Page ini (27/10), Quoc hoi ginum biai, brei panuac ka danak dak Hukum Lực lượng hu mbaok tame khik an ninh, trật tự di puk palei. Tui danak dak Hukum, lực lượng hu mbaok tame khik an ninh, trật tự di bhum palei lac lực lượng kayua karja palei padang tabiak tui hatai caong khin di bhap bini piah daong Kong an xã, phường, ban sit ( lac pakat xã) ngak bruk khik caga sron mbon, trật tự di puk palei saong padang bruk jak ba taong abih bhap bini khik caga an ninh taneh ia. Pambuak tal bruk palih ruah manuac lực lượng nan, dom panuac brei palih ruah dahlau dom urang lac bol lin, kong an tabiak bruk, urang dahlau diah lac bol lin, đảng viên, urang đoàn dam dara, bol bhap bangsa takik, urang dalam dom agama, urang thau cambaic adat cambat, pan kajap bruk dalam bhum palei, urang hu angan je. Rilo urang QH iew brei pabak tanut chuan ka umo ala 65 thun.

Pachreih tui Bilan tabung glaong kayua urang kan kathaot thun ini, UBMT negar Việt Nam dom pakat di TP. Hồ Chí Minh daok klah rabha, daong dom sang gaok kan kandah, alin hadiah 97 pandap piah ngak mbang duah jien, paglaong jien mek tame, daong jien bac Nguyễn Hữu Thọ brei ka jaik 2.300 anek saih, sinh viên; jak ba daong ka 53 sinh viên kan kandah, bac ta-a naih joi mbiah tal tuk bac tamat, brei 20 sổ tiết kiệm (yaok sổ yaom 10 triệu đồng) brei ka 20 sang hu anek naih matui, sang kan kandah, pambuak bruk haong Gilang pariak HD Bank brei 150 komputer ka nek saih kan kathaot takre bac da-a. 

Ia hani bingu la-u that Organic Soksanl - Đặc sản Trà Vinh birau hu ba pabei tapa darak pasar negar Mỹ. Ini lac pandap di Công ty TNHH Trà Vinh Farm lac doanh nghiệp nao dahlau dalam bruk ngak pandap tui jalan hữu cơ, siam ka alam moi truong saong abih di nyu nan lac hu tal 80% urang ngak lac bangsa Khmer. Jaik 20.000 klaoh ia hani bingu la-u that Organic Soksanl hu pajeng ba tal mblang Houston, Hoa Kỳ, brei mboh bruk peih paraong darak pasar negar langiu, paglong jien mek tame di bruk mek ia hani bingu la-u pak tỉnh Trà Vinh. Ia hani bingu la-u that Organic 100% yamen bingi, oh hu saradang, pabak asar khoáng saong ngak la-ar dalam rup. Pandap mek hu angan hữu cơ Dunya 2 thun gam.

UBND tỉnh Đắk Lắk bahrau taduan brah khik piah di taneh ia daong ka anek saih thun bac 2023 - 2024. Tui nan, abih tih anek saih hu daong brah thun bac ini dalam tỉnh Đắk Lắk lac jaik 14.000 anek saih. Dalam nan, pakat tiểu học saong THCS hu jaik 9.000 anek saih, pakat THPT hu labaih 5.000 anek saih. Yaok anek saih hu daong 15 kg brah yaok bilan, abih tih brah daong ka anek saih dalam tỉnh Đắk Lắk lac mangaok 1.888 tấn.

Page ini, Jabat An ninh pasang eik Kong an TPHCM brei ba tabiak kaoh tui hukum hinh sự 2 urang piah pasang eik dom bruk ngak suan di Tổng Công ty Lương thực miền Nam (Vinafood 2) saong dom đơn vị pambuak tal. Dom urang njauk ba tabiak kaoh tui hukum lac: Huỳnh Thế Năng (ndih tapui thun 1959; dahlau diah lac Tổng Giám đốc Vinafood 2) saong Đinh Trường Chinh (ndih tapui thun 1974; dahlau diah lac Giám đốc Công ty TNHH Thương mại - Quảng cáo - Xây dựng - Địa ốc Việt Hân). Tui Kong an TPHCM tapa duah thau saong harak tài liệu, chứng cứ duah mboh, thau lac dom urang nan ngak suan hukum dalam bruk khik iek, pandar taneh 33 Nguyễn Du saong 34, 36, 42 Chu Mạnh Trinh, phường Bến Nghé, Quận 1, TP.HCM, ngak khat lahik trak jien padai di Karja.

Ngoại trưởng Trung Quốc Vương Nghị daok ravang Mỹ hu taom gaok Ngoại trưởng Mỹ Antony Blinken di Washington. Ong Vương Nghị hu panuac ieu dua gah oh lac pambuak veik bruk ndom biai nao mai, bo daok njauk brei ndom biai dalam saong abih gah. Lac 2 taneh ia praong, Trung Quốc saong Mỹ hu dom kandah gauk min jeng hu dom kein laba praong haong gauk, jeng yau dom cuang kandah tavak tavaiy njauk ba gauk pacang, talaih. Mbang ravang Mỹ 3 harei di ong Vương Nghị lac bruk bahrau abih dalam rilo bruk ngak di Mỹ saong Trung Quốc piah duah tabiak jalan pasang iek dom kandah gauk saong plaih meriak gauk. Mbang nao di ong Vương Nghị hu gah langyah ndom lac piah caga ka njaom biai pakat glaong abih di Tổng thống Mỹ Joe Biden haong Chủ tịch Trung Quốc Tập Cận Bình di bilan 11 tal di gah langiu nyaom biai APEC​.

Meng harei 28 tal harei 30/10, rilo tỉnh ban dalam negar Lào meda peih pakacah gaiy gilai Boun Suanghuea. Pakacah gaiy gilai thun ini peih ngak haong rilo bruk ilamu, daoh tamia, padhih the thao, ma-in sambai , pandap mbang huak ndung bak ilamo Lào. Karja ban ine Vientiane, tỉnh Luangprabang, tỉnh Khammuane caong khin bruk peih ngak nan pachreih hu yaok pluh ribau bhap bini saomng tuai damuai hu mbaok tame. Tapa nan yaih khan dom ilamo siam gheih meng kan di bhap bini dom bangsa Lào tal dom taneh ia di dunya saong rik tame patagok kinh te. Bruk pakacah gaiy gilai daok hu iek lac tuk bui sambai piah var nao dom bruk haduh hatai saong taduan dom bruk siam mekre, patuah jamo.

Lac taneh ia hu menuac sia rilo abih di bhum Đông Nam Á, Mintri Y tế Indonesia kuhria mboh lac dom menuac njauk ruak đậu mùa khỉ di taneh ia ini meda tagok tal 3.600 urang. Dom harei tapa, dom menuac njauk ruak đậu mùa khỉ tagok rilo di Indonesia, abih di nyu lac di ban ine Jakarta. Kuhria tal harei ini (27/10), taneh ia ini hu 14 urang njauk ruak đậu mùa khỉ, rilo jang tukvak ini thun blaoh. Mintri Y tế Indonesia hu parabha jaik 1.000 mbang vaccine saong klauk jru caga ruak ka labaih 470 urang mbuan njauk ruak đậu mùa khỉ glaong di abih. Indonesia daok pambuak bruk haong ASEAN piah hu gac 2.000 mbang vaccine saong daok brei klauk dahlau ka dom kapul urang mbuan njauk ruak. Gah y tế Indonesia brei patagok pathau khan dom jalan pacang caga ruak đậu mùa khỉ yau ye: khik jalan diukrai hacih sa-at, plaih taom gaok urang njauk ruak./.