Akaok QH Vuong Dinh Hue hu puac ndom lac pak di mbang nyaom

Patui mbang nyaom ka 13, page ini, UBTVQH pataom iek veik mbang nyaom ka 3 saong brei panuac tuk camereip ka bruk kuhria caga Mbang nyaom ka 4, QH mbang 15 saong brei panuac ka harak pasang iek bruk padang ngak jalan Trường Sơn Đông. Di mbang peih pakak UBTVQH di page KABROI, Akok QH Vương Đình Huệ ndom lac, bruk pataom iek veik mbang nyaom ka 3 piah taong yaom bruk ngak hu, dom kan kandah meng langiu, dalam bruk ngak, dom asar kadha birau piah patui ngak ka nyu salah Danak dak salih birau paglong asar bruk ngak mbang nyaom di QH.  

Anak bruk mbuan tamuh jit ruak pandiak tabiak darah di rilo labik, Mintri Y tế hu harak samar drah payua tal dom tinh, ban ka bruk pâtgok pacang caga jit ruak. Tal tukvak urak ini, dalam taneh ia hu labaih 103.000 urang ruak pandiak tabiak darah, 37 urang metai. 10 tinh, ban hu urang ruak rilo lac ban raya Hồ Chí Minh, Bình Dương, Đồng Nai, Long An, Tây Ninh, Bà Rịa - Vũng tàu, Đồng Tháp, Đà Nẵng, Quảng Nam saong Cần Thơ. Dalam nan ban raya Hồ Chí Minh saong Bình Dương hu urang njauk ruak saong metai rilo abih lac 19 urang.

Di Sang ndih tapui - Uranaih Trà Vinh, dom y, bác sĩ Sang iek ruak Đại học Y Dược Ban raya HCM birau peih bruk dut iek ruak tim oh mek jien ka 400 uranaih, hu mboh 16 urang ruak njauk blaic raih. Dom uranaih hu tacei brei blaic raic hu Tập đoàn Công nghiệp Viễn thông Quân đội Viettel di Trà Vinh tacei pato baoh sang ngak harak piah ba tame Sang iek ruak Đại học Y Dược Ban raya HCM taong ruak oh abih jien. Ini lac mbang ka 2, Danak dak “ Baoh hatai ka adei” hu nao tal dom uranaih sang kan kathaot, jaik kathaot di tỉnh Trà Vinh.

Kayua bruk pablei tabiak negar langiu gaok kan kandah nan ye baoh li-u thu di ĐBSCL laik yaom khang, urak ini daok mangaok mala 2 ribau dong 1 baoh. Kayua ka oh pablei hu, nan ye po bein pataom baoh li-u yau ceik. Dalam tuk nan, baoh li-u that yau ye li-u Xiêm hijao, li-u Mã lai hu yaom glaong labaih 6 ribau daong sa baoh. Anak bruk baoh li-u laik yaom, gam haong yaom khak drak tagok glaong, nan ye rilo sang bein tak klaak bein phun oh hu laba piah salih tapa pala phun li-u mek ia. .

Dalam dua harei tapa, dom bhum palei di tỉnh Kiên Giang hu hajan praong gam saong hangin khang ngak brei 1 urang njauk rambuac, jaleih 12 baoh sang, par  tabung 36 baoh sang, 30 ha padai bilan he thu di huyen U Minh Thượng jaleih. Hajan praong hangin khang ngak karam gaiy vah jantak saong khut 1 bè raong ikan di huyen Kiên Lương, ngak karam 4 gilai taong ikan, jaleih sa baoh sang, par tabung 7 baoh sang di huyen kaoh pulao Kiên Hải. Kuhria khat lahik taong abih jiak 3 tỷ đồng. Mban tacei jalan Pacang caga bala, duah daong urang gaok bala dom bhum palei samar nao tal labik daong dom baoh sang khut ramik veik pasiam, puh ramik haci hacih saong tani tanat raidiuk.

Tổng thống Nga Vladimir Putin hu mbaoh tangin tame sarak piah ngak brei mbuan jang dom adat likau tame quốc tịch Nga ngan haong taong abih rahra Ukraine. Ini lac sa bruk salih karei praong dalam sarak nhập cư di Moskva, kayua dahlau di nan, bruk pambuan harak gar likau tame quốc tịch Nga tok hu pandar ka rahra daok di 2 bhum Donetsk saong Luhansk. Hadei di tuk Nga peih bruk quân sự đặc biệt di Ukraine, dom urang Ukraine nduac tabiak negar langiu yam tapa labaih 6 triệu urang, ngak ka pak ini jeng sa bruk khủng hoảng urang “di cư” trak damak abih di châu Âu kuhria meng hadei di Mbang mesuh dunya ka 2.

Tổng thư ký Liên hợp quốc Antonio Guterres hu panuac eiw dom gah ndem meyai piah “ khik kajap tuk vak jao brei rajaei hu siam lagaih saong duah tabiak dom jalan ka bruk khủng hoảng kinh tế biak trak damak di Sri Lanka”. Tổng thư ký hu panuac lên án dom bruk taong paoh saong iew dom gah pambak tal brei taduan bruk ngak di drei. Sri Lanka daok yam tapa rilo bilan kurang pandap mbang, xang menyek , lahik điện suai lavik saong lạm phát  tagok glong, hadei di tuk abih jien negar langiu oh blei tame hu dom pandap pandar yaok harei, ba tal bruk khủng hoảng jien padai oh ka bhian mboh di taneh ia kaoh pulao ini.

Japon daok dang anak mbang tamuh jit ka 7 di jit ruak COVID-19. Dalam harei 11/7, taneh ia ini hu 37.143 urang njak ruak bahrau, tagok 120% dut saong 7 harei dahlau di nan. Biến thể phụ BA.5 di Omicron meda njom mbak samar drah, hu brei thau lac makna ngak ka jit ruak tamuh gilac veik di Nhật Bản. Meng akaok mbang tamuh jit ruak tal urak ini, Nhật Bản hu jaik 9,7 triệu urang njauk ruak COVID-19, dalam nan hu labaih 31.400 urang metai./.

Urang lang : Ái Nghiêm _ Thu Thảo -12/7