UBND TPHCM bahrau hu harak samar drah payua tal Mintri Kế hoạch saong đầu tư haong Mintri jien padai ba tabiak bruk ramik veik jalan buh jien tame đầu tư công thun ini kadung jien ODA pabak meng kadung jien kanja pakat negar ngan haong 2 danak dak. Abih tih phun jien likau brei trun lac 600 tỷ đồng. Tui UBND TPHCM, makna ba tabiak bruk likau ramik veik kayua danak dak Hacih saat alam môi trường TPHCM tukvak ka 2 gaok kan kandah dalam tuk padang ngak saong pasiam adat biyar jien, ba tal bruk oh samu peih brei abih dom phun jien ODA pabak hu jao brei. Daok danak dak SECO hu UBND TPHCM pasang iek, rami ramik, kaduan tukvak ngak salah tal abih thun 2023. Min hadei di nan, Gilang paraik dunya hu harak payua Mintri jien padai pathau khan bruk padeih peih brei paok jien masaiy ka danak dak ini. 

UB bhap bini tỉnh Bình Thuận hu ba tabiak brei thau angan 43 danak kayua suai padang ngak, oh ba taneh tame pandar di dalam tỉnh. 43 danak dak ini jeng daok di labik tapen tasik, lac ban Phan Thiết, ban sit La Gi, huyện Hàm Thuận Nam, huyện Bắc Bình, huyện Tuy Phong. Langiu di bruk suai peih ngak, dom danak dak ini daok hu rilo bruk ngak suan yau salih bruk pandar taneh oh njauk adat, padang ngak tuk ka oh hu adat salih bruk pandar taneh…

Di tỉnh Tiền Giang, baoh durien di bein hu urang blei salih mai blei haong yaom meng 78.000-80.000 đồng/kg tui janih, glaong jang tukvak akaok bilan 10 labaih 10.000 đồng/kg. Meng nan, yaok ha baoh durien urang nong laba hu yaok tỷ đồng. urak ini dalam tỉnh hu labaih 8.000ha baoh durien daok paik baoh dalam mbang ini, pataom rilo di dom huyện, ban pasang iek hu ia sua di akaok halau di kraong Tiền lac Cái Bè, Cai Lậy, ban sit Cai Lậy.

Meng labaih 500 ha taneh padai – hadang hu Gah Chứng nhận quốc tế di dunya - độc lập dalam gah khik ramik saong pasang iek kaya pandap brei harak lac mek hu chuẩn ASC Group, tỉnh Cà Mau ba tabiak bruk lac tal thun 2030, hu 40.000 ha taneh ngak nong hu ngak tui jalan padai – hadang mek hu sa dalam dom harak chứng nhận pakat dunya ka ASC. Dom sang mek hu harak chứng nhận ini hu blei veik abih pandap, haong yaom glaong jang yaom darak pasar meng 1.000 - 3.000 đồng sa kg.  

Công an ban Dĩ An, tỉnh Bình Dương hu ba tabiak Harak brei cap khik ong Nguyễn Trường Hận (umo 40 thun, daok di Lâm Đồng), urang peih radaih ginuh tame ngak metai 4 urang di Bình Dương di dah page harei 30/10 piah ngak cambaih bruk ngak suan adat hukum ka bruk peih radaih di jalan mbak. Tapa pasang iek tuk camriep, jabat chức năng brei thau, ini lac bala jalan mbak ngak kan kandah biak trak damak. Urang peih radaih Nguyễn Trường Hận peih radaih salih jalan bo oh pasang iek, oh khik atah salamat ngan haong radaih nduac jaik radaih di drei. Bruk ngak di Nguyễn Trường Hận mboh lac ngak suan adat hukum ka bruk peih radaih di jalan mbak nao mai.

Tổng thống Hàn Quốc haong diuk di ong harei ini hu nao caik bingu di sa labik pahadar dom urang metai dalam bruk juak kateik gauk di melam 29/10 di khu phố Itaewon, Hàn Quốc. Mbiah tal mesup ini, dom menuac metai dalam bruk juak kateik gauk nan tagok tal 154 urang, jaik abih lac dalam umo thun 20, dalam nan hu  26 urang negar langiu. Dom menuac metai meda daok hu rilo jang, kayua 37 urang daok dalam trak damak, mbuan metai. 116 urang karei njauk rambus.

Tui Jabat Pasang iek bala meng langik tasik negar Philippines, dom urang metai kayua ribuk Nalgae urak ini tagok tal 80 urang saong 31 urang lahik ka oh duah mboh. Tui kuhria khat lahik labaih 384 triệu Pê-xô, samu 6 trieu 6 rituh 20 ribau đôla Mỹ. Tổng thống Philippin mboh biak pandik harao anak pathau khan lac bruk metai lahik di menuac daok tagok glaong, tui kuhria ong meda nao pasang iek di mangaok glaong dom palei njauk ia dauk di tỉnh Cavite.

Anek ruak bahrau di virus Covid-19 hu angan ieu lac XBB hu mboh di 2 bang hu rilo menuac abih di Australia lac New South Wales haong Victoria. Bruk njauk biai nan lac anek ruak bahrau XBB meda hu prein yam tapa paga pacang bo vắc-xin caga Covid-19 ngak tabiak piah njaom tame rup anek menuac. Langiu di nan, anek ruak XBB daok meda tapa hu kháng thể bo rup pabhap ngak tabiak hadei di tuk njauk ruak. Bruk tamuh tabiak biến thế bahrau oh ngak brei dom chuyên gia y tế Australia biak duh hatai kayua labaih sa meteh menuac sia taneh ia ini hu klauk bloh vắc-xin saong njauk bloh ruak Covid-19./.

Urang lang: Thu Thảo & M. Phương – 31/10