Bruk peih ngak dom danak dak hu makna praong di taneh ia, bruk ngak pasak di gah Jalan mbak pajeng ba, Thủ tướng Rajaei ieu kakei Tổng công ty Buh jien tame cak rok patagok jalan nduac samar Việt Nam (VEC) ieu pataom phun jien piah peih praong jalan nduac samar drah TP.HCM - Long Thành - Dầu Giây. Ủy ban Khik ramik phun jien Kanja di doanh nghiệp hu jao tacei pato VEC ieu pataom phun jien piah samar drah peih ngak dom jalan peih praong jalan nduac samar ini. Tui quy hoạch gah jalan mbak tukvak 2021 - 2030, pamaong tal thun 2050, jalan nduac samar TP.HCM - Long Thành - Dầu Giây hu ngak praong 10 jalan radaih. Urak ini, tukvak ka 1 di danak dak ngan haong 4 jalan radaih hu ba tame pandar meng thun 2016. Meng tuk ba tame pandar tal urak ini, jalan ini bhian laik tame bruk gar jalan biak trak damak.

Tui Mintri Y tế, tal urak ini, dalam taneh ia hu labaih 91 triệu menuac blei bảo hiểm y tế (BHYT), samu labaih 91% meuac sia dalam taneh ia. Bruk iek ruak, taong ruak BHYT di labik y tế cơ sở jeng tagok rilo, labaih 80% bilai y tế xã peih bruk iek ruak, taong ruak BHYT. Bruk iek ruak, taong ruak BHYT dak harei dak siam jang, rahra hu iek ruak, taong ruak meng dom ilamu kỹ thuật y tế bahrau, rilo jru bahrau, siam lagaih rilo dalam taong ruak. Min dalam tuk peih ngak hukum BHYT daok hu dom tavak tavaiy kayua dom quy định di harak adat saong dom kadha   bahrau tamuh tabiak. Abih di nyu lac dom bruk ka sarak jien padai oh ka ngak jeng prein pachreih, oh ka hu sarak karei ka bruk patagok di y tế cơ sở.      

Meng mblang taneh pala phun thanh long praong labaih 27.000 ha gam haong sản lượng mek hu labaih 600.000 tấn yaok thun, Bình Thuận hu maong lac pasak pala thanh long di dalam taneh ia. Min, dom thun jaik di ini bruk pala saong duah jalan pablei thanh long daok gaok rilo kan kandah, kurang bruk khang kajap. Piah ba thanh long cak rok patagok, Liên minh Hợp tác xã tỉnh Bình Thuận peih ngak rilo jalan ngak iek “padang ngak hệ sinh thái bruk ngak saong duah jalan pablei tabiak khang kajap baoh thanh long Bình Thuận”. Ngan haong hệ sinh thái ini, mikva meda ngak tui tanut chuan njauk ngak piah ka baoh thanh long oh lac mek hu tanut chuan pablei tabiak dom darak pasa kan tame bo daok pabak hu rilo darak pasa daok hu kein lagaih.

Huyện Ninh Hải tỉnh Ninh Thuận daok pataom tame ngak samu gauk dom jalan ngak brei paglaong chất lượng pandap, patagok parilo pandap OCOP. Tui jalan ngak lac tal thun 2025, huyện hu labaih 30 pandap OCOP meng 3 patuk tagok. Piah ngak hu bruk ba tabiak, huyện sangka daong dom kapul nyaom, dom doanh nghiệp, HTX, menuac urang ngak pandap pataom tame danak dak OCOP meng dom jalan ngak cambaih laih. Urak ini, Ninh Hải hu 26 pandap hu pok brei angan OCOP,  rik daong tame bruk jhuk patagok KTXH di tỉnh.

Di TP.HCM hu 32 labik glut jaleih takai kraong, ribaong biak khang saong biak mbuan ba tal metai lahik. Bahrau ini, 13 baoh sang daok di quận Bình Thạnh njauk ba nao daok di labik karei samar drah kayua labik glut jaleih biak trak damak. Min, urak ini, bahrau hu 23 labik hu jalan buh jien tame padang ngak danak dak pacang caga glut jaleih. Kayua yau nan ye, UBND TP.HCM jao ka Sở Jalan mbak pajeng ba samar drah peih bruk ngak harak gar pathau khan likau jalan buh jien tame padang ngak ar pacang caga glut jaleih takai kraong Đồng Nai, kraong Cần Giuộc. Daok dom danak dak daok hu buh jien tame ngak ar pacang glut jaleih, dom kapul samar drah padang ngak ka nyu salah piah khik caga salamat anek manuac saong drap ar di rahra.

Chánh Văn phòng Rajaei Japon hu panuac ieu Triều Tiên ngak piah samar peih sa nyaom biai pakat glaong di abih piah langyah bruk rahra Japon njauk cap mek dahlau daih. Gam haong nan brei thau lac, Thủ tướng Japon Fumio Kishida halan hatian ginum biai haong urang pan akaok Triều Tiên lac Kim Jong Un. Dalam harak dom angan ba tabiak, Japon brei thau 17 rahra taneh ia ini njauk Triều Tiên cap mek dalam dom thun 70 saong 80 di abap dahlau, dalam nan hu 5 urang hu mai veik palei negar di thun 2002. Min Bình Nhưỡng ndom lac, dalam dom urang nan, 8 urang metai blaoh saong 4 urang daok veik oh ka mbang halei mai tal Triều Tiên.

Meng harei 5/7 anak tal, Malaysia meda yah klaak adat pandar cuk pataik pacang mbaok di dom sang iek ruak saong dom sruh radaih nduac di jalan mbak hu rilo manuac. Mintri y te brei thau lac, tok  dom urang njauk ruak COVID-19 saong dom urang y te gah taong ruak ka urang ruak COVID-19 meng njauk cuk pataik pacang mbaok di dom labik y tế. Langiu di nan, tukvak brei daok karei ngan haong dom urang dut iek mboh dương tính haong virus SARS-CoV-2 meda trun, meng 7 harei trun daok 5 harei meng di tuk njauk ruak.

Di Mexico, takik di abih 100 urang metai dalam 2 adit blaoh kayua pandiak bhang, tuk nhiệt độ tagok tal jaik 50 độ C (lac 122 độ F) di rilo labik dalam taneh ia. Tui pathau khan di Mintri Y tế Mexico, mbang pandiak bhang dui atah dalam 3 adit blaoh, ngak ka bruk caong pandar năng lượng tagok glaong di abih oh ka bhian mboh, ba tal bruk karja di dom labik brei padeih saong jeng ngak ka rahra taneh ia ini kan suak yava. Jaik abih dom urang metai jeng kayua mebuk pandiak, hu dom urang kayua lahik ia./.