Page ini 12/9, di Sang Quốc hội, ala tacei ba di Akok QH Vương Đình Huệ, UBTVQH  peih Nyaom biai mbang 26 brei panuac ka rilo asar kadha hu makna praong kuhria caga ka Mbang nyaom ka 6, Quoc hoi mbang 15. Mbang nyaom peih ngak dalam 3 mbang ( mbang ka sa, meng harei 12 tal harei 14/9; mbang 2, meng harei 18 saong 20/9 saong mbang 3, harei 29/9). Di mbang nyaom, Akok QH Vương Đình Huệ khan lac, UBTVQH meda brei panuac tame rilo danak dak Hukum, dalam nan brei panuac mbang akok meti ka Hukum Thủ đô ( pasiam veik)saong brei panuac  mbang ka 2 tame danak dak Hukum Taneh riya (pasiam veik) saong Hukum BHXH (pasiam veik). Ndem ka bruk tui iek, UBTVQH  brei panuac tame harak pathau khan di Kapol tui iek kadha chuyen de di QH; pasang iek  harak pathau khan meng dom jabat ka bruk peih ngak dom Sarak di QH ka bruk tui iek saong Sarak tangin sua saong calei meng akaok vaktu ngak bruk tal ini.

Dalam thun ini, “Kadung jien kayua urang kan kathaot” tỉnh Bình Phước daok daong padang ngak 746 baoh sang jumpataom piah ka urang kan kathaot, mikva bangsa takik samar drah tani tanat raidiuk. Tui Ủy ban Mặt trận negar Việt Nam tỉnh Bình Phước, tukvak anak tal, tapa bruk paglaong jak ba daong ka Kadung jien “kayua urang kan kathaot”, Kadung jien daong di tỉnh saong an sinh xã hội; peih ngak “bilan tabung glaong kayua urang kan kathaot”. Bruk praong lac padang ngak sang jum pataom; sangka dom urang sarak kanja, urang gaok kan kandah dalam xã hội,  patrun 1.000 baoh sang kan kathaot.

Bilan padai Hè thu thun ini, urang ngak nong tỉnh Tiền Giang biak chreih chrai kayua padai hu yaom glong. Hadei di tuk yuak blaoh, kuhria rah tapa urang pala padai laba jaik 40 trieu dong sa ha. Urak ini, UB bhap bini tỉnh Tiền Giang  brei yuak padai Thu đông di dom huyen gah Pei piah palaik njiak njom ia mbak ngak khat lahik padai bilan Đông xuân 2023-2024, min rilo baoh sang bhap bini daok trun pajaih padai bilan hadei, oh ngak tui bruk ba tabiak brei padeih ngak piak palaik njom ia mbak. Anak bruk nan karja saong gah ngak nong pathau khan, jak ba brei padeih oh ka hu jalan ngak halei pakauk. Tui kuhria mboh dahlau, bruk njom ia mbak bilan thu 2023 -2024 sumu thun 2015 -2016. Kuhria taong abih ia hajan thun ini takik jang dom thun meng 5 tal 10%.

Dom thun tapa, mikva bangsa takik di xã Văn Giáo, ban sit Tịnh Biên, tỉnh An Giang hu cak rok Palei manyim khan bai Khmer piah duh ka bruk rivang ma-in, pasiam raidiuk. Meng di tuk padang ngak Palei manyim meng kan, UBND xã Văn Giáo hu peih 3 tal pato bruk manyim khan bai ka 90 urang kumei bangsa Khmer di pak ini; kaoh tabiak meng kadung jien kanja xã 125 triệu đồng daong blei pandap ka 25 baoh sang kan kathaot meng jalan brei masaiy oh kuhria jien laba. Gilang paraik sarak kanja jeng daong ka dom baoh sang hu hatai caong masaiy blei pandap panda, ngak bahrau kik manyim. Pandap panda khan bai Khmer Văn Giáo langiu di bruk pablei di dom tỉnh Nam Bộ daok hu pablei tapa dom taneh ia Thái Lan, Campuchia, Myanmar saong dom taneh ia karei.

Viện kiểm sát bhap bini tỉnh Bình Dương brei ba tabiak langyah tui hukum, chap kareih Hồ Văn Trí (umo 51 thun, palei An Giang) piah pasang iek duis “ Pametai manuac”. Dahlau di nan, harei 2/9, ong Trí saong diuk angan Nguyễn Thị Loan daok ndem meyai di bilik daok pah di Ban Tân Uyên. Trí medil diuk di drei hu likei karei nan ye su-al tangi catang, hadei di nan klauk to tame kakoi saong tung ba tal diuk njauk rambuac. Mehit sap iew daong, urang daok jaik nan mai ba muk Loan  tame taong ruak, daok ong Trí tabiak mbaok kkan brei cong an thau. LĐLĐ tỉnh mai rivang, daong urang 10 trieu đồng. Kapol urang kumei Ban Tân Uyên alin pandap ia tasau saong 3 trieu dong ka anek muk Loan pak di sang daok pah.

Tổng Bí thư Đảng Lao động Triều Tiên, akaok Ủy ban Quốc vụ Triều Tiên Kim Jong-un daok nao rivang negar Nga. Dalam tukvak daok rivang Nga, ong Kim Jong-un ginum biai haong Tổng thống Putin. Tui kuhria di gah papar sap dunya, ong Kim Jong-un saong ong Putin meda ginum biai ka bruk Triều Tiên pabak phao ndao ka Nga. Gah thông tấn Yonhap di Hàn Quốc ba dom khau tin brei thau lac, mayah hadei di tuk Triều Tiên saong Nga jhul tagok hu siam bruk pasram mesuh haong gauk, lin tasik meda hu makna lac pasak.

Harei 11/9 tui tukvak Mỹ, rilo ban saong tieu bang di Mỹ peih ngak dom bruk pahadar 22 thun harei khủng bố khang harei 11/9/2001 ngak ka jiak 3.000 urang metai. Tapa bruk nan, Tổng thống Joe Biden hu kadha ndom puac di labik bol lin di Ban Anchorage (tiểu bang Alaska). Anak dom bol lin, Tổng thống Biden ndom lac taneh Mỹ oh var bruk khung bố harei 11/9/2001, min jeng hu panuac lac, tapa bruk nan nyu daong jhul patagok bruk jum pataom  di bhap bini Mỹ tagok glong oh bhian mboh.

Hadei di rabuk Haikui daok hu hajan biak khang ka oh bhian mboh di Labik tự trị bangsa Choang Quảng Tây di Trung Quốc, lac labik jaik taphia haong Việt Nam. Tui kuhria mboh di 257 bilai tui iek bruk langik  tasik di dalam ban, hu tal 11 bilai hu ia hajan pataom di labaih 400 mm. Mbang hajan khang ka oh bhian mboh ngak brei 115 mbang glut jaleih taneh di ban Ngọc Lâm, ngak tayah jalan mbak, ngak jaleih rilo phun kayau, ngak glut jaleih saong ngak ka kanja gam gam ba tabiak panuac kakei samar drah. Kuhria tal urak ini, hajan khang oh padeih luac 3 harei tapa ngak ka takik di nyu 7 urang metai, 3 urang lahik, labaih 1000 urang daok gar./.