Pabak brei căn cước công dân pagam chip ka anek saih tal 12

Tukvak jiak ini, hu oh takik amaik ame anek saih brei thau bruk suai damuai dalam bruk pabak brei căn cước công dân pagam chip ka anek saih tal 12, dalam tuk harei pakacah tamat THPT jaik mai tal. Javap calei  ka bruk anek saih  oh ka hu, atau lahik thẻ căn cước công dân hu tame pakacah tamat THPT atau oh, ong Lê Mỹ Phong – Phaok akok Cục Khik iek chất lượng Pato megru brei thau, dom anek saih ini hu khik kajap bruk hu mbaok tame pakacah. Urak ini, bruk tut angan pakacah di dom tinh, ban  hu salah blaoh. Meyah anek saih oh ka hu atau lahik căn cước công dân ye khan brei urang dang akok labik pakacah thau chip piah pasang iek langyah.

Bruk pandar điện dalam taneh ia tagok tal tabung glaong bahrau   dalam tuk langik pandiak dui atah. Anak bruk kuhria mboh dahlau lac pandiak khang daok rah tabiak, gah điện tabiak panuac brei thau lac mbuan rah tabiak bruk klaih klaoh jalan điện di dom labik kayua điện hu pandar rilo, tapa prein di nyu di rilo tukvak. Piah patrun patakik rah tabiak bruk ini, EVN daok hu panuac kakei bhap bini, dom jabat karja saong labik ngak pandap, brei caik hatai pandar điện siam mekre, salamat, patak pataom, abih di nyu lac di dom tuk tabung glaong jala pandiak haong tuk melam, lac meng mon 11 meteh tal mon 2 meteh jala pandiak, saong meng mon 8 tal mon 10 melam. Gam haong nan, brei caik hatai pandar ka nyu lagaih jamriak điều hòa nhiệt độ (peih meng 26-27 độ tagok, pandar gam haong kadik) saong jhui pandar rilo jamriak hu công suất praong dalam sa tukvak haong gauk.

Tui yaok pataom meng Pasak Pasang eik ruak kinh tỉnh Đồng Tháp, kuhria tal harei 19/6, tỉnh ini hu labaih 2.400 urang njauk ruak tabiak darah, tagok 299% dut saong tukvak ini thun 2021. Dalam nan, dom bhum palei hu urang njom ruak tagok glong nan lac: huyen Hồng Ngự; Ban Hồng Ngự saong Ban Cao Lãnh hu urang ruak kuhria abih tih tagok glong meng 308 tal 436 urang. Anak bruk urang ruak pandiak tabiak darah tagok glong, gah y tế Đồng Tháp daok pakhang bruk tui iek dom urang ruak, sruh jit ruak, jamoh pambak ruak pandiak tabiak darah piah peih ngak dom jalan pacang caga jit hu siam lagaih, pacang jit tamuh piah jhul kadun likuk jit ruak pandiak tabiak darah.

Gah Cảnh sát điều tra, Công an tỉnh Đồng Nai hu tabiak harak khởi tố bị can, cap kreik ong Nguyễn Hoàng Nghĩa – akaok jabat Tài nguyên saong Môi trường huyện Long Thành, piah duah thau ka bruk kurang sangka ba tal khat lahik trak. Langiu Nguyễn Hoàng Nghĩa, công an jeng hu khởi tố, cap kreik 3 urang karei jeng lac urang jakar di huyện Long Thành. Tui panuac khan tuk camereip, 4 urang bahrau njauk cap kreik nan jeng hu pambuak pagam tal bruk xác minh asal taneh riya di danak dak Cụm công nghiệp Bình Sơn (xã Bình Sơn, huyện Long Thành). Meng nan ba tal bruk taneh di karja pak ini njauk rahra meblah mek, ngak khat lahik drap ar karja yaok pluh tỷ đồng.

Jala pandiak harei 23/6, kamuan likei angan N.Đ.T.V. ndih tapui 2012, daok di huyện Lâm Hà, tỉnh Lâm Đồng hu baoh sang ba nao me-in saong padeih padei di resort Hòn Rơm 1, di Labik du lịch Hòn Rơm 1, di phường Mũi Né, TP Phan Thiết, tỉnh Bình Thuận. Tal maong 5 biar harei nan, kamuan V trun menei danao caluai ia dalam resort ye mblung ia. Thau ka bruk nan, rilo urang prew daong saong ba kamuan V tagok ar sơ cứu, blaoh samar ba tame Jabat Đa khoa labik Mũi Né cấp cứu. Yau nan min, hadei di nan thau lac kamuan V metai blaoh. Urak ini, bruk nan hu jabat karja TP Phan Thiết pasang iek, ngak brei cambaic laic.

Gilang pariak dunya (WB) khan lac hu brei tapa sa danak dak yaom 2 tỷ 300 triệu USD piah daong ka dom taneh ia daok di gah Đông saong Nam châu Phi pacang veik bruk kurang padai brah, pandap mbang. WB brei thau, pok jien ini hu daong patagok prein pasiam veik di gah padai brah pandap mbang dalam bhum, saong piah langyah bruk kurang pandap mbang dak harei dak khang tagok.

Harei 23/6, tui tukvak pak nan, Gah Y tế dunya  hu peih ginum biai chip, taong yaom bruk njom mbak ruak đậu mùa khỉ njauk lac bruk Samar chip  gah y tế công cộng pakat dunya halei oh. Bruk ba tabiak ngak samar chip gah y tế dunya hu iek yau  tanut brei thau dahlau glong abih bo Gah Y tế dunya ba tabiak. Gah Y tế dunya dahlau daih jeng hu ba tabiak bruk dreih yau nan ngan saong jit rauk Covid-19 saong ruak bại liệt.

Dom taneh ia Đông Nam Á tal harei ini meda lac peih jaik abih pabah mbang hadei di jit praong Covid 19 piah pambuak veik dom bruk pablei salih, ravang me-in piah pasiam veik kinh tế hadei di jit praong. Min rilo taneh ia Đông Nam Á daok pandik akaok haong bruk kurang meuac ngak biak rilo, abih di nyu lac dalam dom gah ngak hu menuac ngak negar langiu dang akaok bruk ngak./.

Urang lang: A. Nghiêm & M. Phương – 25/06