Biar harei 13/2, patui mbang nyaom ka 20, UBTV Quoc hoi brei panuac blaoh saong khan tapa dom Sarak brei padang tabiak, ba tame, ramik pasiam veik jalan taneh đơn vị hành chính di 10 tỉnh: Bình Dương, Bắc Ninh, An Giang, Quảng Nam, Vĩnh Phúc, Thái Nguyên, Bến Tre, Bắc Kạn, Đắk Lắk saong Trà Vinh. Tui sarak pathau khan di Rajaei, ngan haong tỉnh Bình Dương, dak padang ban Tân Uyên njuak khik tamo 191,76 km2 taneh, bhap bini 466.053 urang, 10 phường saong 2 xã di ban sit Tân Uyên. Bình Dương oh salih karei taneh, bhap bini, dom đơn vị hành chính cấp huyện, cấp xã min tagok 1 ban raya, trun sa ban sit, hu 9 đơn vị hành chính cấp huyện saong 91 đơn vị hành chính pakat xã. Yau nan, tỉnh Bình Dương urak ini hu 4 ban nan lac: Thủ Dầu Một, Dĩ An, Thuận An saong Tân Uyên.

Melam 13/2 (tui mon pak nan), hadei di tuk par tal mblang kapal haok ban Istabul, Thổ Nhĩ Kỳ, kapul daong duah urang njauk bala di Bol bala bhap bini Việt Nam hu nao tal ban Antakya di tỉnh Hatay daok gah meraong taneh ia ini piah daong duah urang gaok bala dalam mbang megei baoh taneh. Kapul daok di mblang caoh mbanh Antakya, peih bruk ngak pak di melam nan. Dahlau di nan, Thường vụ Quân ủy Trung ương, Mintri Quốc phòng brei kapul QĐND Việt Nam nao daong duah urang gaok bala di Thổ Nhĩ Kỳ, kapul hu 76 urang lin.

Thông tư 02 thun 2023 ramik pasiam veik Thông tư 15 thun 2016 di Mentri Y tế ba tabiak ka ruak kayua bruk ngak hu taduan mbang tui BHXH birau ba tabiak. Dalam nan brei pabak ruak COVID-19 tame angan dom janih ruak kayua bruk ngak hu mbang tui BHXH, meng harei 1-4-2023. Mentri Y tế brei thau cambaic laic ruak COVID-19 nan lac sa janih ruak kayua bruk ngak. Ruak tamuh tabiak dalam tuk ngak bruk kayua urang hu taom gaok haong virus SARS-CoV-2 hu dalam labik ngak bruk. Mentri Y tế jeng tacei pato dom urang ngak bruk, bruk ngak angaok nan brei dut iek ruak COVID-19 kayua njom mbak dalam tuk ngak bruk meng harei 1-2-2020 mbiah tal harei 1-4-2023 hu ngak hồ sơ ruak kayua bruk ngak piah pasang iek saong hu mbang tui sarak ruak nghe nghiep tui bruk ba tabiak yau urak ini.

Yaom sara daok hu blei di tanut glaong min urang ngak sara di tỉnh Bạc Liêu oh daok hu sara piah pablei. Makna lac kayua dom mbnag hajan suan bilan dalam tukvak tapa ngak brei ralai dom asar sara caga kuac mek di mblang sara, ngak brei urang ngak sara patih tangin. Yaok thun, di tukvak ini, urang ngak sara di tỉnh Bạc Liêu yam tame kuac mek sara mbang ka 2 dalam bilan ngak sara, yau nan bo meng dahlau Tết tal ini, mikva having akaok tuk mblang sara jaik jeng asar ye hu hajan suan bilan ngak brei ralai abih. Meng jaik 1.500 ha, Bạc Liêu lac sa dalam dom labik hu taneh ngak sara praong dalam taneh ia, lngik oh lagaih ngak ka bruk ngak sara di mikva gaok kan kandah, glaih glar.

Harei ini 14/2, darak pasar dahlau harei Le Meyut meyau -Valentine di Ban raya HCM brei mboh, biak chreih chrai, meng cửa hàng pablei bingu, patau đá quý tal siei thi hu biak rilo janih, danak dak khuyen mai; ta-eng bingu hồng tagok yaom. Labaih 90% bingu hồng hu tagok meng 2 tal 3 mbang dut saong bhien harei. Tui nan, kuhria rah tapa yaok paok atau yot bingu hu yaom meng 450 ribau đồng tal 2 trieu dong; daok veik jaik abih pandap alin karei ka harei ini ye hu pablei trun yaom.

Mesup ini (14/2), New Zealand tabiak bruk samar drah pakat negar piah pandar abih prein khang pacang caga ribuk Gabrielle. Ini lac mbang ka 3 New Zealand ba tabiak bruk samar drah pakat negar. Ribuk Gabrielle tuh tame New Zealand meng harei 13/2 ba tui hajan praong labaih 100 mm saong hangin praong jang 100km/h di rilo labik ngak ka rilo sang danaok, jalan mbak khut jaleih. Ribuk ngak ka raidiuk di jaik 65 rabau menuac, labaih 120 rabau baoh sang di Đảo Bắc lahik điện. Rajaei New Zealand jeng brei thau pok jien yaom 11,5 triệu NZD piah daong dom labik njauk bala, daong ka bhap bini, padang dom gilang pandap mbang. Tal urak ini jeng oh ka kuhria hu abih dom khat lahik meng ribuk Gabrielle .

Dom po bein pala bingu di Colombia oh huac jien pablei bingu tabiak negar langiu di harei Meyut meyau thun ini. Dom urang payo meyut meyau brei bingu alin ka gauk di harei Tình nhân rik tame labaih 15% jien mek tame yaok thun di urang pala bingu Colombia- sumu 45.000 tấn. Colombia lac labik pabak pablei bingu ka Mỹ dang akaok saong lac labik ngak tabiak rilo bingu dang dhi dua di dunya hadei Hà Lan. Dom lo bingu pablei tabiak negar langiu di Colombia dalam thun 2022 kuhria tui jien labaih 1,74 tỷ USD saong dom urang pala bingu kuhria mboh dahlau meda daok tagok veik dalam thun 2023 kayua langik tasik hu lagaih, bilan ia kakuan katut veik di dom labik pala bingu.

Tui sa pasang iek hu peih ngak haong 1.000 urang Japon dalam umo thun meng 17-19 ka bruk ndih tapui anek di anak tal kayua Kadung jien Nippon (Nhật Bản) peih ngak, hu tal 46% urang ranaih umo di Japon brei thau, urang khin hu anek di anak tal, min labaih sa meteh dalam dom urang nan ndom lac, trak damak gah kinh tế saong kan kandah dalam bruk ngak urak ini, lac paga pacang praong ka bruk ndih tapui anek. Hu 69% dom dam dara di Japon hu tangi sua brei thau lac,, nan lac kan kandah gah jien padai, saong 54% brei thau lac kan kandah di bruk ngak haong bruk iek glang anek bhik./.