Page ini, di Sang Quoc hoi, UBTVQH peih pakak mbang nyaom kadha hukum bilan 4. Dalam 3 harei ngak bruk, UBTVQH brei panuac ka rilo asar kadha hu makna praong, dalam nan hu danak dak Hukum Căn cước công dân (pasiam veik). Bruk pasiam veik Hukum CCCD daok hu manuac sia biak caik hatai sangka piah pasiam veik piah salih birau  bruk khik iek bhap bini, khik brei bruk ngak po, quyen bhap bini, pakhang bruk pandar  ilamu kong nghe, paglong bruk ngak lagaih, yaom pandar di Cơ sở dữ liệu taneh ia ka bhap bini, the CCCD tame bruk khik iek karja, patagok kinh te - xa hoi.

Ngak bruk haong Mban thường vụ Tỉnh ủy Bình Thuận ka bruk nội chính, pacang caga tham nhũng, tiêu cực; bruk salih pasiam adat hukum thun 2022 saong 3 bilan akaok thun 2023, ong Phan Đình Trạc, UV Bộ Chính trị, Bí thư Trung ương Đảng, Trưởng Ban Nội chính Trung ương ieu mBan Thường vụ Tỉnh ủy Bình Thuận peih ngak ka nyu siam jang dom sarak di Trung ương. Tacei pato langyah dom bruk yak bak, pataom rilo menuac, abih di nyu lac dom bruk pambuak tal agama, bangsa, taneh riya... samar, drah, oh caik tamuh tabiak jeng labik pandiak. Gam haong nan, tỉnh njauk patagok tui iek, khik catang kỷ luật, kỷ cương; patagok bruk khik ramik karja di dom gah mbuan ngak suan, mbuan hu tiêu cực, abih di nyu lac gah taneh riya, môi trường, padang ngak sang danaok, y tế…

 Kadung jien bac  Vừ A Dính gam haong urang daong ngak pahala birau alin brei tapak 113 paok jien bac ka anek saih bangsa takik hu raidiuk kan kandah di tỉnh Sóc Trăng yaok paok 1 triệu đồng saong 20 paok jien bac Kalup kapol “Kayua Hoàng Sa - Trường Sa anit ranam” brei anek saih lac anek kamun urang jakar, urang lin Bien phong tỉnh. Tỉnh Sóc Trăng hu labaih 35% bhap bini lac urang bangsa takik. Tal urak ini, dalam tỉnh hu padang ngak 10 sang bac bangsa gam bac gam daok saong jak ba dom urang ngak pahala rik jien tame brei rilo paok pandap ka dom adei hu raidiuk kan kandah, ba mbuan lagaih ka dom adei nao bac.

Dom labik dalam tỉnh Ninh Thuận daok peih bruk brei brah daong mbang 1 ka anek saih bhum biak kan kandah, daong ka dom adei sahanang hatai nao bac da-a. Tui Sở pato Megru tỉnh Ninh Thuận, dalam tỉnh hu 2.856 anek saih bangsa takik daok di 5 huyện lac: Bắc Ái, Ninh Sơn, Thuận Bắc, Ninh Hải saong Thuận Nam hu daong brah mbang ini. Yaok anek saih hu taduan 4 bilan, samu 60 kg brah. Bruk brei brah daong hu peih tabiak ngak tal harei 14/4.

Sở Jalan mbak pajeng ba di  TP.HCM birau payua harak tal Công ty TNHH Công nghệ xanh DP padeih bruk ngak di tapen kraong dalam negar di tatua ka 2 bein Bạch Đằng, Quận 1; peih bruk panduan ba oh hu bayar jien, yak klak danak dak pambuak tal bruk ngak di tapen ia di tatua ka 2 saong oh pataok  dom kalan dalam negar  di tatua ka 2 tuk oh ka brei sarak adat hu thẩm quyền. Meng harei 1/4,  Kong ty TNHH Công nghệ Xanh DP brei padeih dom bruk ngak di labik tatua  tame kapal saong brei padeih peih kapal drah samar. Mbiah tal ini, Kong ty bayar veik 6.000 vé kapal cao tốc ka tuai damuai. Doanh nghiệp caong khin Ban raya samar hu jalan peih ngak brei ramik piah samar ngak bruk gilac, abih di nyu nan lac tuk padeih le 30.4 anak tal.  

Campuchia pateok 19 urang Japon. Dom urang ini mboh medil lac pambuak pagam tal dom bruk pachot online saong pachot tapa phone tangin. Dom urang ini jeng lac likei, umo meng mangaok 20 tal jaik 60 thun, mboh medil lac pachot pok jien điện tử BitCash yaom 250.000 Yen (jaik 1.870 USD) meng sa urang kumei umo mangaok 60 thun di Tokyo tuk bilan 1. Gah pasang iek, duah thau mboh lac sa dalam dom urang nan, lac menuac di sa kapul nyaom tội phạm.. Jalan ngak di kol ini, lac pachot  urang daok hu dom yaom jien oh ka bayar abih tuk tut angan dom website di Japon.

Han Wuoc brei panduan ba yaok rituh urang kayua apui khuah glai praong di ban tapen tasik Gangneung. Hangin khang ba tal labaih 70 baoh sang samar njauk apui khuah abih, 520 urang njauk brei panduan ba nao tal labik karei. Han Wuoc brei ba 2.700 lin daong padam apui saong labaih 300 sruh radaih kham pacang saong padam apui nan. Jabat Khí tượng Han Wuoc  brei thau, hangin di bhum taneh Gangneung yuh khang 103 km sa mong. Hangin ba tal jabat khik iek gah radaih pui brei klak peih takik di nyu yaok pluh  mbang gilai pajeng tuai di labik ini.

Thun ini, Nga pahadar 78 thun Jayah dalam mesruh metah khik caga taneh ia (1941-1945). Bruk duyệt binh praong di harei jayah 09/05 di ban ine Matxcơva daok hu ramik caga, peih ngak. Dahlau di nan, akaok mintri Quốc phòng Nga brei thau, labaih 10.000 urang lin saong 125 tapon pan phao kraong, pandap quân sự hu mbaok dalam Lễ duyệt binh jayah di Matxcơva. Ong khan lac, dom bruk duyệt binh pahadar 78 thun jayah hu kuhria caga peih ngak di 28 ban di Nga. Abih tih, labaih 55.000 menuac saong 1.200 đơn vị phao ndao saong pandap quân sự hu mbaok tame./.