Dalam nan TPHCM lac labik hu manuac ruak pandiak tabiak darah tagok biak glaong

Tui Mintri Y tế, meng akaok thun tal ini, dalam negar hu jaik 250.000 urang njauk ruak pandiak tabiak darah saong hu 100 urang metai. Dut saong thun dahlau, dom urang ruak pandiak tabiak darah tagok 4,7 mbang, metai 80 urang. Dalam nan TPHCM lac labik hu manuac ruak pandiak tabiak darah tagok biak glaong, hu tal 75% dom urang metai lac urang praong thun. 

Sở Pato megru Cà Mau hu panuac ieu Jabat pato megru huyện Thới Bình, tacei pato Hiệu trưởng Sang bac Tiểu học Tân Lợi bayar veik taong abih jien bo sang bac jak ba di amaik ame anek saih rik tame dom janih langiu bruk rik jien ka thun bac bahrau. Tui bruk ngak suan di yaok kapul nyaom, yaok menuac urang bo pasang iek, langyah tui thẩm quyền saong pathau khan bruk langyah samar abih ka UBND tỉnh Cà Mau thau. Dahlau di nan, rilo amaik ame di anek saih sang bac Tiểu học Tân Lợi brei thau ka bruk sang bac ini ieu pataom jien blei 18 jamriak la-an saong 26 baoh ti vi.

Công an tỉnh Bình Phước hu taong tayah 10 tapon brei masaiy mek laba glaong, laba meng 365% sa thun tal 1.460% sa thun. Dom urang ini hu brei ka 584 urang masaiy jaik 9 ty 4 rituh trieu dong, jien mek tame meng bruk brei masaiy laba glaong ini lac labaih 3 ty 2 rituh trieu dong. Tuk brei masaiy, dom urang ini bhian khik veik harak căn cước công dân, harak adat peih radaih, hộ khẩu, harak tut angan tok gauk. Urang masaiy mayah oh hu jien bayar jien jung, jien phun atau suai bayar meda njauk dom urang ini ieu phone ngak jhak, mai tal sang atau labik ngak bruk di urang masaiy ngak sarau kadhau, mek taong paoh piah ndok saiy.

Hadei di tuk TP.HCM peih bruk ba dom radaih di mblang radaih Miền Đông klak di quận Bình Thạnh mai mblang radaih miền Đông bahrau di TP.Thủ Đức, jalan Đinh Bộ Lĩnh haong jalan roya 13 tabiak truh bruk gar jalan. Rah tui jalan meng canah 4 Hàng Xanh tal tatua Bình Triệu oh daok gar jalan dui atah. Labik gah anak mblang radaih miền Đông klak hu laneing lanai jang. Urak ini gah Cảnh sát Giao thông Hàng Xanh daok pasang iek, langyah dom radaih pajeng tuai nao suan jalan, pataok padeih brei tuai trun, tagok oh njauk quy định di dom jalan tame mblang radaih Miền Đông.

Dalam harei ka 5 di mbang ia ndik akaok bilan 9 saka ia bulan, ia di Cần Thơ tagok glaong di abih kuhria meng dahlau mai di melam 12/10 ngan haong tanut lac 2,27m, glaong jang tanut báo động 3 lac 0,27. Dalam dom harei anak tal, ia trun min jeng daok di tanut glaong. Piah pacang caga haong mbang ia ndik glaong abih ini, gah chức năng di Cần Thơ hu patagok bruk daong ka dom ouk palei pacang caga ia dauk đô thị saong pacang caga bruk glut jaleih ar pacang, khik caga bein phun mbang baoh, njam patam, labik raong kaya ikan dalam ban.

Hadei di mbang nyaom oh chính thức harei 12/10 di dom akaok mintri Năng lượng dom taneh ia EU di Séc, dom akaok mintri hu njauk gauk ka bruk meda blei khí đốt haong gauk dahlau di bilan pandiak thun 2023 saong patagok jum pataom haong patak pataom năng lượng. Dom akaok Mintri jeng njauk gauk ka bruk brei pacang cakak dom pagam pambak di yaom khí đốt tal yaom điện. Dalam sa panuac ba tabiak hu pambuak tal, Ủy viên năng lượng châu Âu ndom lac, bruk ngak nan piah patrun rilo jang bruk pandar khí đốt, saong bruk blei khí đốt hong gauk lac bruk njauk ngak piah ka dom taneh ia oh meriak gauk.

Salih ka bruk tagok yaom jien laba, Prang brei pandar kadung jien rajaei piah daong ka bhap bini pacang caga haong bruk lạm phát daok tagok glaong. Urak ini, dunya daok maong mboh cambaih dom kan kandah di bruk lạm phát dalam dom thun tapa, abih di nyu nan lac di Mỹ. Jabat yaok pataom negar Prang brei thau, bruk lạm phát yaok thun trun daok 6,2% di bilan 9 meng blaoh. Bruk ini nyu cagar veik haong tanut kuhria mboh dahlau bo dom urang gah kinh tế học ba tabiak lac meda tagok hasit, lac 6,7%.

Dom urang jakar ngak praong gah y tế Indonesia meda brei duah thau bruk yaok pluh uraniah metai kayua ruak thận cấp tính di ban ine Jakarta kuhria meng akaok thun tal ini. Indonesia brei pambuak bruk haong dom urang điều tra di Gah Y tế Dunya (WHO) hadei di tuk urang duah mboh dom hàm lượng biak glaong meda ba tal jru mek, dalam 4 janih si-rô kayua 1 hãng jru Ấn Độ ngak tabiak. Negar Cộng hòa Gambia jeng daok pasang iek, duah thau bruk 70 uraniah metai, medil lac kayua menyum jru siro patuk saong su la-an blei meng Ấn Độ./.

Urang lang: Thu Thao & M. Phuong – 13/10