Patui danak dak mbang nyaom ka 32, harei ini, UBTV Quoc hoi pasang iek Harak pathau khan ka bruk ba tabiak brei ramik pasiam jalan buh jien tame ngak Danak dak  pakat negar patagok kinh te - xa hoi bhum urang bangsa takik saong bum ceik  vaktu 2021 -2023; brei panuac ka danak dak Hukum pasiam veik, pabak dom paka di Hukum Jru tavao; Pasang iek harak pathau khan bruk jak ba bhap bini halan hatian  di Quoc hoi bilan 3 thun 2024 saong brei panuac ka Danak dak di Akok negar ka bruk mbaoh harak Hiep uoc mesre jien di negar CHXHCN Việt Nam saong Gilang Pariak Tái thiết saong Patagok dunya kayua Danak dak hạ tầng brei patagok dahlau saong patagok  đô thị lagaih haong BĐKH ban Vinh, tỉnh Nghệ An.

Tỉnh Tiền Giang hu baoh durian pablei tapa negar langiu dang akaok taneh ia, haong 155 bein phun durian hu brei mã số bhum pala saong 66 labik blei hu brei mã số labik tame paok, lac rilo abih dalam taneh ia. Min baoh durian di pak ini siam oh yau gauk, hu 4 doanh nghiệp pablei baoh durian njauk gah Trung Quốc bayar veik. Nan ye, piah paglaong bruk meriak gauk, bruk pasiam baoh durian daok hu dom po bein saong dom gah chức năng biak caik hatai sangka, dalam nan hu bruk lac dahlau di tuk ba baoh durian pablei tapa negar langiu, dom doanh nghiệp brei pasang iek tani tanat. 

Xã La Dạ, huyện Hàm Thuận Bắc, tỉnh Bình Thuận hu labaih 70% bhap bini lac urang bangsa takik, bhap bini daok atah di gauk yau nan ye kan buh jien tame ngak jalan ba ia pandar. Rilo thun tapa, ia pandar di bhap bini pagam pambak tame langik tasik yau kuac bingun ia; mek ia meng kraong, craoh. Bruk ini hu padeih abih meng thun 2023 kayua xã La Dạ  hu sang mac pabak ia. Sang mac ia La Dạ  prein khang  1.500 met khoi sa harei melam pabak ia hacih ka labaih 1.600 baoh sang, mikva sahanang hatai  pandar ia hacih, raidiuk prein yawa hu siam tagok bika ralo.

Bộ Tư lệnh Bhum Cảnh sát tasik 3 bahrau brei saoh 1.000 bình ia menyum ka bhap bini huyện Bình Đại, tỉnh Bến Tre. Ini lac mbang peih mbaok ka bruk daong ia menyum hacih sa-at, ia taba piah pandar, daong ka bhap bini tỉnh Bến Tre saong dom tỉnh gah pai. Langiu di nan, Bộ Tư lệnh Bhum Cảnh sát tasik 3 daok hu pambuak bruk haong karja dom palei peih pathau khan mikva patak pataom ia pandar saong pandar ia hacih sa-at, khik caga prein yava, alam langik tasik, abih di nyu lac dalam tuk pandiak bhang, ia njaom mbak daok rah tabiak khang. 

UB bhap bini tỉnh Cà Mau hu tabiak panuac samar chip ka bruk pandiak bhang tua riya  pakat dua di dua huyen Trần Văn Thời saong U Minh. Di tỉnh Cà Mau meng akaok bilan 4 mbiah tal ini tok 2 harei hu hajan, kuhria abih tih  hajan  di dom balai  dut mboh biar jang kuhria rilo thun tapa  meng 75 -100%. Pandiak bhang ngak khut jaleih labaih 600 labik, glut taneh kuhria abih tih atah jaik 16 km, kuhria tui jien khut lahik labaih 20 tỉ đồng. Langiu di nan, yaok ribau baoh sang  kurang ia taba. UB bhap bini tỉnh Cà Mau iew dom gah chuc nang saong bhum palei  brei pandar dom jalan samar chip piah caga saong pasiam veik hadei bala rah tabiak kayua langik tasik ba tal.

Thủ tướng Singapore Lý Hiển Long luai ngak di harei 15/5 tal saong yaih khan Phó Thủ tướng Lawrence Wong piah pok ngak Thu tuong. Hu thau, ong Lý Hiển Long, umo 72 thun, meda pathau khan tagok Tổng thống Singapore angan ong Wong piah pok ngak Thu tuong. Urak ini ong Wong daok lac Phó Thủ tướng gam ngak akaok mintri jien padai Singapore. Dalam harak pathau khan hu labik lac, ong Wong taduan hu bruk pachreih tui di taong abih dom nghị sĩ dalam đảng Hành động Nhân dân cầm quyền saong meda tagok pan bruk di harei 15/5 tal. 

Manuac sia dunya biak suh sah hatai ka bruk rah tabiak di Trung Đông lac labik mbuan rah tabiak sraw kadau pambak praong hadei bruk Iran taong tame negar Israel di harei 14/4. Tong Thư ky LHQ Antonio Guterres iew brei ein sabe, saong ndom lac taong abih labik di bhum Trung Đông daok dang anak bruk mesruh metak biak trak damah hadei dom bruk nan. Dalam tuk nan, urang brei panuac An ninh  Taneh ia Nhà Trắng John Kirby khan lac, Mỹ oh khin laik tame bruk mesruh metak haong Iran. Ong Kirby khan veik, dalam mbang iew phone meyai haong  Tổng thống Mỹ Joe Biden, Thủ tướng Benjamin Netanyahu khan lac oh duah bruk ngak catang  tagok haong Iran.

Tui jalan kuhria ngak di rajaei Anh, uranaih umo mala 16 thun meda njauk pakauk oh brei pandar mạng xã hội. Facebook saong WhatsApp meda lac dom ứng dụng njauk pacang khang jang gah umo thun di negar Anh. Langiu di nan, meda pakauk, oh brei uranaih umo mala 16 thun blei smart phone. Dom jalan kuhria ngak nan, tui kuhria hu khan brei thau di jhung bilan 4 ini. Dom amaik ame di negar Anh daok hu ieu brei panuac ka umo thun uraniah hu pandar dom blah mạng xã hội, dalam  umo meng 13 - 16 thun./.