ Hà Nội saong baoh sang cty  tacei jalan; pato pakai ka 400 urang ngak peih nduac radaih pui; bruk ba tame nduac iek; taong yaom salamat jamraik, dom harak gar adat hukum piah ba labik jalan ka 1 tame pandar.

Tỉnh Bình Phước urak ini hu jaik 281 rabau uranaih. Tukvak tapa, bruk khik caga, iek glang saong pato pakai uranaih hu sangka peih ngak hu siam lagaih, dom quyền di uranaih hu khik kajap saong ginup abih. Yaom lac yau nan, min bruk uranaih njauk taong paoh, rapeik rapai, metai kayua bala, njauk rambus, abih di nyu lac mblung ia jeng daok rah tabiak rilo. Meng thun 2022 tal bilan 3/2024, dalam tỉnh hu 49 uranaih matai kayua mblung ia, 135 uranaih njauk kateik greik, rapeik rapai. Dom bruk rapeik rapai uraniah dak harei dak srau kadau, rah tabiak di rilo umo thun saong tui rilo jalan karei di gauk.

UBND tỉnh Tiền Giang hu jalan ngak lac mek ia mbak meng kraong Tiền tame bhum “ia taba pak Gò Công”. Tui ong Đỗ Thành Sơn, Phó yam ndok Công ty TNHH Một thành viên peih ngak danak dak kraong ribaong Tiền Giang, bruk mek ia hu độ mbak tame ribaong Xuân Hòa piah trun manieng nhiet do kayua langik pandiak, gam tui di nan jeng patakik bruk njom ia lakhun, mbak dalam taneh tamuh tabiak saong mbak di gah langiu kraong mbang tame bhum labik padang ngak danak dak ngak kan kandah tal chat luong ia pabak ka bruk ngak mbang, pala drak di rahra. Langiu di nan, mek ia tame ribaong Xuân Hòa piah patakik di abih bruk glut jaleih kraong, ribaong meda rahtabiak tuk  ia dak harei dak thu lagu.

Meng akaok thun tal ini, tỉnh Cà Mau hu 242 bruk ngak suan gah taong cap kaya ikan, rilo meng lac bruk pandar xung điện cap mek kaya ikan, taong phạt jaik 860 triệu đồng. Tỉnh Cà Mau hu angan lac labik hu rilo kaya ikan haong biak rilo janih. Min dom thun jaik ini, kayua urang taong cap tui jalan cap mek abih nan ye kaya ikan di tỉnh trun daok biak takik.

Harei pataom ahar meng kan Nam Bộ mbang ka XI ngan haong kadha “mbak carak pahe bingi gah maraong negar” meda hu peih tabiak meng harei 17 tal 21/4 (lac harei 9 tal harei 13/3 saka ia bulan) di quận Bình Thủy, TP. Cần Thơ. Harei pataom ini meda dui pachreiih hu labaih 100 urang ngak dalam taneh ia hu mbaok tame pakacah gauk saong parang iek dom janih ahar meng kan. Ini lac mbang piah pok mayaom dom bruk rik tame di dom urang ngak ahar meng kan, khik ramik ilamo meng kan ka rai hadei, piah khik ramik saong patagok dom yaom glaong ilamo pandap mbang meng kan.

Pandiak khang rilo harei tapa ngak ka jaik 4 rabau sang bac di grauk labik dalam negar Philippines brei ngak dom jalan bac ta-a karei piah khik prein yava di uraniah. Di ban ine Manila, dom sang bac hu salih tapa bac online, gru saong saih hu adat brei cuk khan ao tui hatai piah pacang pandiak. Rilo labik langik pandiak tal 43 độ C, jabat khí tượng Philippines hu panuac kakei bhap bini takik tabiak langiu jalan, brei menyum rilo ia, tuak muot saong cuk capha ao atah tuk tabiak langiu langik, plaih ngak dom bruk trak.

Gah Di cư dunya (IOM) brei thau, dalam bilan 3 meng blaoh, labaih 13.000 urang Haiti daok di cư suan adat hukum tapa dom taneh ia jaik taphia njauk mai gilai veik negar, yaom lac daok hu bruk sarau kadau di negar ini dak harei dak trak damak jang. Meng di puac bilan 2, dom kapul nyaom hu phao kraong hu peih dom mbang taong tame di grauk labik dalam taneh ia Haiti, ngak sarau kadau, ba tal bruk Thủ tướng negar ini padeih ngak. Liên hợp quốc hu parabha 12 triệu USD tame kadung jien daong samar drah ka Haiti.

Labaih 50 phòng khám di negar Anh daok ngak iek bruk dut iek darah piah mboh ruak Alzheimer saong dom ruak takik kanal hadar karei karei. Ini hu maong lac jalan daong chẩn đoán ruak ini samar jang saong tantu yau dom jalan quét não atau chọc dò tủy sống urak ini. Di thun 2022, ruak oh kanal hadar ngak brei 66.000 urang matai di negar Anh saong palei Wales, ini jeng lac makna ba tal metai dang akaok di negar Anh./.