Di ban raya HCm rilo labik peih ngak siam bruk hacih saat jalan mbak 

UB MTTQ Việt Nam Ban raya HCM saong UB bhap bini Ban raya pambuak gauk peih Danak dak peih ngak labik daok di bhap bini hacih sa-at vaktu 2022 -2024. Dalam nan, Ban raya HCM kham merat tal puac thun ini, padang ngak 500 labik daok bhap bini hu taduan angan labik daok hacih sa-at- mekre hu taduan brei angan. Yaok phường, xã, ban sit hu takik abih sa labik daok di bhap bini hu brei angan labik daok  hacih sa-at - mekre. Mbiah tal puac thun 2023, padang ngak salah ginup 1.000 labik daok bhap bini hacih sa-at - mekre saong tal puac thun 2024, padang ngak salah 1.500 labik daok  hacih sa-at - mekre. Tui nan, kham merat hu takik abih 10% labik daok bhap bini hacih sa-at - mekre gheih abih piah meyaom pakat ban raya.

Tỉnh Bình Dương dok kuhria caga dom harak gar, piah peih mek taneh, peih ngak danak dak jalan vành đai 3 ban raya HCM. Tui kuhrai hu peih ngak dalam bilan  4.2023, song ngak salah dahlau di thun  2026. Jalan  Vành đai 3 nao tapa  tỉnh Bình Dương atah labaih  26,6 km nao tapa ban Thủ Dầu Một, Thuận An song  Dĩ An. Danak dak hu  8 jalan radaih nduac samar, hu jalan nao gam gam di 2 gah  song dom hành lang piah pala phun hajao, dom danak dak  hạ tầng kỹ thuật khik ramik peih prong.

Meng harei 31.8, Labik Ilamu danao ia Nước Ngọt, di phường 6, Ban Sóc Trăng brei peih pabah mbang oh mek jien vé tame pabah mbang. Ini lac labik dulich danei ngan di tỉnh Sóc Trăng saong bhap bini dalam palei hadah mbaok meta iek ini lac “ Đà Lạt sit” kayua thaik thaot biak gheih. Dalam  labik ilamu danao ia Nước Ngọt hu dua danao ia praong vin taom dar hu pala phun kayau hijao, bingu me-om halui la-ar. Labik ini hu pagap yau “ phoi hijao” di ban Sóc Trăng.

Công an  ban  Bà Rịa, tỉnh Bà Rịa – Vũng Tàu pakauh abih bruk ba tangin lih tame langyah bruk ngak suan dalam bruk peih radaih. Dom bruk ba tangin lih tame ngak suan di urang jakar, viên chức, urang đảng langiu di bruk langyah tui hukum, cảnh sát giao thông meda khan bruk ngak suan tal labik ngak bruk, tổ chức Đảng piah langyah trách nhiệm. Meng ni tal puac thun, abih di nyu nan lac dalam tuk tabung glong lễ 2/9 gah  Cảnh sát giao thông khang hatai hu mbaok, khang hatai langyah bruk radaih pambuak praong, pajeng tapa prein, song dom urang peih radaih hu menyum alak mbia bloh, peih tapa gom meriah, peih ngược chiều...

Di bhum Taneran kraong Cửu Long, tukvak tapa rah tabiak gam gam dom mbang asau meruai kaik. Di Cà Mau, jaik 3 bilan tapa rah tabiak 8 mbang hu 13 urang njuak asau kaik. Dalam nan dut mboh ruak meruai. Daok di Bến Tre, 8 bilan tapa hu 11 urang metai kayua asau meruai kaik.  Tui kakei di Cục Y tế dự phòng (Mentri Y tế), meyah njauk asau kaik, meyao kaik, blaic atau lah, urang njauk nao tal pasak y tế  jaik abih  iek ruak piah trun takik ruak meruai saong klauk jru pacang ruak sumu. Abih di nyu, oh pandar jru nam, oh taong ruak eng saong oh da-a gru jru taong ruak meruai.

Labik gah merong negar Pakistan daok dang anak sa mbang ia sua bahrau, tuk ia di dom krong dok tagok glong. Hajan ia sua dui atah dalam jiak 3 bilan tapa  ngak ka labaih  1 ribau urang metai, yaok ribau urang njauk rambuac, song yaok pluh ribau urang hu panduan ba nao labik karei. Hajan ia sua ngak khut khat song tayah jiak  1 triệu sang danaok. Rilo jalan mbak njauk gliut jaleih, dauh dalam gluh baok, ngak lahik điện di rilo labik praong, kan kandah tal rai duik  di yaok triệu bhap bini. Rajaei  Pakixtan hu panuac ieu bruk jum pataom di bhap bini song bruk dong ba di dunya, piah dong ka taneh ia ni, yam tapa tuk vak kan kandah  ..

Tổng thống Liên bang Nga Vladimir Putin mbaoh tangin brei adat ka bhap bini meng Ukraine saong 2 bhum taneh Donetsk saong Luhansk di miền Đông Ukraine tame Nga meng bilan 2 meng blaoh hu daok di Nga saong ngak bruk oh cang hu adat. Hukum birau ini jeng hu brei ka urang jaoj jo hu mbang jien daong atau jien padeih hưu yaok bilan; uranaih jaoh jo, urang kumei daok metian jeng hu daong jien. Kuhria meng  bilan 2 mbiah tal ini hu labaih 3,6 trieu bhap bhap bini Ukraina, dalam nan hu 587.000 uranaih, hu tame negar Nga.

Tui panuac khan di Viện Brookings, hu labaih 16 triệu urang  Mỹ dalam umo ngak bruk njom ruak COVID dui atah , saong meng  2 tal  4 triệu urang dalam nan brei padeih bruk. Pasak pasang iek song pacang caga jit ruak Mỹ (CDC) kuhria mboh, dalam yaok 13 urang prong di Mỹ tok hu sa urang – samu song  7,5% urang - njom hội chứng pagam tal  COVID-19. Rilo taneh ia karei jeng hu pathau khan ka bruk pren yava patrun hadei di tuk ruak COVID-19 ngak kan kandah tal darak pasa urang ngak bruk./.

 Urang lang: Hanipha- Bhumi -29/8