Uan salam Tết Trung thu thun ini, Akaok negar Võ Văn Thưởng hu Harak payua tal dom kamuan dam dara, uranaih. Dalam harak, akaok negar hu vak lac: dahlak biak drut drui saong hadah mbaok mata dalam tukvak tapa, dom kamuan hu rilo bruk ngak kein lagaih, ngak siam, anit ranam amaik ame, ong muk, thau daong ba saong klah raba haong dom urang oh hu patuah jang di drei. Dom kamuan tari tareng, eng drei bac taa saong dak harei dak naih joi. Rilo kamuan mek hu dom jak jeng glaong, jeng lac kreih camin hadah mbaok mata di dalam sang, di palei negar. Dahlak caong maong dom kamuan tuk halei jeng hu hatai sahaneng, caong maong, anit ranam sang, thau mangaok thau mala, thau jumpataom gauk, daong ba gauk, pacacah gauk ngak ribau bruk siam, njauk lac anek naih, anek saih naih joi, lac kamuan naih di Wa Hồ! Tadhau ayuh ka dom kamuan uan raok Tết Trung biak bui sambai, chreih chrai, salamat saong haniem phul!

Dom harei ini, dom bhum palei brei peih ngak rilo bruk “Ma-in sambai melam ia bulan pomi - bak baoh” ndung bak makna brei ka dom adei uranaih. Báo Ấp Bắc pambuak Liên đoàn Lao động saong Tỉnh đoàn Tiền Giang birau peih ngak Danak dak “Melam main sambai Ia bulan bak baoh” saong jao brei labaih 1.100 paok pandap trung thu dalam nan hu ahar, gom lồng đèn saong pang dien  ka dom adei  uranaih lac anek di urang ngak daok ngak bruk di dom D.N dalam KCN Mỹ Tho, kum kong nghiep Trung An saong Tân Mỹ Chánh, ban Mỹ Tho saong uranaih hu raidiuk kan kandah di Ban Mỹ Tho.

Dah page ini, di Hà Nội, Trung ương Kapul dam dara CS Hồ Chí Minh hu peih Harei pok mayaom dam dara naih joi ngak tui panuac di Wa mbang ka 7. 420 urang jakar, dam dara hu pok mayaom jeng hu dom bruk ngak naih gheih dalam gah daok bac taa, ngak bruk. Yaok urang sa gah ngak karei di gauk, min gam sa hatai takre, anit ranam, hatai pachreih, duah jalan ngak bahrau di urang ranaih; mek panuac bo Wa pato ngak ba jalan ngak ka yaok bruk; oh huac kan kandah, glaih glar, kham marat khang hatai  yam tapa kan kandah mek hu dom siam lagaih dalam yaok bruk ngak, dalam raidiuk. 

Akok UB bhap bini tỉnh Cà Mau birau payua harak tacei ba Sở Ngak nong saong Patagok palei pala; Sở KH -CN brei padeih bruk ngak po 3 angan nhãn hiệu  chứng nhận brah nan lac:  Padai Tép hành Cà Mau, Tài nguyên đục Cà Mau saong  Padai Một bụi lùn Cà Mau. Urak ini, taneh pala 3 janih pajaih padai nan biak takik kayua  salih tapa dom pajaih  brei hu rilo asar padai, yaom glong jang. Đơn vị khik iek dom angan brah nan tayah klak saong jien buh tame tut angan veik nhãn hiệu chứng nhận nan bak ralo.

Tui Kapul mỳ mbang chip di Dunya (WINA) brei thau, dalam thun 2022, urang Việt pandar labaih 8,48 tỷ paok mỳ, dang dalam top 3 taneh ia pandar paok mỳ rilo abih di dunya, hadei di Trung Quốc, Indonesia. Mayah kuhri kuhria ye sa urang Việt Nam meda mbang hu labaih 80 paok mỳ sa thun, labaih 7 paok mỳ yaok bilan. Caong ka mỳ mbang chip jeng mek hu tanut glaong abih di yaok saman lac 121,2 tỷ paok mỳ hu pandar dalam thun 2022. Jien mek tame di mỳ mbang chip tui kuhria meda tagok meng 45,67 tỷ USD dalam thun 2020 tagok 73,55 tỷ USD di thun 2026.

Hadei di 3 thun brei padeih kayua jit praong COVID-19, Myanmar meda peih ngak gilac veik Harei pataom Khinh khí cầu ngan haong rilo bruk ngak biak chreih chrai, bui sambai. Harei pataom ini meda hu peih tabiak meng harei 21-27/11 di ban Taunggyi, thủ phủ bang Shan. Tuai hu mbaok di harei pataom ini meda hu mbaok tame iek dom mbang parang iek ia harei saong sambo mau di labaih 60 khinh khí cầu di melam. Taphia di nan, meda hu rilo bruk ma-in sambai karei yau ye bruk cuh phao bingu saong pakacah jhik aw ma-om sambo kanjik katam piah hadei di nan pok tagok dom ong mbik. Tui adat agama di pak ini, dom baoh khinh khí cầu hu palao di mangaok langik hu makna lac pateok nao dom bruk oh siam, oh patuah jamo.

Dom urang roh duah ilamo Australia bahrau ngak tabiak pajaih patei salih gene camriep abih di dunya hadei di labaih 20 thun roh duah. Giáo sư James Dale di Đại học Công nghệ Queensland brei thau lac, pandap mbang salih gene meda lac dom pandap mbang dalam dom pandap salamat. Dunya daok gaok bruk biến đổi khí hậu biak trak saong bruk ngak tabiak pandap mbang jeng gaok kan kandah praong anak dom kanjak jhak di langik tasik biak sarau kadau. Kayua yau nan ye, anek manuac njauk patagok dom yaom glaong di công nghệ piah ngak tabiak dom pajaih phun pala hu prein pacang caga siam haong bruk biến đổi khí hậu, saong pacang caga haong bruk patagok di rahra.    

Hãng tin Albawaba ba khau tin, sa bala apui khuan biak trak rahtabiak di Hội trường Al-Haytham, di quận Al-Hamadaniya, Tỉnh Nineveh pak Iraq, lac labik daok rahtabiak adat lakhah, hu mbaok tame di labaih 300 tuai damuai. Tui khau tin camriep abih brei thau lac hu labaih 60 urang metai. Urak ini dom kapul daong duah urang njauk bala di pak ini daok samar drah peih ngak bruk padam khauh, daong duah urang njauk bala./.