Dalam 3 harei peih bruk mek jien hu abih tih 4.654 doanh nghiệp hu mbaok tame tut angan ngan saong 10.704 tờ khai

Di mbang nyaom Rajaei bilan 3 peih tabiak page ini di jabat Rajaei, Thủ tướng Phạm Minh Chính brei thau, dom kapol nyaom dunya jeng patrun tanut patagok kinh tế dunya thun 2022 dut saong tanut kuhria dahlau di nan, bruk kinh tế dunya pasiam meda kan kandah jang, min kinh tế Viet Nam mboh hu siam veik, patagok GDP dalam quý 1 labaih 5%, lạm phát ala 2% yaom lac bruk lạm phát dalam saong langiu negar kateik tagok biak trak. Min, bruk kinh tế - xã hội daok hu dom tavak tavaiy brei langyah, taong yaom piah hu jalan pasiam, yau bruk peih jien đầu tư công daok suai damuai; dom danak dak pasiam veik oh ka hu peih ngak njauk tukvak ba tabiak; darak pasar chứng khoán, taneh riya daok mbuan hu khat lahik; bruk pandap panda di labik taphia negar oh ka hu langyah tal labik tal dhua, raiidiuk bhap bini di bhum atah bayah daok kan kandah; bruk klauk jru vaccine mbang ka 3 yaom lac kham merat rilo min oh ka yau hatai caong khin…kayua yau nan ye, Thủ tướng caong khin mbang nyaom brei langyah, taong yaom dalam jang dom bruk ngak hu, dom bruk oh ka ngak hu, langyah tani tanta dom makna ba tal, abih di nyu lac makna oh kayua hatai; rik daong tame ka dom bruk, jalan ngak hu makna praong dalam tukvak anak tal…

Tui sarak 10 hu HĐND TP.HCM patabiak, meng tuk tame harei 1/4, TP.HCM hu peih bruk mek jien pandar danak dak kết cấu hạ tầng, danak dak dịch vụ tiện ích dalam labik pabah lamnge tasik di ban raya. Tui Cảng vụ jalan krong ribong dalam ban raya .HCM, dalam 3 harei peih bruk mek jien hu abih tih 4.654 doanh nghiệp hu mbaok tame tut angan ngan saong 10.704 tờ khai. Abih tih yaom jien pataom mek lac labaih 13,590 tỉ đồng, min, ban raya bahrau pataom mek hu labaih 7,4 tỉ đồng.

Mban tacei jalan pacang caga bala meng langik tasik saong daong duah urang gaok bala tỉnh Tiền Giang birau pok panuac tagok UB bhap bini tỉnh brei yah klaak binek thép pacang ia mbak khik ia taba di ribong Nguyễn Tấn Thành pak di huyện Châu Thành meng harei 8/4 anak tal. Binek thép pacang ia mbak hu padang ngak meng akok thun 2021 piah pacang ia mbak, khik ia taba. Min thun ini ia mbak njom tame oh trak nan ye binek dã chiến ini nga bruk oh lagaih, palai pajua jien padai buh tame biak ralo, dalam tuk nan ia gah dalam kandong veik ngak gar jalan kraong ia meng kraong Tiền tame ribong Nguyễn Tấn Thành.

Tui mintri ilamu , Thể thao song à Du lịch, pachreih tui bruk pok meyaom harei ilamu dom bangsa Việt Nam (19/4), meng harei 1/4 - 3/5 anak tal , di palei ilamu -Du lịch dom bangsa Việt Nam di Đồng Mô, Sơn Tây, Hà Nội, rah tabiak dom bruk hu angan “hadah tanyak sambo màu dom bangsa Việt Nam”. Abih di nyu nan lac, dalam tuk lễ 30/4-1/5 hu rah tabiak "drak pasa bhum glong -Sơn La labik sanya gauk" piah brei mboh veik drak pasa bhum glong mbak carak sambo màu ilamu di dom bangsa bhum ceik gah brak.

Bruk “ l ma-in jalan phố” Binh Duong New City birau hu tabiak mbaok di ban Thủ Dầu Một. Bruk ini hu Pasak daong dam dara ngak kong saong urang ngak dam dara tỉnh Bình Dương di Tỉnh đoàn Bình Dương pambuak saong Tổng công ty Becamex IDC peih ngak di puac yaok adit di Bein bingu ban birau Bình Dương saong anak tal meda brei peih ngak di ban sit Bến Cát. Langiu di bruk peih ngak pambak praong, asar kadha danak dak tuk halei jeng hu salih birau lagaih haong bruk sangka tal jalan sahaneng, hu labik ma-in sambai, chreih chrai brei ka urang ngak, ka bhap bini.

Javap jalei tangi sua di roya papar binguk CBS di Mỹ, Tổng thống Ukraine Zelensky brei thau, dom gah lambaok di Kiev song Moscow jiak mek hu dom thỏa thuận, dalam nan meda hu dom bruk yau oh hu hạt nhân, oh tame liên minh song quy chế trung lập. Min, akaok kapul ginum biai Nga brei thau, harak thỏa thuận di 2 gah oh ka hu ngak bloh piah pok tagok mbang taom gaok pakat glong", yaom lac Ukraine brei mboh cambaih jang ka bruk trung lập song oh hu hạt nhân.

Sa urang likei di ban raya Magdeburg, Đức njauk cáo buộc lac klauk 90 mbang jru vaccine Covid-19 piah mek harak gar saong pablei harak ini veik ka dom urang halei oh khin klauk jru. Urang likei nan ngak hu bruk nan dalam rilo bilan dahlau di tuk cảnh sát chap hu. Urak ini oh ka thau cambaic 90 mbang vaccine Covid-19, meng dom angan jru karei di gauk, hu hagait jhak tal prein yawa urang likei na ha-oh.

Urang pal akaok pakat glong di gah Taliban daok di Afghanistan hu tabiak adat pkauh pala phun jru phiel di negar ni. Dahlau di nan, thun 2000, karja Taliban hu tabiak adat brei pakauh dreih yau nan . Tui Jabat Liên hợp quốc ka bruk pacang caga jru phiel song tội phạm, Afghanistan meda lac dang akaok ka bruk ngak tabiak jru pheil song heroin, meblah meng 80-90% di dunya . Mblang taneh pala phun jru phiel di Afghanistan tagok glong abih di thun 2017./.

Urang lang: Hani Pha – Bhumi – 04/04