Mintri Nội vụ njauk gauk haong Mintri LĐ-TB-XH ka tukvak tagok jien bilan tối thiểu thun ini di harei 1.7.2024 anak tal, laik tame tukvak salih bahrau jien bilan bhum kanja. Dalam nan, yaom jien bilan tối thiểu bhum hu ba tabiak yau ini: Bhum I meng 4 triệu 680 rabau đồng sa bilan tagok 4 triệu 960 rabau đồng sa bilan. Bhum II meng 4 triệu 160 rabau đồng sa bilan tagok 4 triệu 410 rabau đồng sa bilan. Bhum III meng 3 triệu 640 rabau đồng sa bilan tagok 3 triệu 860 rabau đồng sa bilan. Bhum IV meng 3 triệu 250 rabau đồng sa bilan tagok 3 triệu 450 rabau đồng sa bilan. Yaom jien bilan tối thiểu tagok meng 200.000 đồng - 280.000 đồng sa bilan dut saong yaom jien bilan tối thiểu urak ini. Tanut ramik veik yaom jien bilan tối thiểu ini glaong jang 2% dut saong tanut diuk rai tối thiểu di urang ngak tal abih thun 2024 piah pasiam ka urang ngak.

Mesup ini, Đại học Quốc gia TP.HCM brei thau bruk pakacah taong yaom prein bac mbang 1. Dalam nan bài pakacah glaong abih hu 1.076 điểm (tui thang điểm 1.200). Dalam labaih 93.800 bài pakacah, anek saih mek hu điểm glaong abih mbang pakacah lac 1.076 điểm, biar di abih lac 203 điểm. Tui Đại học Quốc gia TP.HCM, điểm pakacah mbang 1 hu điểm glaong biar jang gauk rilo, brei mboh bruk parabha prein bac glaong, lagaih ka bruk pilih ruah. Urak ini hu 105 labik pato pakai hu tut angan pandar mbang pakacah taong yaom prein bac di Đại học Quốc gia TP.HCM piah pilih ruah. 

Kapul Chữ thập đỏ tỉnh Đồng Nai bahrau jao alin pandap di thiền tự Phước Quang (xã Phước Thái, huyện Long Thành) haong di dom urang ngak pahla brei ka rahra daok pak xã Thanh Sơn, huyện Định Quán. Dalam danak dak, kapul Chữ thập đỏ Đồng Nai hu alin 200 paok pandap (yaok paok yaom meng 800-950 ribau đồng) ka mikva gaok kan kandah. Abih tih paok jien ngak pahla mbang ini lac labaih 167 triệu đồng. Dahlau di nan, kapul ngak pahla thiền tự Phước Quang hu alin 300 paok pandap yaom 260 triệu đồng ka mikba Khmer di tỉnh Tây Ninh.

Tui Sở jien padai tỉnh Bình Thuận, dalam tuk jien padai daok hu takik yau urak ini, oh khik kajap hu bruk daong jien blei BHYT ka bhap bini bangsa takik tui Nghị định ka 75/2023 di Rajaei. Tapa pasang iek, meyah daong 30% yaom jien blei BHYT ka bhap bini bangsa takik tui bruk ba tabiak ye tỉnh brei hu 6.370 triệu đồng, tukvak peih ngak dalam 30 bilan, kuhria rah tapa lac 212 triệu đồng sa bilan. Bình Thuận urak ini hu 34 bangsa takik, hu abih tih 104.066 menuac, samu 8% dom menuac sia dalam tỉnh.  

Kayua langik pandiak khang di rilo labik praong nan ye meng ini tal harei 21/4 tal, ia di dom binek, kraong ribaong saong dalam mblang hamu pak tỉnh Hậu Giang trun samar saong daok di tanut biak bier. Tanut ia glaong abih di bilai Phụng Hiệp meng 0,80-0,90m, tanut ia tagok bier abih meng -0,75m tal -0,85m, bier jang rilo thun. Jabat kuhria mboh dahlau bruk langik tasik tỉnh Hậu Giang hu panuac lac, ia mbak njaom tame tui ia ndik di tasik biển Tây daok di tanut glaong, abih di nyu lac prein ia nduac meng kraong Hậu tame kraong, ribaong dalam tinh oh ginup piah pandar saong pala drak, nan ye rahra njauk pandar ia patak pataom ia.

Dom harei ini, di rilo taneh ia Đông Nam Á jeng rah tabiak adat thac ia. Puac adit blaoh, rahra Mianma chreih chrai peih ngak dom bruk salam uan Harei pataom thac ia - Tết meng kan uan raok thun bharau. Adat thac ia bhian hu rah tabiak hadei di tuk nao baha likau patuah jamo. Urang ba gauk tabiak jalan, mek nding pruh atau pako ia thac tame gauk salih ka panuac tadhau ayuh thun bahrau. Di Mianma, ia lac brei mboh ka bruk hacih sa-at, siam mekre, la-an langaoh saong sron mbon, nan ye adat ini hu maong lac bruk ngak ilamu hadah krah meng kan ngak brei kajap jang talei jum pataom bangsa. 

Anak bruk pilih ruah di Ấn Độ, Thủ tướng Narendra Modi brei thau lac, Đảng Bharatiya Janata pan akaok di ong meda pataom prein tame ba bruk ngak saong jhul patagok dom cty peih bruk ngak mbang dalam taneh ia. Sa  pasang iek brei mboh, jaik 2/3 dom urang hu sua ka bruk duah bruk ngak gaok kan kandah jang dalam 5 thun tapa. Min, ong Modi sanya lac ba kinh tế Ấn Độ jeng kinh te praong ka 3 di dunya meng labik dang ka 5 di urak ini, mayah ong hu pilih ruah pok ngak mbang ka 3 gam gam.

Tây Ban Nha daok rah tabiak mbang pandiak oh ka bhian mboh di bilan 4, tuk langik pandiak di adit bloh glaong jang tanut kuhria rah tapa meng 5-10 độ C. Tui gah kuhria iek bruk langik tasik, langik pandiak kayua pandiak mai meng châu Phi. Ban  Bilbao bhian hu angan haong langik la-an bingi, hajan rilo, urak ini pandiak tal 31oC. Di Bồ Đào Nha, langik jeng pandiak jang tukvak ini thun dahlau. Di dom labik dalam Lisbon, langik pandiak tal 29oC./.