Anak bruk rah tabiak srau kadau di ruak tangin takai cambuai di uraniah, Mintri Y tế hu harak samar drah payua Sở y tế dom tỉnh, ban saong dom sang iek ruak dalam taneh ia brei samar pasang iek, taong yaom ka menuac ngak, labik iek ruak, jru tavao, pandap iek ruak di dom labik taong ruak piah caga taduan saong iek ruak, taong ruak ka urang ruak tangin takai cambuai, samar mboh, peih bruk iek ruak saong samar drah ba tagok sang iek ruak praong dom urang ruak trak. Kuhria tal urak ini, dalam taneh ia hu jaik 9.000 urang njauk ruak tangin takai cambuai, dalam nan hu 3 urang metai di Đắk Lắk, Kiên Giang saong Long An.

Tui kuhria, thun bac 2023-2024, Bình Dương hu rilo jang meng  27.000-29.000 anek saih dom pakat. Piah plaih bruk jaih anek saih tame rilo kayua kurang bilik bac, Bình Dương daok jhul samar bruk ngak pasiam veik, padang ngak veik 15 sang bac, patagok dom baoh sang bac di dalam tinh lac 732 sang bac. Urang pan akaok tinh tuk halei jeng brei pabak dahlau mblang taneh, phun jien piah padang ngak veik sang bac min jeng ka oh pabak hu bruk patagok di rahra. Kayua yau nan ye, dom anek saih  dalam tal bac di dom labik hu rilo urang ngak tame daok, nyu rilo jang dut saong bruk ba tabiak di Mintri pato magru.

Pasak peih bruk Đầu tư, Pablei salih saong Du lịch tỉnh Bình Phước, UBND xã Nghĩa Bình, huyện Bù Đăng pambuak bruk haong Kapul y, bác sỹ di  Kapul ngak pahla baha Tường Nguyên (Quận 4, TPHCM) bahrau peih ngak danak dak tacei pato, iek ruak, brei jru, alin hadiah pandap brei ka 1.000 mbang urang kan kathaot, sang kan kandah daok di xã Nghĩa Bình. Tapa danak dak ini piah samar mboh dom urang njauk ruak, samar iek glang, taong ruak, trun biar di abih bruk metai lahik, rik daong paglaong raidiuk di urang kan kathaot, sang urang bangsa takik.

Bến Tre hu mblang taneh pala phun li-u praong abih di dalam taneh ia, praong 78 ribau ha, brei baoh labaih 800 triệu baoh yaok thun. Jaik di ini, bruk ngak mbang pablei salih di dom doanh nghiep ngak li-u gaok rilo kan kandah. Anak bruk ini, urang pan akaok tỉnh Bến Tre hu taom gaok tapak urang lambaok negar Trung Quốc di Việt Nam piah taoh talaih dom kan kandah dalam bruk pabak mã số bhum pala saong labik tame paok piah pablei tabiak negar langiu baoh li-u. dom gah chức năng di tỉnh jeng patagok bruk pablei salih tame dom taneh ia Islam... Min kayua pandap daok kadaong biak rilo, nan ye rilo doanh nghiep daok caong hu daong brei mesraiy phun jien yaom laba lap.

Pambuak tal bruk sa baoh sang hu 3 urang di Tây Ninh mbang njauk bimao hu jru mek di harei 4/6 meng blaoh, tal harei ini, hu veik 1 urang metai. Tui panuac khan di Sang iek ruak Chợ Rẫy, sang 3 urang njauk jru mek hu ba tame Khoa ruak nhiệt đới taong ruak dalam tuk suy gan cấp, men gan tagok biak glaong gam haong srau kadau bruk khal darah. Dalam nan, 2 diuk pasang daok dalam trak damak, mbuan metai. Hadei di nan, urang pasang metai di khoa cấp cứu. Daok urang diuk jeng ruak biak trak damak, yaom lac hu sang iek ruak kham merat taong ruak, halang darah, min hadei di 3 harei taong ruak, oh siam hu hagait, urang ruak hu gauk gar likau ba nao sang saong metai di sang. Urak ini prein yava di urang anek kumei umo 17 thun mboh hu siam veik, daok hu tui iek, taong ruak.

Pahadar harei negar Nga (12/6), Tổng thống Vladimir Putin hu pamadeih tagok hatai hadah mbaok mata bangsa di rahra Nga dalam tuk taneh ia daok gaok rilo kan kandah. Dalam kadha pathau khan di mangaok rayo papar binguk, Tổng thống  Nga ndom lac: urak ini lac tukvak oh mbuan haong negar Nga min meng hatai ini, nyu ngak brei bruk jumpataom di kol drei khang jang tuk halei karei. Hatai anit ranam taneh ia saong hatai anit ranam palei negar hu pato veik ka dom rai nao dahlau, dom urang mek hu jayah praong dalam bruk ngak saong dalam mesuh metak.

Meng 80% mbaok taneh lac cuah, sa mạc, pandiak biak khang saong dalam tuk đô thị hóa samar, dom Tiểu vương quốc A-rập Thống nhất (UAE) daok kham merat pasiam veik saong pala bahrau glai dauk ia mbăk tapen tasik piah pacang biến đổi khí hậu. UAE daok kuhria pala pabak 100 triệu phun di thun 2030. Brei thau ka yaom glaong di bruk pasiam veik saong pala bahrau glai dauk ia mbăk tapen tasik piah pacang biến đổi khí hậu, rilo urang ilamu khoa học ndom lac, bruk ini brei mboh ka hatai caong tal siam mekre, labik kol drei hu mboh sa hệ sinh thái glai dauk ia mbăk daok tamuh siam, meng bruk ba tangin tame di anek menuac di dom labik ini.

27 taneh ia dalam Liên minh châu Âu (EU) bahrau brei tapa hukum pakauk blei tame EU dom pandap hu pambuak tal bruk jah tak glai. Ini hu maong lac bruk ka oh bhian mboh meng dahlau mai, piah pacang caga bruk jah tak glai suan adat hukum piah mek kayau. Gam tui di nan jeng pacang caga bruk yah klaak glai piah hu taneh pala drak atau raong glang. Bruk ngak ini brei mboh bruk ngak biak khang kadang jang, pamaong tal jalan ngak cak rok patagok kinh te hijao di châu Âu. EU hu brei thau lac mayah oh hu adat bahrau, yaok thun meda hu 248 ribau ha glai njauk kaoh tayah, samu haong mblang taneh di Luxembourg./.