UBND TP.HCM bahrau peih bruk jao Jai thuong Trần Đại Nghĩa mbang ka 1 ka 12 urang di dom sang bac cao đẳng, trung cấp saong pasak pato bruk ngak. Dom urang hu jao jai ini lac dom urang jakar, gru pato hu rilo thun ngak bruk dalam gah pato magru di ban raya ngan haong dom hatai anit ranam bruk ngak rik tame, biak njauk piah pok mayaom. Urak ini TP.HCM hu 371 labik pato bruk ngak ngan haong 80% urang bac hu bruk ngak hadei di tuk bac blaoh, pabak ka darak pasa urang ngak jaik 125.000 urang ngak hu ilamo yaok thun.

Tỉnh Cà Mau bahrau hu gac 24 pandap hu pok brei angan OCOP 3 patuk. Tui bruk ba tabiak, tal thun 2025, tỉnh meda hu 5 pandap hu pok brei angan OCOP 5 patuk. Jaik abih dom pandap OCOP di palei hu pambuak pagam haong rilo labik pablei salih điện tử. Hu dom pandap daok hu pablei tapa dom darak pasar Canada, Australia, Singapore, Trung Quốc… Tapa bruk peih ngak danak dak OCOP, tỉnh Cà Mau pamaong tal jhuk patagok kinh tế palei pala khang kajap tui jalan patagok bruk chuyển đổi số saong kinh tế tuần hoàn.

Tukvak 2021-2025, tỉnh Trà Vinh buh tabiak 390 tỷ đồng peih bruk rami ramik veik gah ngak nong tui gah jalan cak rok patagok khang kajap, paglaong chất lượng, yaom patagok saong prein maraik gauk di kaya nong. Dalam nan, thun 2023 meda rami ramik jaik 50 tỷ đồng meng kadung jien kanja piah peih ngak sarak daong ngak veik gah ngak nong di 9 huyện, ban sit, ban dalam tỉnh.

Tal tukvak ini, tỉnh Bà Rịa – Vũng Tàu hu 50 hợp tác xã ngak nong khang hatai ba jamriak tame ngak, tapa nan patak pataom hu rilo tukvak saong menuac ngak, ba mai rilo kein laba kinh tế. Di Hợp tác xã Ngak nong - Dịch vụ An Nhứt, huyện Long Điền, labaih 200 ha padai hu pambuak gauk ngak, tam drak samu gauk, pandar kapal haoh oh hu menuac peih piah pruh jru halak, biak siam lagaih. Bruk ini daong patrun bruk khat lahik padai meng 150-200 kg/ha duk haong pruh jru meng tangin.

Daok jaik 2 bilan tra lac tal Tết Nguyên đán 2023, tukvak ini, dom po sang bein pala bingu dalam tỉnh Bình Thuận daok jar var sangka ka bingu Tết. Urak ini, dalam tỉnh hu labaih 24 ha pala bingu Tết, rilo meng lac dom bingu meng kan yau ye cúc, vạn thọ, trường sanh.... Tui mikva urang nong pala bingu, langik urak ini rahtabiak sarau kadhau, pandiak hangin ngak ka phun suai praong tagok, langiu di yaom pandap panda ngak nong, jien blei pajaih jeng tagok glaong jang thun dahlau, patagok jien buh tame.

Rajaei Japon kuhria caik tabiak 45 ribau tỷ Yên Japon, samu 333 tỷ đô la Mỹ brei ka bruk quốc phòng dalam 5 thun tal kuhria meng thun jien padai patui di nan. Ini hu maong lac pok jien brei ka quốc phòng praong oh ka bhian mboh di Japon, tagok jang labaih 60% duk haong pok jien quốc phòng brei ka 5 thun meng blaoh. Thủ tướng Japon hu panuac ieu nội các tui bruk paglaong papraong kadung jien karja brei ka bruk quốc phòng tagok samu 2% abih tih yaom pandap ngak tabiak dalam taneh ia dalam 5 thun, meng jaik 1% yau urak ini.

Gilang paraik kanja Indonesia (BI) bahrau pathau khan jalan peih ngak pandar đồng rupiah kỹ thuật số dalam tuk daok tamuh khang bruk gaiao dịch kỹ thuật số di taneh ia ini. Urak ini, Indonesia pakauk pandar jien điện tử piah biyar jien, min brei adat ka taong abih dom bruk giao dịch drap ar kỹ thuật số di darak pasa pandap panda di harei hadei ka bruk buh jien tame. Tui pathau khan di BI, bruk giao dịch gilang paraik kỹ thuật số di Indonesia hu patagok dua paka dalam dom thun tapa.