Hadei di 2 harei meteh ngak bruk sami samar, njauk bruk, UBTVQH ngak salah taong abih bruk ba tabiak, danak dak ba tabiak saong brei tamat Mbang nyaom ka 8 di harei 17/2. Di mbang nyaom ini, UBTVQH brei panuac ka Hukum Cảnh sát cơ động; danak dak Hukum pasiam veik, pabak dom paka di Hukum Sở hữu trí tuệ, pasang iek, pathau khan bruk caong khin di bhap bini dalam bilan 1 di Quoc hoi…Daok bruk pasang iek, brei tapa dom bruk hu makna praong dalam, UBTVQH hu brei tapa hukum Sarak ka bruk padang dom phường di xã Phổ Yên saong padang ban Phổ Yên, tỉnh Thái Nguyên.

Bier harei kabroi 17/2, di Bến Tre, Kapul ngak bruk di Mintri jalan mbak pajeng ba kayua Thứ trưởng Nguyễn Duy Lâm ba akaok hu ngak bruk haong urang par akaok UBND 2 tỉnh Bến Tre saong Tiền Giang ka bruk peih ngak danak dak tatua Rạch Miễu 2, pambuak tỉnh Tiền Giang saong Bến Tre, piah khik ka danak dak hu peih ngak di puac bilan 3/2022. Danak dak tatua Rạch Miễu 2, atah labaih 17,6 km, praong yau jalan pakat IIIbhum taneran, pabak hu 4 jalan radiah praong saong 2 jalan ka dom janih radaih ngan haong yaom jien buh tame ngak abih tih lac 5.175 tỷ đồng, tui jalan đầu tư công.

Lambaok BHXH Ban raya HCM brei thau, ban hu 60.000 D.N, đơn vị daok tavak sre jien BHXH kuhria mboh jaik 3.100 tỷ đồng, tagok jaik 45% dut saong thun 2020. Dalam nan, hu jaik 1.000 đơn vị blei BHXH labaih 6 bilan saong meng 300 trieu đồng tagok saong yaom jien abih tih labaih 1.655 tỷ đồng, meblah 53,3% saong rilo D.N di gah kapal haok. Langiu di nan, rilo đơn vị, D.N daok tavak jien BHXH dalam tukvak atah  saong yaom jien labaih 10 tỷ đồng…

  Du lịch biak sa bruk ngak mbang kinh tế hu makna praong ngan haong bruk rik daong labaih 15% GDP; jeng lac labik du lịch padieh padei ka tuai dunya tal Việt Nam saong lac labik ravang me-in, duah thau, pachreih hu rilo tuai dunya – nan lac bruk pamaong tal di danak dak cak rok patagok Du lịch Ninh Thuận tukvak 2021-2025, pamaong tal thun 2030 hu Sở Ilamo – Thể thao saong Du lịch tỉnh Ninh Thuận pathau khan di bier harei kabroi. Tui nan, Ninh Thuận kuhria tal thun 2025 raok 3.500.000 mbang tuai, dalam nan hu 455.000 mbang tuai dunya; tal thun 2030 raok 6.000.000 mbang tuai, dalam nan hu 900.000 mbang tuai dunya. Abih tih yaom jien mek tame meng du lịch tal thun 2025 lac 2.900 tỷ đồng.

Kapal haok ka QH2386 di hãng kapal haok Bamboo Airways par trun mblang kapal haok Rạch Giá - tỉnh Kiên Giang mong 1 jala pandiak harei 17/2 yau brei thau bruk peih jalan par Rạch Giá - Phú Quốc. Jalan par tapak Rạch Giá - Phú Quốc hu 3 mbang par dalam 1 adit, lac harei ngar, harei jip saong harei sanecar.

Labaih sa mateh rahra Mỹ ginup prein hu klauk mbang vaccine patagok dalam tuk jaik 80 triệu urang njom COVID-19 hu brei thau di taneh ia ini. Dom urang ilamo kuhria mboh lac labaih 73% urang Mỹ pacang hu haong biến thể Omicron saong dom urang nan meda tagok tal 80% di krieh bilan klau. Bruk ini meda ngak brei dom ruak hanjul jang di dom urang hu klauk jru, trun manieng dom virus daok pambak tabiak, rik tame bruk patakik dom bruk tamuh tabiak jit ruak bahrau. Sang iek ruak saong dom labik iek ruak jeng oh daok tapa prein.

Thủ tướng Cam-pu-chia Xam-đếch Tê-chô Hun Sen (Samdech Techo Hun Sen) harei kabroi 17/2 brei thau, taneh ia brei klauk jru ka uranaih umo meng 3 tal 5 thun dalam tuk dom urang njom Covid-19 birau tui harei kayua biến thể  Omicron daok tagok rilo. Ong Hun Sen ndom lac, meng di tuk biến thể Omicron tamuh tabiak di  Cam-pu-chia di bilan 12 thun blaoh, mbiah tal ini hu labaih 20% dalam dom urang njom ruak lac uranaih umo meng 5 thun trun. Kayua yau nan ye, “ bruk njauk brei samar chip lac klauk jru ka uraniah umo meng 3 tal 5 thun piah khik ka uranaih pacang veik bruk njom mbak di biến thể Omicron”.

Tui urang lambaok pakat glaong di sarak saron mbon saong đối ngoại di Liên minh châu Âu (EU) - ong Giô-xép Bô-reo (Josep Borrell), EU meda ba tabiak dom bruk taong phat biak catang tuk mboh lac lagaih, mayah bol bala Nga mai tame jaik tal jalan tapen negar haong Ukraine. Dahlau di nan, ong Giô-xép Bô-reo hu panuac lac châu Âu daok dang anak dom bruk bruk jhak tal sron mbon khang di abih, kuhria meng hadei di tuk Chiến tranh Lạnh. Min, urang ngak praong ni jeng hu panuac lac “meda hu” sa jalan langyah ngoại giao ka bruk sarau kadhau urak ini pambuak tal Nga saong Ukraine./.

Urang lang: Thu Thao & A.Nghiem – 18/2/2022