Rilo mblang taneh di Binh Thuan hu mek veik 

Patui veik mbang nyaom ka 15, dah page ini, Ủy ban thường vụ Quốc hội (TVQH) brei panuac ka bruk caga ka mbang nyaom ka 4, Quốc hội mbang 15. Tui panuac ba tabiak, mbang nyaom ka 4 hu peih tabiak di harei 20/10. Mbang nyaom tui kuhria hu brei tapa 6 danak dak hukum, 1 danak dak sarak saong brei panuac ka 7 danak dak hukum. Quốc hội pang pathau khan saong ginum biai ka bruk brei tapa jalan cak rok patagok kinh tế - xã hội thun 2023, kuhria dahlau kadung jien kanja saong jalan parabha kadung jien trung ương thun 2023. Pasang iek dom pathau khan di Rajaei ka bruk pacang caga tham nhũng, pacang caga kol tội phạm saong dom bruk ngak suan adat hukum, bruk peih ngak adat hukum thun 2022. Pasang iek pathau khan pataom iek veik, taong yaom bruk peih ngak Sarak ka 30 ka dom sarak pacang caga jit ruak COVID-19…

Tui bruk ba tabiak di Mentri Pato megru, dahlau mon 5 biar harei 17/9, dom labik pato đại học brei khan ka anek saih hu palih ruah mbang ka sa. Meng harei ini, rilo sang bac đại học hu khan ka tukvak brei thau điểm chuẩn palih ruah tame sang bac saong payua tal dom anek saih hu palih ruah tame. Mentri kakei lac, meng harei 16/9 mbiah tal harei 30/9, taong abih anek saih brei mboah tangin tame bac online. Dom labik pato megru, nyaom labik pato megru brei khik kandauk khaw tin  dalam tuk palih ruah, langyah dom nguyện vọng.

UBND tỉnh Bình Thuận bahrau pataom iek  20 thun peih ngak Sarak ka 78 di Rajaei ka bruk brei masaiy jien ka urang kan kathaot. Dalam 20 thun tapa, kadung jien sarak kanja hu buh tame ngak di taong abih dom puk palei, xã, phường, ban sit, rik tame daong ka labaih 61 ribau baoh sang yam tapa kan kathaot, ba bruk ngak ka 67 ribau urang; labaih 65 ribau anek saih, sinh viên gaok kan kandah hu masaiy jien bac. Abih di nyu nan lac dalam tuk jit ruak COVID-19 tamuh tabiak, kadung jien sarak daok hu daong ka dom doanh nghiệp hu masaiy piah biyar jien bilan ka labaih 14 ribau urang ngak padeih ngak.

Thun ini, Đồng Nai hu labaih 400 danak dak njauk brei mek veik taneh di dom nyaom kapol, urang saong mangaok taneh mek veik hu biak rilo phun pala lavik thun. Min Sarak ka 11 di UB bhap bini tỉnh thun 2019 la bruk bayar jien ngan haong dom janih phun pala tuk karja mek veik taneh abih tukvak ngak tui. Kayua yau nan ye, rilo danak dak  daok dalam tuk kuhria yaom jien dom janih phun pala piah bayar jien njauk brei padeih. Bruk nan ba tal kan kandah ka karja palei saong po đầu tư, ngak kan kandah tal bruk peih brei phun jien, ba tal suai peih ngak dom danak dak.

TPHCM urak ini dak abih dom janih vaccine dalam danak dak klauk jru peih praong yau ye sởi, DPT (ho gà, bạch hầu, uốn ván). Bruk ini hu dui atah hadom bilan saong Sở Y TPHCM tế hu 3 mbang hu harak piah ieu kakei Mintri y tế langyah ka bruk ini. Sở Y tế brei thau lac, anak bruk kurang dua janih vaccine ini, ban raya meda mbuan rahtabiak bruk tamuh gilac jit sởi gam haong jit COVID-19 saong jit ruak pandiak tabiak darah.

Tổng Thư ký Liên hợp quốc Antonio Guterres sa mbang tra brei panuac kakei brei caga haong BĐKH samar chip kayua dom bhap bini kathaot rambah abih di dunya daok dang anak bala trak kayua dom D.N brei tathuak khí thải sang camin dalam dom pluh thun tapa. Dalam tuk nao rivang Pakistan birau ini, urang dang akok LHQ brei thau hu mboh dom bhap bini gaok bala meng langik tasik biak trak, ia ribuk blaoh tal apui khuah, dalam tuk bruk BĐKH di dunya oh mbih dang veik.

Dalam sa pathau khan di mangaok Facebook di dah page ini 15/9 (tui maong di pak ni), urang tabiak panuac di Tổng thống Ukraine brei thau, sruh radaih pajeng Tổng thống Zelensky gaok bala mangaok jalan di ban ine Kiev, min Tổng thống oh njauk rambuac trak. Dahlau di nan, truyền thông Ukraine khan brei thau lac, Tổng thống Zelensky hu nao tal ban Izium di tỉnh Kharkov, lac labik njauk kapul Nga saong đồng minh pasang iek anak mbang taong cagar veik urak ini di bol bala Ukraine.

Yaom kaom di Nga trun gam gam adit tal ka 10  kayua bruk trun yaom dom janih njam patam hu rilo urang bei, urang takik blei saong jien ruble tagok dalam dom bilan tapa. Bruk lạm phát meda peih tabiak rilo lagaih ka Gilang pariak pakat negar Nga brei cakak trun jien laba dalam adit anak tal. Tapa pasang iek kayua hãng Reuters ngak ngan haong dom urang ilamu kinh te mboh dahlau Gilang pariak pakat negar Nga meda brei trun jien bala meng 8% trun 7,5% di mbang ginum biai harei 16/9./.

Urang lang : Thu Thảo -Ái Nghiêm -15/9