Di tỉnh Đồng Nai, Bình Dương, dom urang ngak gilac veik mai nagk bruk hu meng 75% tal labaih 95%

Tui yaok pataom oh ka ginup abih, dalam negar hu labaih 80% urang ngak gilac veik dom sang mac ngak bruk dalam harei 7/2. Di tỉnh Đồng Nai, Bình Dương, dom urang ngak gilac veik mai nagk bruk hu meng 75% tal labaih 95%. Rilo D.N di Bình Dương hu lì xì ka urang ngak meng 300.000 đồng tagok, peih bruk suak sam hu thưởng ngan saong rilo paok pandap hu yaom. Daok di tỉnh Đồng Nai, meng harei 5 bingun Tết rilo D.N tame ngak bruk gilac. Tui Liên đoàn Lao động tỉnh Đồng Nai, thun ini ralo urang ngak kong daok veik dalam tỉnh uan raok Tết yau nan ye hu samar gilac veik pakacah gauk ngak bruk dalam chreih chrai dom harei kok thun.

Di tỉnh Long An, dalam harei kabroi (7/2) jiak 1.500 doanh nghiệp song labaih 95% urang ngak, di 16 labik ngak cong hu mai ngak bruk veik. Piah daong palagaih ka doanh nghiệp samar tani tanat bruk ngak, tỉnh Long An pataom tame jhul pakhang bruk yaih khan, dui pachreih urang buh jien tame ngak mbang tame tapa pasiam bruk đầu tư, salih bahrau hành chính piah dong ka doanh nghiệp, abih di nyu nan lac peih bruk ngak harak gar brei dalam harei.

Darak pasar dulich Tet thun sak Rimong meng blaoh di Ban raya HCM mboh hu rilo siam mekre. Meng harei 29 bilan Mat tal 6 bingun Tết, gah dulich mek hu kuhria abih tih labaih 3.100 tỷ đồng. Tui dom đơn vị ngak mbang gah du lich, tuai ma-in dalam tuk Tet thun sak Rimong tagok khang dut saong dua thun dahlau. Dalam 6 harei Tet, Khu Du lịch Suối Tiên saong Công viên Văn hóa Đầm Sen raok labaih 85.000 mbang tuai mai rivang ma-in. Dom harei ini bhap bini ban raya nao dulich tal dom tỉnh karei jeng biak rilo. Jaik abih dom đơn vị lữ hành jeng hu dom kapol tuai nao main meng harei 1 bingun Tết.

Hadei di tuk vak atah padeih kayua kan kandah di jit Covid-19, harei 7/2, anek saih meng tal bac 6 tal tal 12 di Cà Mau hu mai veik sang bac tapak . Dom sang bac hu samar peih ngak siam dom bruk pacang caga jit. Tong abih anek saih tuk mai sang bac jeng hu test samar Covid-19, tapa nan duah tabiak 7 anek saih medhi njom Covid-19. 

Tỉnh Tiền Giang birau peih bruk beik binek thép pacang ia mbak, khik ia taba di ribaong Nguyễn Tấn Thành, xã Song Thuận saong Bình Đức, huyện Châu Thành piah khik caga ia pandar saong ia pala drak ngak nong. Tui Sở Ngak nong saong Patagok palei pala tỉnh, urak ini, ia mbak njom tame di kraong Tiền aval jang dut saong dom thun saong ia mbak njom tame dalam hamu glong jang. Abih di nyu, meng harei 13 tal harei 17/12, ia mbak njom tame glong sumu ia ndik tuk kreh bilan Tha, ia mbak meda njom tame meng 50 – 55 km dalam hamu.

Quốc hội Iraq bahrau brei padeih oh thau tal tuk halei bruk palih ruah tổng thống. Sarak hu batabiak hadei di tuk bruk plaik phiếu harei 7/2 oh peih ngak hu kayua hu 58 dalam abih tih 329 urang hu mbaok. Dom nyaom chính trị prong brei thau lac oh hu mbaok tame bruk plaik phiếu, dalam tuk bruk pliak phiếu brei hu takik di abih 2/3 urang hu mbaok. Tapa nan brei mboh bruk khủng hoảng chính trị prong di taneh ia ini 4 bilan hadei di bruk palih ruah urang ka quốc hội.

Mentri Quốc phòng Nga birau brei thau, video brei mboh bruk bol lin taneh ia ini pasram taong kalin pacang tên lửa C-400 di labik Lê-nin-grát saong kapal haok phản lực bol lin pasang iek taphia negar Bê-la-rút dalam bruk pasram kalin hoang gauk. Dalam dom bilan tapa, Nga brei peih bruk pasram dom mbang taong kalin angaok langik, angaok mbaok haluk saong angaok tasik, gam brei yaok pluh ribau urang lin mai jaik labik negar Ucraina, ngak ka Mỹ saong dom taneh ia NATO karei sahaneng Nga meda peih bruk taong tame Ucraina. Yau nan min, Nga atah klah abih bruk meblah Ucraina.

55 taneh ia song bhum taneh mek hu jalan ngak kayua gah Y tế dunya (WHO) ba tabiak lac 70% urang ngak salah bruk klauk jru pacang COVID-19 dalam kreih thun ni. 4 taneh ia ASEAN lac Malaysia, Singapore, Campuchia song Việt Nam mek hu jalan ngak ni, 33 taneh ia song bhum taneh jiak si mek hu. 117 taneh ia song bhum taneh dok veik nan lac Mỹ, Thổ Nhĩ Kỳ song tong abih dom taneh ia châu Phi meda oh mek hu jalan ngak kayua WHO ba tabiak./.

Urang lang: Hani Pha – Bhumi – 08/02