Bier harei kabroi, dalam mbang nao ngak bruk tui jalan ngak di Tiểu ban Văn kiện Nyaom roya XIV di Ndang, ong Nguyễn Trọng Nghĩa, Bí thư Trung ương Đảng, Akaok Mban Tuyên giáo Trung ương, Thường trực Tiểu ban Văn kiện Nyaom roya XIV di ndang haong dom urang dalam kapul hu mai alin pandap ka anek saih kan kathaot yam tapa kan kandah bac ta-a naih joi saong sang sarak kanja di huyện Thoại Sơn, tỉnh An Giang. Tui nan, kapul hu alin 20 paok pandap ka anek saih kan kathaot yam tapa kan kandah bac taa naih joi di Sang bac học cơ sở Vĩnh Trạch; 30 paok pandap ka sang kathaot saong sang sarak kanja, xã Vĩnh Trạch, huyện Thoại Sơn.

UBND tỉnh Bình Thuận bahrau tabiak jalan peih ngak bruk di Kapul Công nghệ số bhap bini dalam thun 2024. Tui bruk di labik piah rami ramik hadom kapul Công nghệ số bhap bini ka nyu lagaih meng 5 tal 8 urang, meda lac dom urang hu nagan je, sami samar saong hu ilamu pandar thiết bị số, nền tảng số. Bruk ngak di kapul Công nghệ số bhap bini pataom tame pathau khan saong daong ba, tacei pato bhap bini pandar dịch vụ công online, cài đặt, pandar ứng dụng Công dân số Bình Thuận, tài khoản định danh điện tử tanut 2 (VNeID), saong dom bruk karei karei.

Dalam bilan thu thun ini, urang ngak nong di bhum ia taba Gò Công di tỉnh Tiền Giang lac dom huyện: Chợ Gạo, Gò Công Tây, Gò Công Đông, ban Gò Công hu pala drak labaih 4.000 ha njam patam dom janih; dalam nan hu labaih 800 ha pala mala takai hamu, daok veik hu pala di taneh puh chuyên canh. Dom janih njam pahe, njam mbang hala, tangei, ratak, baoh paya, baoh deng, baoh kadaoh, baoh daak,… hu urang ngak nong pilih ruah pala rilo abih. Piah hu ia taba pruh ka phun pala, rilo urang ngak nong hu khik piah ia dalam danao bein, kuac dom binek njuk pabak yaok harei ia meng ribaong tame. nan ye bo luac bilan thu, rilo urang ngak nong bhum ini hu jien mek tame glaong meng pala njam patam.

Hội Chữ thập đỏ huyện Kbang, tỉnh Gia Lai pambuak bruk haong kapul ngak pahla di TP. Rạch Giá, tỉnh Kiên Giang bahrau mai ravang saong alin hadiah 90 pok pandap ka mikva sang kan kandah, sang sarak karja, sang kan kathaot palei Brieng, xã Kông Bơ La, huyện KBang. Yaok pok pandap yaom 300.000 đồng, hu brah, pandap mbang, khan ao saong 100.000 đồng jien mbaok. Taong abih jien piah ngak bruk ini kayua kapul ngak pahla TP. Rạch Giá ieu pataom, jak ba, rik daong. Palei Brieng hu 120 baoh sang, jaik abih lac urang Bahnar. Bhap bini diukrai meng bruk ngak nong. Tuk taduan hu dom pok pandap, mikva uan tabuan lo.

UBND huyện Hóc Môn, TPHCM tabiak panuac lac sang bac THCS Nguyễn Văn Bứa payua harak don oh hu mbaok tame mbang pakacah pilih ruah tame tal 10 ka amaik ame anek saih lac oh njauk adat. Tui panuac tamat di UBND huyện Hóc Môn harei 13/5, Sang bac THCS Nguyễn Văn Bứa brei harak don ka anek saih tut angan tame oh hu mbaok tame pakacah tame tal 10 lac suan adat. Gam tui di nan jeng ieu kakei rami ramik ngak pasiam veik, taong yaom veik bruk ngak di urang pan akaok sang bac, gru pato gam haong dom urang hu pambuak tal bruk vak harak don likau oh pakacah tame tal 10 di sang bac. Mban Giám hiệu sang bac THCS Nguyễn Văn Bứa hu taduan dom bruk suan di drei tuk payua ka amaik ame anek saih mau harak don oh hu mbaok tame pakacah pilih ruah tame tal 10 lac oh njauk tui jalan ngak di jabat pato magru huyện. 

Jaik 50 ban di Trung Quốc brei ramik veik sarak blei sang tui jalan pacadu veik dom bruk ngak catang saong pachreih blei sang di đô thị piah jhul tagok veik darak pasar sang danaok taneh riya. Dalam sa bruk ngak bahrau di abih, ban Hàng Châu, pasak tỉnh Chiết Giang, gah Timur Trung Quốc saong ban Tây An, pasak tỉnh Thiểm Tây, gah Tây Bắc taneh ia ini di akaok adit blaoh hu tabiak panuac lac brei klaak taong abih dom bruk ngak catang dahlau daih dalam bruk blei sang. Urak ini bruk đầu cơ sang angaok darak pasar oh daok hu rilo yau dahlau, bruk pacadu dalam blei sang lac lagaih haong adat hukum saong njauk haong hatai caong di rahra.

Dom mbang khuah glai akaok bilan daok pambak tabiak praong di gah pai negar Canada mbang ralai takik di nyu 10.000 héc-ta glai saong tui nan,  kanja brei ba yaok rabau rahra tabiak truh labik ini. Di labik British Columbia, glai khuah rilo jang dua mbang hadei di sa harei. Di bhum labik Alberta, dua labik khuah glai biak trak damak rahtabiak jeng ka oh pasang iek hu, di pak ini daok hu mboh 43 mbang apui khuah. 6 kapul daong padam khuah saong 13 sruh kapar haok trực thăng daok hu ba mai piah pasang iek dom labik khuah di pak ini. Bruk panduan rahra tabiak truh labik khuah jeng daok hu peih praong tal rilo labik.

“Bingu hồng hala hadah”, sa janih phun hu khik caga pakat 2 di taneh ia, daok dalam bruk biak nguy cấp, mbang camereip hu mboh di labik khik ramik langik tasik pakat negar Phật Đỉnh Sơn Quý Châu, Trung Quốc. Ngô Húc - Urang roh duah di Đại học Quý Châu saong lac urang di kapul pasang iek brei thau, kapul hu duah mboh 4 phun “Bingu hồng hala hadah”, nyu bhian tamuh di tapen glai di labik glaong 700 mét duk haong mbaok ia tasik, sro tui phun kayau saong raak bingu bhong meriah. “Bingu hồng hala hadah” lac janih tok hu di Trung Quốc./.