Tui dự thảo di Mentri Công thương ka bruk pasiam veik jalan ramik pasiam yaom pablei lẻ điện, tui nan tukvak pasiam yaom điện kuhria rah tapa lac 3 bilan sa mbang, salih ka 6 bilan yau urak ini. Kadha birau dalam bruk ba tabiak mbang ini lac meyah pablei lẻ điện yaom trun meng 1% tagok dut haong yaom điện yau urak ini, Tập đoàn Điện lực VN (EVN) meda brei trun yaom sumu. Meyah tagok yaom, yaom jien điện tagok kuhria meng 3-5% saong dalam khung yaom, Tập đoàn Điện lực VN brei ramik tagok yaom sumu. Meyah yaom jien điện meng 10% tagok ye dut haong tanut urak ini atau langiu yaom, meda kayua Mentri Cong thuong atau Thu tuong Rajaei pasang iek, brei panuac.

Danak dak langyah samar drah bruk glut jaleih takai kraong Tiền labik xã Tân Mỹ saong xã Mỹ An Hưng B (huyện Lấp Vò, tỉnh Đồng Tháp) atah 2.100m hu peih tabiak ngak meng bilan 7/2022, tui kuhria hu ngak salah dalam bilan 12 ni. Danak dak kayua mBan Khik ramik dự án padang ngak dom bruk gah ngak nong saong patagok palei pala tỉnh Đồng Tháp ngak po đầu tư, hu peih ngak piah samar pacang cakak glut jaleih, khik caga siam mekre, salamat ka menuac sia, ka drap ar di bhap bini saong jalan ĐT.848 – sa dalam dom jalan nao mai praong pambuak tỉnh Đồng Tháp haong An Giang.

UB bhap bini Ban raya HCM birau payua harak van ban ka UBND tỉnh Đồng Nai brei panuac njauk gauk ka dom asar kadha ka jalan pambuak TP.HCM haong Đồng Nai dalam nan hu Cát Lái, tatua Phú Mỹ 2 saong tatua Đồng Nai 2. Tapa nan piah peih ngak dom harak gal pabak tame dom danak quy hoạch hu pambuak tal di dua bhum palei tui panuac tacei ba di Mentri Jalab mbak pajeng ba. Dahlau di nan, tỉnh Đồng Nai likau brei jien buh tame ngak tatua Cát Lái dahlau di thun 2025 salih ka hadei thun 2030 piah samar klak phà Cát Lái.

Daok tame bilan cap mek min bruk pablei tabiak negar langiu daok gaok kan kandah, yaom hadang tamo di Cà Mau jeng daok di yaom biar. Urak ini, yaom hadang thẻ takai mbong patih quý II/2023 trun meng 18.000 - 49.000 đồng/kg duk haong quý I; daok duk haong tukvak ini thun blaoh, yaom hadang thẻ jeng trun meng 11.000 - 36.000 đồng/kg, tui janih. Yaom lac hadang praong meng 20 drei tame sa kg oh trun, min hadang sit jang jeng trun khang. Yaom hadang trun khang ngak ka rilo menuac raong hadang mbuan khat lahik. Tỉnh Cà Mau hu taneh pala hadang jaik 280.000 ha.

Bruk hajan dui atah dalam rilo harei tapa ngak dauk rilo labik di tỉnh Hậu Giang, ralo hamu padai njauk dauk dalam ia khat lahik tagok tal 90%. Tui ong Trần Anh Tuấn, Phó akok Chi cục Pala drak saong Khik caga phun pala tỉnh Hậu Giang, bruk hangin hajan daok rah tabiak sraw kadau. Urak ini, đơn vị daok ja ba urang nong kuac jalan tathuak ia, kham merat njuk pruh ia klak dauk padai saong dom janih phun pala karei piah takik khat lahik.

Rilo đảng chính trị di Campuchia hu tabiak panuac lac tamat bruk jak ba tranh cử caga ka bruk pilih ruah urang ka Quốc hội tui kuhria hu peih tabiak di harei 23/7 tal. Tui adat di Ủy ban Bầu cử negar Campuchia, bruk jak ba tranh cử hu rah tabiak dalam 3 adit, meng harei 1-21/7. Harei 22 bilan 7, lac harei “mbong patih” pakauk abih bruk ngak chính trị, gaok mai dom bruk ngak mbang yau ye karaoke, quán bar, labik chat tamia, hộp đêm, quán nhậu... dalam taneh ia brei padeih . Bruk pilih ruah urang ka Quốc hội mbang 7 hu peih tabiak di harei 23/7 ini.

Lien minh chau Au (EU) brei dui atah dom jalan taong phạt Nga pambuak tal bruk quan su dac biet di Moskva di Ukraine. Dom jalan taong phạt brei dui atah 6 bilan tal harei 31/1/2024. Dom jalan taong phạt urak in di EU pamong tal ralo gah di Nga, dalam nan hu dom bruk pablei salih, jien padai, cong nghe saong pandap panda lưỡng dụng, công nghiep, pajeng ba saong pandap chiat jien. Mbiah tal ini, EU hu brei tapa 11 paoh taong phạt ngan haong Moskva. Mentri Ngoại giao Nga mboh lac dom bruk ngak di EU nan “ suan hukum saong ngak trun prein khang dom tanut chuan di hukum dunya”.

Di bang Kaduna gah Tây Bắc Nigeria daok tamuh sa jit ruak oh ka bhian mboh, urak ini hu 10 urang njauk ruak. Sang iek ruak di bang ini brei padang sa labik brei daok karei saong mek mẫu bệnh phẩm ba nao dut iek. Jaik abih dom urang ruak tame sang iek ruak lac uranaih umo meng 3 - 13 thun, mboh pandiak tarakaong, pandik akaok, pandiak, kan luan, kan suak yava. Dom urang ilamu gah dịch tễ học daok nao tal ban sit Kafanchan piah duah thau makna tamuh ruak. Dalam tuk nan, urang jakar palei daok hu panuac ieu bhap bini paglaong hatai sangka, saong daok ba tabiak dom jalan ngak piah pacang cakak jit ruak njaom mbak. Rilo sang bac njauk kreik pabah mbang piah cang panuacbrei thau di gah y tế./.