Dom uraniah umo meng 12 tal mala 17 thun hu klauk bloh 2 mbang lac 99,8%

Biar harei 2/8, di Cần Thơ, Jabat rami ramik bruk ngak nong palei pala bhum taneran kraong CL haong Tổng Lãnh sự Australia di TP. HCM peih bruk taom gaok, ndom biai nao mai haong dom doanh nghiệp ngak nong pablei tabiak negar langiu dom kaya nong, kaya ikan, athur raong di Việt Nam haong Australia.  Tui taong yaom, yaok thun Việt Nam hu jaik 10 triệu tấn baoh kayau dom janih, meng sản lượng rilo saong hu rilo janih baoh kayau yau urak ini, daok hu rilo prein khang piah pablei tapa dom darak pasar mangaok dunya. Ngan saong bhum taneran kraong CL, rilo janih baoh kayau bingi yau pa-ok cuah Hòa Lộc, Cát chu, durian, kruac bhung, meniah saong patei daok pablei nao rilo darak pasar saong dom janih baoh kayau ini jeng hu rilo prein khang piah tame darak pasar Australia.

Tui Mintri Y tế, urak ini, Bến Tre daok dalam top dom tỉnh, thành dalam taneh ia hu bruk klauk vaccine mbang 3, mbang 4 glaong di abih. Tal tukvak ini, dalam tỉnh hu labaih 908 rabau urang umo mangaok 18 thun hu klauk vaccine mbang ka 3, samu 95,6% dom menuac sia, labaih 170 rabau urang hu klauk mbang ka 4, samu 52% dom menuac njauk klauk vaccine. Daok uraniah umo meng 5 tal mala 12 thun, hu 115 rabau uraniah hu klauk jru bloh, dalam nan hu labaih 90% uraniah hu klauk bloh mbang ka 1, 61% uraniah hu klauk mbang ka 2. Dom uraniah umo meng 12 tal mala 17 thun hu klauk bloh 2 mbang lac 99,8%.

Di tuk pahadar 25 thun harei palang lahik di Giáo sư- Viện sĩ Trần Đại Nghĩa (9/8/1997- 9/8/2022), dom urang pan akaok Tỉnh ủy- HĐ bhap bini - UB bhap bini – UBMT negar VN tỉnh Vĩnh Long hu mai pok bingu, cuh gilau, pahadar di labik lưu niệm Giáo sư- Viện sĩ Trần Đại Nghĩa di xã Tường Lộc, huyện Tam Bình.  Giáo sư- Viện sĩ Trần Đại Nghĩa lac sa dalam dom urang anek gheih ghang di palei Vĩnh Long. Dalam mesruh metak kayua bruk praong, kayua  bruk cách mạng Việt Nam, ong klaak dom quyền lợi di drei, tui Wa Hồ ngak cách mạng. Dom sahneng duah, salih bharau gah phao ndao di Giáo sư- Viện sĩ Trần Đại Nghĩa hu daong ka cách mạng Việt Nam meblah hu jayah dalam bruk mesruh peih paha bangsa, yasa taneh ia.

Mesup ini (3/8), gah chức năng hu langyah salah bruk ginuh gauk di 9 radaih ô tô mangaok jalan cao tốc TP.HCM – Long Thành – Dầu Giây, ngak brei 7 urang njauk rambus, rah tabiak di tukvak 7 tuk 45 minit melam 2/8, di labik tapa dốc tatua Long Thành, gah Đồng Nai mai TP.HCM. Tui camera di sa radaih brei mboh lac, tuk trun dốc tatua Long Thành, sa sruh radaih ô tô tải nduac samar tagok, ginuh tame dom radaih daok peih di gah anak. Bruk nan ngak brei radaih ô tô tải nan, haong 8 sruh radaih karei daok nduac di gah anak khut, mbaih mbaoh. Dalam nan hu 1 sruh radaih ô tô sit khut biak trak.  7 urang njauk rambus, hu ba nao cấp cứu. Dalam nan hu 4 urang njauk rambus trak.

Mesup 2/8, Khoa Cấp cứu – Sang iek ruak 199 (Mintri Công an) daok di Đà Nẵng hu taduan raok 24 urang njauk jru mek pandap mbang, dalam nan hu 2 adei sit. Hu thau, dom urang njauk jru mek nan meng Hà Nội mai ravang me-in Đà Nẵng tui kapul jaik 100 urang. Tuk tame sang iek ruak, dom urang ruak mboh pandik tian, taglaoh ta-ok … hu dom bác sĩ khám, pasang iek saong brei tame ia jru, daong pabak men tiêu hoá. Tal biar harei sup kabroi, dom urang nan mboh prein yava hu tani tanat, oh daok mboh hagait trak. Hu 5 urang prein yava siam veik hu tabiak truh sang iek ruak, daok veik 19 urang daok hu tui iek prein yava di sang iek ruak.

Ngan saong kadha "Patagok kinh tế tui jalan khang kajap", nhà báo Gerhard Feldbauer hu kadha vak mangaok báo Thế giới trẻ  di Đức harei 2/8, taong yaom bruk tagok khang di Việt Nam dalam 2 thun jit praong COVID-19, dalam tuk jien meng negar langiu buh tame ngak mbang jeng daok tagok khang. Kadha vak brei thau lac dalam tuk kinh tế dom taneh ia phương Tây daok mboh yau laik trun ye nền kinh tế Việt Nam patagok siam mekre. Kadha vak ba tabiak số liệu di Tổng cục Thống kê Việt Nam brei thau adit dahlau di nan, hu tal 85% dom doanh nghiệp hu tangi sua brei mboh hatai jia tame bruk siam mekre di quý III/2022, tok hu 15% brei mboh bruk duh hatai ka dom bilan anak tal.

Urang ngak praong pakat glaong di Cục pasang iek phao ndao haong oh phổ biến vũ khí hạt nhân di Mintri Ngoại giao Nga Alexander Trofimov bahrau hu panuac lac "bruk cagar veik Nga" di NATO mbuan tamuh tabiak sa bruk mesruh gauk praong. Panuac nan hu ong Trô-phi-mốp ba tabiak tuk biar harei kabroi (2/8) di nyaom biai taong yaom bruk oh phổ biến vũ khí hạt nhân di Liên Hợp Quốc rah tabiak di New York-Mỹ.

Urang jakar Chilê daok brei pasang iek, duah thau 1 lubang glut praong oh thau kayua halei hu jalan đường kính jaik 25 mét (lac 82 feet) hu mboh di puac adit dahlau di sa labik mblang hamu daok di gah brak taneh ia: Tapa duah thau tuk camereip, lubang glut dalam jaik 200 mét saong oh hu pandap hagait hu duah mboh di labik nan. Gah Địa chất saong Khai thác Negar Chilê jeng brei thau lac brei kreik pabah mbang dom labik meng jalan tame tal labik ngak bruk di mỏ Alcaparrosa – daok jaik labik lubang glut./.

Urang lang: Hani Pha & Thu Thao – 03/08