Urang brei panuac di Mentri Ngoại giao Viet Nam brei thau, mbiah tal ini, bhap bini hu hộ chieu Viet Nam meda tame hu 55 taneh ia di dunya, oh cang likau thị thực atau brei ngak takik veik harak gal yau thị thực điển tử atau thị thực di pabah mbang negar. Tukvak tapa jeng yau anak tal, dalam dom mbang taom gaok hoang dom gah pambuak bruk, Viet Nam brei pasang iek mbuan mbiah harak gal brei thị thực atau oh ngak thị thực tame brei ka urang Viet Nam saong dom taneh ia pambuak tal, tapa nan ba mbuan lagaih ka bhap bini Viet Nam saong dom taneh ia ngak mbang pablei salih nao mai, rik tame jhul pakhang bruk cak rok patagok talei pambuak bruk di Viet Nam saong dom taneh ia

Tui Sở Y tế TP.HCM, jit ruak tangin takai cambuai mboh daok tagok, ba tal dom urang ruak trak jeng tagok tui di dom sang iek ruak. Kuhria meng akaok bilan 6 tal ini, hu tal 1774 urang ndih taong ruak dalam sang iek ruak. Gah Y tế kuhria mboh dahlau lac, dom urang njauk ruak saong dom menuac ruak trak daok tagok. Dalam nan, dom urang ruak tame sang iek ruak saong dom menuac ruak trak meng dom tỉnh ban karei ba mai TP.HCM lac labaih 80%. Makna ngak ka TP njauk taduan saong taong ruak ka rilo urang ruak meng dom tỉnh ban karei lac kayua biến chủng ba tal ruak tangin takai cambuai lac EV71 nan ye hu rilo urang ruak trak saong mbuan metai, gam haong nan, lac kayua takik hu dom janih jru taong ruak tangin takai cambuai di gah Meraong.

Dalam 5 thun tapa, dalam huyen Di Linh, tỉnh Lâm Đồng hu 22 danak dak hu bhap bini halan hatian kaoh taneh alin brei ngak jalan, taneh njauk lahik labaih 70ha, dom baoh sang halan hatian brei taneh tagok tal labaih 2.000 baoh sang. Kuhria tabiak yaom jien bhap bini rik daong tui yaom taneh dalam 5 thun tapa lac labaih 200 tỷ đồng. Bruk mikva kaoh brei taneh  piah peih ngak dom danak dak hu daong trun jien  buh tame ngak, jhul pasamar  bruk ngak brei salah  dom danak dak daong jhul patagok KT-XH bo daok brei mboh bruk njauk hatai di bhap bini ngan hoang dom jalan tacei ba, sarak di Đảng saong Karja.

Bạc Liêu urak ini hu 57/64 xã phường hu "Kalup kapul urang dahlau daih ngak bol lin pacang caga tội phạm". Hadei di labaih 7 thun ngak bruk, kalup kapul hu labaih 3.300 urang, tapa nan, rik daong paglaong hatai sahneng ka bruk ngak di drei, ngak brei urang dalam kapul saong rahra pachreih tui sarak padang ngak palei pala bahrau, khik sron mbon siam mekre puk palei. Gam haong nan, kalup kapul jeng hu jak ba dom urang dalam kapul saong bol bhap rahra rik prein yava, jien padai daong padang ngak, ramik pasiam 176 baoh sang, daong phun pajaih, anek pajaih, alin hadiah yaok rabau paok pandap ka sang sarak karja, sang kan kathaot haong yaom jien abih tih labaih 7 tỉ 200 ratuh triệu đồng.

Meng akaok thun mbiah tal ini, di tỉnh Cà Mau bala meng langik tasik ngak khat lahik jaik 20 tỷ đồng. Kuhria dalam 3 harei tapa, hangin gaving ngak tayak yaok rituh baoh sang bhap bini. Tui kuhria mboh dahlau  hajan ribuk daok rah tabiak sraw kadau, Mban tacei ba jalan  pacang caga bala meng langik tasik saong duah daong urang gaok bala tỉnh Cà Mau caong khin jabat chức năng  pakhang bruk pathau khan, tacei pato bhap bini brei pasiam kajap ar pacang, plaik njiak bruk lahik  kaya raong dalam ia, khik caga hu siam taneh pala drak; bhian pasang iek  ar tasik, dom labik mbuan glut jaleih tui brei ngak dahlau dom jalna pacang caga piah takik abih khat lahik.

Dom menuac metai dalam bruk jaleih taneh di gah pai Ấn Độ harei 20/7 tagok tal 16 urang saong jaik 100 urang jeng daok gar dalam haluk patau. Gah pacang caga bala pakat negar brei thau, hajan praong ngak kan kandah bruk duah, daong urang gaok bala. Di rilo labik, urang njauk mek tangin piah duah urang gaok bala kayua haluk lamin pasah lam urang trun gah la. Tui yaok pataom, hu takik di abih lac 225 menuac daok dalam dom baoh sang jaleih saong gah daong duah bahrau daong hu ka labaih 80 urang.

 Dom urang jakar Brazil brei ramik veik tukvak ngak bruk piah urang jakar hu nao iek pachreih kapol caoh mbanh di taneh ia pakacah di World Cup kumei 2023. Tui nan, dom harei kapol pakacah, dom urang jakar taneh ia ini brei nao ngak te jang 2 mong hadei tuk pakacah tamat. Kayua tui kuhria dahlau meda takik hu mbaok urang jakar di harei 24/7, Gilang pariak trung uong di Brazil jeng hu brei padeih harei ngak bruk  so lieu ngak mbang tabiak jien padai saong lạm phát. Kapol kumei Brazil meda yam tame pakacah giải vô địch kumei caoh mbang dat blong  di dunya bảng F, harei 24/7.  

Blah harak njauk giải độc đắc Powerball yaom labaih 1 tỷ USD hu pablei tabiak di ban Los Angeles, gah meraong California – Mỹ di melam but 19/07. Urak ini urang patuah njauk giải độc đắc nan jeng oh ka tabiak mbaok. Ini lac giải Powerball praong ka 3 saong lac giải thưởng praong ka 6 dalam bruk xổ số di Mỹ, hadei di 38 mbang xổ bo oh hu menuac njauk. Blah vé số yaom tỷ đô nan hu pablei tabiak di sa cửa hàng tiện lợi di pasak ban Los Angeles. Po labik pablei ini jeng taduan hu jaik 1 triệu USD meng bruk pablei tabiak harak vé trúng thưởng.