Ndem ka bruk kurang cuah padang ngak di gah kreih negar saong gah Tây Nam Bộ, Phó Thủ tướng Trần Hồng Hà ieu kakei Mintri jalan mbak pajeng ba, Mintri Tài nguyên saong Môi trường pathau khan ka bruk kurang cuah, pandap piah lam, dar ka nyu samu tapak mbaok haluk di gah kreih negar saong Tây Nam Bộ tui panuac khan di dom gah truyền thông saong hu ba tabiak jalan langyah cambaih laih. Urak ini jalan cao tốc labik Cần Thơ - Hậu Giang saong Hậu Giang - Cà Mau, caong hu abih tih labaih 1 trieu 3 rituh 7 piluh m3 patau dom janih saong labaih 1 trieu 7 rituh ribau m3 taneh pacang tagok. Tapa pasang iek, patau, taneh nền jalan hu ginup ka danak dak ini. Daok cuah đắp nền lac labaih 18 trieu 5 rituh ribau m3 (njauk padang ngak dalam 18 bilan piah cang glut jaleih) jeng daok kurang.

UBND tỉnh Đồng Nai hu harak payua UBND TP.HCM ka bruk padang ngak rilo jang 3 baoh tatua bahrau pambuak Đồng Nai haong TP.HCM. Klau baoh tatua tapa kraong pambuak Đồng Nai haong TPHCM hu tatua pambuak ban Thủ Đức haong xã Tam An, huyện Long Thành; tatua pambuak bhum gah meraong ban raya haong huyện Nhơn Trạch saong tatua salih ka phà Cát Lái. Đồng Nai lac pabah mbang gah timur di TP.HCM. Bruk padang ngak 3 tatua ini hu daong trun meneing dom radaih nao mai di dom tatua daok hu urak ini, jhul patagok KTXH oh lac di Đ. Nai haong TPHCM, bo daok brei ka abih labik gah meraong negar.

Tal urak ini, dom labik di dalam tỉnh Trà Vinh hu brei masaiy paok jien jaik 65 tỷ đồng piah daong sang daok ka labaih 1.820 sang hu buh prein ka cách mạng gaok kan kandah ka sang daok. Piah dom bruk daong sang daok ka dom urang hu buh prein ka cách mạng mek hu siam lagaih, So padang ngak Trà Vinh ba tabiak jalan lac dom labik njauk ngak siam bruk pasang iek, padang angan njauk manuac tui njauk adat, oh brei ngak maluk gauk, ngak cabaih laih angan saong tanut daong padang ngak sang danaok ka dom urang hu buh prein ka CM piah ka rahra gam pasang iek. Urak ini dalam tỉnh Trà Vinh daok 122 dalam abih tih 1.943 baoh sang di urang hu buh prein ka CM ka oh padang ngak hu.

Dalam dom harei jaik ini, di tỉnh Hậu Giang daok hu ia kakur kapal di tuk saboh mesup ngak ka jit palai pajoa tamuh tabiak rilo di mangaok phun padai Đông Xuân 2022-2023. Piah patrun patakik jit alai pajoa tamuh tabiak saong njaom mbak praong, khik caga ka phun padai khang kadang, khik hu năng suất siam tuk yuak, Chi cục Pala drak saong Khik caga phun pala tỉnh hu panuac ieu dom bilai pala drak saong khik caga phun pala, peih bruk pato, pasram, tacei urang nong dom jalan ngak piah pacang caga siam ka phun pala. Urang nong meda pruh jru caga ruak patih hala saong peit pot asar padai takik di abih lac 2 mbang dahlau saong hadei di tuk padai sraoh samu gauk.

Mintri Ilamo, Thể thao saong Du lịch bahrau tabiak sarak pok angan Harei pataom uan lisei bahrau di urang Bru Vân Kiều di xã Ngân Thủy, huyện Lệ Thủy lac inem krung ilamo oh maong mboh pakat negar. Harei pataom uan lisei bahrau di bangsa Bru Vân Kiều daok di xã Ngân Thủy, huyện Lệ Thủy bhian hu peih ngak hadei di tuk yuak padai puh di bilan 10 saong 11 saka ia bilan yaok thun. Harei pataom gam hu yaom glaong gah sajarah saong ilamo bangsa, gam rik daong dui pachreih dom urang roh duah ilamo, tuai rivang main mai duah thau, ba drei tame raidiuk ilamo rahra di pak ini.

Tui roh duah bahrau abih di Viện 5 Gyres di Mỹ, dom hareik hareim meng katak tuh tame dom tasik praong daok tagok oh ka bhian mboh kuhria meng di thun 2005 saong meda tagok rilo jang 3 mbang di thun 2040 meyah dunya oh hu jalan ngak bahrau halei piah pacang cakak bruk ini. Dalam vaktu meng thun 1979 tal 2019, tui kuhria hu jaik 171 rabau tỷ hareik katak sit seik dalam tasik praong di thun 2019. Hareik katak biak jhak ka tasik praong. Kayua nyu ngak nerak halau ia saong ba tal njauk jru mek ka hadang ikan kaya tasik tuk nyu mbang njauk nerak katak.

Tuk daok pajeng 800.000 lít manjek nhiên liệu công nghiệp meng tỉnh Bataan (jaik ban ine Manila) tal bhum kreih negar Philippines harei 28/2 meng blaoh, gilai Princess Empress njauk karam di langiu tasik, kayua tasik magei. Nhiên liệu diesel saong manjek kapar meng gilai nyu ngak tachrauk alam bhum tasik saong mblang tasik di 9 ban di tỉnh Oriental Mindoro. Manjek njom tabiak jeng hu mboh atah di gilai labaih 130 km. Bruk ini ngak ka urang mboh huac lac mbuan ngak kan kandah tal labik daok di dom janih sinh vật tasik saong rạn san hô jang yau raidiuk di rahra vil val tasik. Urang jakar jeng daok kham marat duah jalan nao jaik baoh gilai karam di mala tasik.

Menuac di Liên hợp quốc tui iek gah Afghanistan brei thau, Liên hợp quốc hu panuac ieu pok jien daong praong abih tagok tal 4,6 tỷ đô la dalam thun 2023 piah daong ka Afghanistan. Min pok jien daong ini meda njauk cakak trun tuk karja Taliban tabiak rilo adat pakauk urang kumei, oh brei urang kumei ngak bruk. Kuhria meng di tuk tagok pan karja di Afghanistan dalam bilan 8/2021, gah Taliban pakauk oh brei urang kumei nao bac trung học saong đại học, oh brei nao tal mblang bein saong oh brei ngak bruk ka dom gah cứu trợ./.