Page ini 23/8, UBND TPHCM peih bruk brei salih angan jalan Xa lộ Hà Nội, jalan meng tatua Sài Gòn tal canak pak Thủ Đức di Ban Thủ Đức jeng jalan angan Võ Nguyên Giáp. Bruk salih angan jalan nan hu HĐND TP mbang X brei tapa dalam mbang nyaom ka 10 di bilan 7 meng blaoh. Jalan nan atah 7.790 m, jalan peih radaih 113 - 154 met. Ini lac  sa dalam dom jalan praong, siam gheih abih di Ban raya. Pho akok UBND TPHCM Dương Anh Đức brei thau, bruk salih angan  jalan nan piah pok meyom bruk buh prein yawa tame ngak hu makna praong dalam di  Đại tướng Võ Nguyên Giáp ngan haong bruk mesruh metak peih paha bangsa, yasa taneh ia.  

Tui Sở Ilamu saong kong nghe tỉnh Bình Thuận, urak ini tinh ini hu taneh pala  thanh long praong abih taneh ia. Thun 2006, Bình Thuận lac tỉnh camereip abih hu Cục Sở hữu trí tuệ  pabak brei  (chỉ dẫn địa lý) ka baoh Thanh long Bình Thuận.  Langiu di hu pacang khik dalam taneh ia, Thanh long Bình Thuận daok hu pacang khik tui jalan chỉ dẫn địa lý di dom taneh ia dalam Liên minh châu Âu tui harak pambuak bruk pablei salih tự do di Việt Nam haong Liên minh châu Âu. Langiu di nan, nhãn hiệu “Bình Thuận Dragon Fruit” daok hu 14 taneh ia pacang khik.

Hạt Kiểm lâm Ban raya Biên Hòa, tỉnh Đồng Nai birau pambuak haong jabat chức năng pasang iek bruk rimong caik menek di Công ty TNHH Khu du lịch sinh thái Vườn Xoài. Gah chức năng hu mboh 7 drei rimong birau menek tabiak. Abih 7 drei rimong nan lac rimong Bengal. Ini lac pajaih rimong quý daok takik lac athur daok mbuan lahik abih saong hu angan dalam tapuk Bhong meriek IUCN. Kiểm lâm TP.Biên Hòa jeng iew D.N nan bhian tui iek, khik brei salamat, puk ramik hacih var ro. Meyah taphon rimong parilo atau trun takik njauk brei tavak tame  sổ tui iek saong khan brei Hạt Kiểm lâm piah pasang iek saong tui iek njauk bruk ba tabiak. Sở thú  di Labik dulit sinh thai Vườn Xoài urak ini hu 90 janih saong labaih 3.000 drei athur glai, quý daok takik.  

UBND ban Vũng Tàu, tỉnh Bà Rịa- Vũng Tàu brei thau, hadei di labaih 10 harei tabung glaong peih ngak bruk khik ramik trật tự đô thị bhum Bãi Sau, mbaok meta labik ini hu siam mekre tagok. Min jeng daok hu bruk pablei pandap hàng rong di mala takai tasik. Tui UBND ban Vũng Tàu, urang pablei hàng rong daok cang tapa mbang tabung glaong piah pablei veik. Nan ye ban daok brei peih ngak mbang ka 2 (meng ini tal bilan 10) pasang iek pacang cakak bruk ngak suan veik gah siam mekre salamat đô thị harei melam, pambuak haong pathau khan, jak ba bhap bini ngak tui, plaih bruk cagar veik. Daok dom menuac khin ngak suan, ban brei langyah catang, mek veik harak adat pablei salih, cap mek abih pandap pablei salih saong dom chế tài karei karei.

Harei samecar, adit saong tuk padeih le Tet, tatua Rạch Miễu( pambuak dua  tỉnh, Tiền Giang saong Bến Tre) bhian rah tabiak bruk gar jalan biak trak. Piah lang taleih bruk nan, jabat chuc nang di ini njauk gauk brei pakauk radaih tải praong meng 3 trục tagok oh brei tapa tatua  tuk tabung glong dua harei pauac adit. Kayua dom harei puac adit saong harei padeih le, Tet hu rilo radaih  tapa tatua Rạch Miễu ralo jang dom harei karei. Bruk nan kayua radaih tải praong pajeng trak tuk peih tagok tatua glong nduac suai yau nan ye radaih  gah likuh  brei nduac suai ba tal mbuan gar jalan.

Mesup ini (23/8), Nyaom biai akaok mintri Môi trường ASEAN mbang ka 17 hu peih tabiak di ban ine Vientiane, Lào. Nyaom biai kayua amuk Bounkham Vorachit, akaok mintri Tài nguyên & Môi trường Lào dang akaok. Brei panuac di tuk peih nyaom biai, amuk Bounkham Vorachit ndom tal yaom glaong di bruk khik caga môi trường, abih di nyu lac dom bruk pambuak tal biến đổi khí hậu, hóa chất saong chất thải, đa dạng sinh học, jhul patagok bruk pambuak gauk piah cakrok khang kajap saong siam ka môi trường. Nyaom biai mbang ini hu pataom tame pasang iek dom bruk pambuak gauk gah môi trường, ba tabiak jalan jhul patagok pambuak gauk gah môi trường jeng yau dom sahneng duah bahrau piah langyah dom bruk duh hatai ka môi trường dalam bhum.

Tui roh duah birau ini, ralo urang ranaih umo blei pandar di Đông Nam Á takre phone tangin gap mbiah jang dom baoh phone chit jien di dom hãng yau Samsung saong Apple. C.ty roh duah darak pasar  YouGov (Anh) hu duah thau bruk nan meng 2.500 urang blei pandar di nyaom GenZ (umo ndih tapui meng thun 1997 tal thun 2012) saong millennial (ndih tapui meng thun 1981 tal thun 1996) dalam umo meng 18 tal 40 thun di Indonesia, Malaysia, Philippines, Thái Lan saong Việt Nam. Labaih 3/4 urang hu tangi sua brei thau lac urang takre pandar phon gap mbiah. Tangi sua 8 dalam 10 urang mboh lac jia phone tangin yaom mbiah jang dut saong 5 thun dahlau kayua nan lac dom pandap gap mbiah kadung jien di drei, yaom mbiah min hu ginup bruk pandar di urang oh pandar dom tinh năng glong jang  veik.

Meng harei 24/8, Nhật Bản brei tathuak  tabiak tasik labaih 1 triệu tấn ia njaom phóng xạ hu tapa xử lý blaoh di sag mac hạt nhân Fukushima, lac bruk daok gaok chỉ trích khang di Trung Quốc. Jalan ngak ini hu rajaei Japon brei ngak dua thun dahlau, hu makna praong dalam bruk klaak sang mac điện hạt nhân kayua Cty Điện lực Tokyo (Tepco)  khik iek, peih ngak. Langiu dom taneh ia jaik taphia, dom kapul nyaom bruk ngak ikan  jeng hu panuac cagar veik kayua huac lac lahik gah angan je saong ngak kan kandah tal bruk ngak mbang duah jien di urang./.