Daong urang ngak gaok kan kandah kayua jit COVID-19 meng Kadung jien BH thất nghiệp

UBTVQH njauk hatai brei patabiak sarak brei adat patui bruk buh jien daong urang ngak gaok kan kandah kayua jit COVID-19 meng Kadung jien BH thất nghiệp. Tui nan, UBTVQH brei adat pandar labaih 1.155 tỉ đồng meng jien daok labaih di Kadung jien BHTN mbiah tal abih thun 2021 piah bayar jien daong ka labaih 414.000 urang ngak hu mbang tui Sarak 03 di UBTVQH, payua hồ sơ njauk tukvak. Tukvak peih brei jien suai abih lac di harei 10/9/2022.

Ndom ka bruk klaak hộ khẩu meng ba-ar, Đại tướng Tô Lâm, Akaok Mintri Công an brei thau, bruk klaak hộ khẩu ba-ar hu ngak tui adat di Hukum Cư trú, tal harei 31/12, hộ khẩu ba-ar oh daok pandar. Min tavak tavaiy praong abih urak ini, lac daok hu rilo bruk caik ka bhap bini brei pandar hộ khẩu ba-ar. Kayua yau nan ye, brei samar ngak ginup căn cước công dân piah ka bhap bini mbuan lagaih ngak harak gar. Tuk nan, bhap bini oh cang  xác nhận di jabat halei, kayua nan lac harak gar duy nhất piah nao ngak dom janih harak gar karei. Đại tướng Tô Lâm jeng brei thau, bruk công an mek veik harak hộ khẩu ba-ar tuk ini lac tui sang, tui bruk, Mintri Công an oh ka tabiak bruk mek veik sổ hộ khẩu.

Urak ini, dalam tỉnh Bến Tre hu 10 cụm CN hu padang  ngak ngan haong taneh praong labaih 374 ha. Dom cụm CN hu 25 danak dak tut angan buh jien tame ngak, rik daong ba bruk ngak ka jiak 10.000 urang ngak dalam tỉnh. Tui Sarak  nyaom roya Đảng tỉnh Bến Tre mbang XI, vaktu 2020-2025, bruk ba tabiak yaok huyện hu sa cụm CN takik abih 70 ha. Yau nan ye, tỉnh hu ba tabiak bộ tiêu chí pachreih urang buh jien tame cụm CN; jhul pakhang bruk salih hành chính, salih birau lagaih jalan buh jien tame ngak mbang, ba mbuan lagaih piah dui pachreih urang buh jien tame ngak mbang.

175 urang jakar, urang ngak bruk gah y tế bahrau hu Akaok UB bhap bini tỉnh Bạc Liêu pok brei Harak meyaom, kayua ngak hu rilo bruk dalam taong ruak saong pacang caga jit ruak dalam tukvak tapa. Dom thun tapa, hu bruk sangk di Mintri Y tế, bruk pan akaok ba jalan, tacei pato samar drah di urang pan akaok tỉnh saong dom mban ngành, gah Y tế tỉnh ngak hu rilo bruk praong, pabak bruk iek ruak, taong ruak, iek glang prein yava ka bhap bini, abih di nyu lac dalam bruk pacang caga jit ruak Covid-19.

Anak bruk TP.HCM rah tabiak gam dom mbang njauk jru mek methanol, kuhria meng harei 15/8 tal Mban khik iek pandap mbang hacih sa-at Ban raya HCM brei peih bruk pasang iek dom D.N ngak tabiak pandap, chế biến, pablei salih, blei alak tame, mbia, ia nyum hu cồn; D.N pablei salih dịch vụ mbang menyum hu pablei alak, mbia, ia menyum hu cồn pablei di labik. Dalam nan pataom tame pasang iek pandap hu meng halei di dom pandap alak, mbia, ia menyum hu cồn, pandap ngak tabiak alak, mbia, ia meyum hu cồn. Tui nan, duah thau alak hu meng halei, mbia ia menyum hu cồn oh hu salamat. 

Dom akaok Mintri di dom taneh ia Đông Nam Á (ASEAN) haong dom gah pambuak bruk ndom biai brei thau veik panuac sanya jhul patagok bruk oh hu hạt nhân di Bán đảo Triều Tiên. Langiu di nan, daok hu panuac brei thau veik bruk pachreih tui dom kham merat di dunya piah mek hu bruk oh hu hạt nhân, meda pasang iek hu cambaih laih saong oh ngak karei hu di mangaok Bán đảo Triều Tiên meng jalan hòa bình.

Labaih 1.000 urang lin daong padam khuah daok glaih glar piah padam apui khuah glai praong di bhum Tây Nam negar Prang. Rajaei bhum labik ini brei thau kuhria meng harei 9/8, pui khuah glai mbang abih labaih 68km taneh glai di bhum Gironde saong tỉnh Landes jaik nan, dalam tuk Prang jeng yau rilo taneh ia châu Âu daok dang anak langik pandik bhang di bilan Hè. Apui khuah glai ba tal labaih 10.000 urang brei panduan ba nao labik karei saong ngak khut tayak takik abih 17 baoh sang.

Takik di abih 20 urang metai dalam bruk tabaleik gilai harei 11/8 di mangaok kraong Yamuna di Banda, bang Uttar Pradesh, gah barak Ấn Độ. Cảnh sát brei thau, sruh gilai pajeng bak tuai tableik kayua ngin khang, tuk nan mangaok gilai hu labaih 30 menuac. Bruk daong duah urang njauk bala jeng daok hu ngak dalam sami samar./.

Urang lang: M. Phuong & Bhumi – 12/08