Tui Mban tacei pato pacang caga bala di langik tasik saong daong duah urang njauk bala tỉnh Vĩnh Long, dalam bilan 12/2022 meng blaoh, di dalam tỉnh rahtabiak rilo bruk glut jaleih di takai kraong, tui kuhria khat lahik tagok tal yaok piluh tỷ đồng, ngak kan kandah biak praong tal raidiuk di bhap bini. Dom pakat karja daok peih dom bruk ngak daong samar drah piah ka bhap bini tani tanat raidiuk. Ong Lữ Quang Ngời, akaok UBND tỉnh Vĩnh Long brei thau lac, dom mbang glut jaleih rahtabiak dalam tuk mikva daok caga raok thun bahrau nan ye mikva gaok biak rilo kan kandah dalam bruk blei pandap ramik caga Tết. Min, tỉnh Vĩnh Long jeng kham marat piah ka abih tih dom baoh sang njauk kan kandah kayua glut jaleih jeng hu Tết.

Dom urang pan akaok UBND quận 5, TPHCM bahrau taom gaok, jak ba dom sang urang daok di labik 440 Trần Hưng Đạo nao daok di labik bahrau, piah khik salamat ka rup drei, ka drap ar di drei. Tui kuhria, bruk panduan ba nao daok labik bahrau hu peih tabiak meng harei 10/1. Dom sang nan meda daok tạm di chung cư An Phú (labik 961 Hậu Giang, phường 11 quận 6). Chung cư ini bahrau padang, praong, siam, daok di labik mbaok jalan nao mai mbuan lagaih. 2 chung cư ini atah di gauk jaik 4km. Quận 5 daok ba tabiak jalan bồi thường piah pok tagok ban raya. Dalam tukvak daok tạm, bhap bini oh abih jien pah labik, hu khik kajap bruk bayar jien bồi thường ka labik daok di drei labik chung cư klak.

Pambuak tal Danak dak binek Yên Ngựa, hu yaom jien buh tame ngak abih tih labaih 305 tỷ đồng hu peih ngak di dom xã bhum atah bayah Cư Ewi di huyện Cư Kuin saong xã Yang Tao, xã Bông Krang di huyện Lắk, tỉnh Đắk Lắk ngak suai jang tukvak ba tabiak, tagok phun jien rilo jang saong hu rilo bruk daok tavak tavaiy, UBND tỉnh Đắk Lắk bahrau hu harak brei nyim dahlau 75 tỷ đồng piah biyar ka rahra. UBND tỉnh Đắk Lắk jao ka Mban khik ramik danak dak padang ngak jalan mbak saong ngak nong cak rok patagok palei pala pambuak haong Sở Jien padai, Kho bạc kanja samar drah peih ngak dom adat piah biyar jien ka rahra dahlau di harei 19/1/2023. Gam tui di nan, samar drah pasang iek, ngak salah jalan ba tabiak buh jien tame danak dak tani tanat siam lagaih.

Hadei di tuk khan brei báo chí thau ka bruk TP.HCM meda hu ứng dụng piah ka bhap bini tut angan sanya harei đăng kiểm, Sở Jalan mbak pajeng ba TP daok samar ngak ka nyu salah ứng dụng ini piah samar ba tame ngak, lang talaih bruk đăng kiểm daok pandiak di urak ini. Tuk ba tame ngak, ứng dụng meda pabak brei thau ka bruk đăng kiểm, brei ka bhap bini tut angan sanya harei đăng kiểm di 8 tỉnh bhum Đông Nam Bộ. Urak ini dalam TP.HCM daok 8 dalam 17 pasak đăng kiểm ngak bruk haong prein đăng kiểm meng 1.300 - 1.500 radaih yaok harei. Min meng abih tih 27 dalam 53 talei kiểm định lac oh ginup pabak bruk đăng kiểm puac thun.

Bruk pambuak tal panuac di sa tuai damuai mai meng Úc khan lac urang ngak gah hải quan di mblang kapar haok Tân Sơn Nhất ngak kan piah ndok jien, Chi cục Hải quan pabah mbang negar di mblang kapar haok dunya Tân Sơn Nhất (Cục Hải quan TP.HCM) brei thau hu ieu kapul hành lý pathau khan cambaih laih bruk ini. Ong Phan Minh Thảo - chi cục phó Chi cục Hải quan cửa khẩu mblang kapar haok dunya Tân Sơn Nhất khan lac, urang jakar pambuak tal bruk nan dalam clip hu ngak harak brei thau ka bruk nan. Tui ong Minh Thảo, tuk maong iek bruk ini ye mboh tuk camriep hu bruk oh thau hatai haneng di gauk di tuai saong urang jakar hải quan ka yaom pandap pathau khan. Pak ini, urang jakar hải quan ngak suan jalan ngak saong ndom puac oh njauk. Daok bruk tuai lac urang jakar hải quan ndok mbang jien hadei di tuk iek clip jang yau maong iek di camera, chi cục daok ngak cambaih bruk ini veik, daok dalam harak pathau khan di urang kumei jakar hải quan lac oh hu bruk ini.

Dalam kadha ndom puac di tuk pahadar 111 thun harei padang đảng cầm quyền Nyaom roya Bangsa Phi, Tổng thống Nam Phi, ong Ra-ma-phô-sa brei thau, Ủy ban tacei ba bruk taneh ia, hu tabiak bruk brei ngak dahlau dalam thun 2023 lac pataom tame langyah bruk srau kadau năng lượng daok rah tabiak khang di taneh ia ini. Urak ini, labik pabak điện oh tani tanat, bhian lahik điện dui atah di labik praong jeng daok lac sa dalam dom paga pacang praong abih ngan saong bruk patagok kinh tế saong ngak srau kadau raidiuk di taong abih bhap bini Nam Phi.

Tui mbao Nikkei Asia, Nhật Bản meda samar ba tabiak dữ liệu ka chuỗi pabak ngan haong ASEAN piah patagok jang talei pambuak bruk kinh tế haong kapul ini. Mintri Kinh tế, Pablei salih saong Công nghiệp Nhật hu mbaok tame rilo mbang ginum biai haong dom gah pambuak bruk dalam bhum ka khik caga alam saong patagok ilamo ka urang ngak. Tui jalan ngak di anak mata di Nhật lac padang ngak sa hệ thống piah klah rabha khau tin di dua gah haong ASEAN ka pandap panda daok labaih dalam kho, prein ngak saong dom bala cagar veik di chuỗi pabak dalam gah ô tô, điện tử saong dom gah ngak kong karei.

Bang California- lac bang hu rilo urang Việt di Mỹ, gaok kan kandah kayua hajan ribuk haong tuyết kapal. Tal mesup harei 8/1 (mon Mỹ), labaih 330.000 baoh sang saong labik pablei salih di California jeng daok lahik điện. Dom Cty pabak điện daok kham merat pasiam veik điện dahlau di mbang langik jhak bahrau. Jabat tui iek bruk langik tasik Mỹ khan lac, sa hơi ẩm biak kapal dalam langik tasik nduac meng tasik praong, meda ngak brei hajan saong tuyết kapal tal tatuak drei di California dalam akaok adit ini. Dom labik daok di bhap bini daok brei ngak veik ar pacang, tuh mbao cuah pacang ia sua saong caga ka dom mbang lahik điện anak tal./.