Tui Mentri Y te, umo lakhah kuhria rah tapa mbang akaok meti di urang Viet Nam dalam vaktu  2019 - 2023 lac  labaih 27 thun. Thun 2023, umo tok diuk mbang camereip di urang likei Viet Nam lac labaih 29 thun. Umo tok pasang mbang akaok meti di urang kumei labaih 25 thun. Bruk ndik tapui anek di urang kumei jeng mboh salih karei.  Urang kumei ban raya suai ndik tapui anek saong takik ndik tapui anek jang urang kumei di palei pala. Urang kumei  di nyaom kathaot abih lac ndik tapui rilo anek abih, yaok urang ndik tapui labiah 2 urang. Urang urang kaya meda saong gap mbiah ndik tapui 2 urang anek.

Piah paglaong siam lagaih bruk pacang taong mek tui hukum IUU pachreih di Uy mban chau Au EC, gam daong urang nao tasik patakik kan kandah, khik tani tanat bruk di jamraik pasang iek hu pagam angaok gilai ikan, tinh Binh Thuan daong jien ka jitvu vệ tinh pasang iek bruk angaok tasik di gilai ikan. Tui nan, gilai ikan atah meng 15m ba tagok, hu pagam jamraik pasang iek bruk di gilai angaok tasik tui njauk hukum hu daong jien ka yitvu vệ tinh pasang iek bruk angaok tasik di gilai ikan lac 175.000 dong/gilai/bilan. Bình Thuận urak ini hu jaik 2.000 gilai ikan atah abih meng 15m ba tagok hu daok dalam bruk brei pagam jamraik VMS tui hukum.

Dalam vaktu 2024 - 2025 saong pamong tal thun 2030, Long An brei parabha labik daok tani tanat  ka bhap bini tui quy hoạch, ke hoach di dom labik bhum taphia negar. Tui nan, dom baoh sang, urang halan hatian mai daok di labik tapen negar, yaok baoh sang  hu daong 75 trieu dong piah padamg sang daok, pandap mbang saong ia pandar. Dom baoh sang oh hu taneh pala drak  piah ngak mbang pagap tanat raidiuk daok hu brei bac pasram bruk ngak, duah bruk ngak. Bruk peih ngak sarak angaok nan piah ramik veik, brei labik daok tani tanat, suai lavik, hu raidiuk siam jang labik daok klak  ka dom baoh sang halan hatian  tal dom bhum taphia negar.

Tal tukvak ini urang ngak hamu tinh Hậu Giang hu yuak jaik salah blaoh mbang padai Thu đông, hu jaik 26.000ha, yuak hu jaik 5,6 tấn/ha. Urak ini rilo mblang hamu dalam tỉnh, hadei tuk yuak padai Thu đông blaoh, urang ngak hamu daok jal val ramik hacih mblang hamu piah drak pajaih padai bilan Đông xuân.

UBND huyen Bù Đăng, tỉnh Bình Phước birau peih ngak danak dak di Harei pataom “ Danei miat yawa thaok brah di soc Bom Bo” pahadar  50 thun peih paha huyen. Bruk praong di Harei pataom hu danak danak daoh tamia “Thaok brah lathung tangin - Raong bol bala mesruh”. Dom ragam tamia, kadha daoh saong thaot binguk  hu brei mboh veik bruk thaok brah raong bol lin di urang bangsa S’Tiêng dom thun mesruh metak. Bruk nan oh lac ndung bak makna yaih khan  gah yulit bo daok pathau khan, pato sajarah dakrai cach mang, hatung hatian bangsa, jalan diukrai “ Menyum ia hadar halau ia”.   

Philippines bahrau ba tabiak bruk kakei dahlau, samar chip srap gap pacang caga rabuk Usagi - rabuk mbang ka 5 tuh tame negar ini. Tui Jabat Kuhria mboh dahlau Langik tasik Philippine, rabuk Usagi urak ini tuh tame bhum tasik gah Pur negar ini, taphia kaoh pulao Luzon, dom labik gah Barak saong Kreh Luzon meda mbuan gaok hajan praong, angin khang saong mbuan ia dauk ia sua. Urang jakar ngak praong di  Philippines hu ieu dom rahra takik nao tasik saong brei hu dom jalan pacang caga piah khik brei salamat. Dalam sa bilan tapa, Philippines gaok gam gam 5 rabuk praong, ngak takik abih 159 urang metai, ngak biak kan kandah tal raidiuk di rahra.

Khí  cacbonic (CO2) tathuak tabiak di dunya, kuhria gam thak meng bruk cuh nhien lieu hoa thach tagok glong abih dalam thun ini. Urak ini, khí cacbonic di dunya kuhria thun ini abih tih labaih 41 tỷ tấn, tagok dut saong 40 tỷ tấn di thun dahlau. Ralo meng thak tathuak tabiak nan mai meng bruk cuh dang, menyek, saong khí đốt. Kayua yau nan ye, dom urang ilamo kakei meyah oh cakak thak trun chip, baoh taneh meda pandiak tagok tal 1,5 độ C saong yam tapa tanut nan.

Akaok meti meng thun 2025, Mentri Y te Australia peih ngak sa danak dak hu angan lac “Harei hadei di kol drei” di labaih 3.000 sang bac piah pachreih anek saih oh pandar pakao hala ndian tu. Danak dak pataom tame dom anek saih tal 7 saong tal 8, dalam thun umo caong ba drei tame bruk bahrau saong caong brei mboh asar rup di drei. Tui kuhria meng Mentri Y te Australia brei mboh, 1 dalam 6 anek saih trung học di taneh ia ini hu pandar pakao hala ndien tu./.