Ba sap bangsa tame danak dak pato pakai daong ka bhap bini bangsa takik khik ramik ilamu di drei

Rilo anek saih jeng daok meluh, ngak suan dalam tuk tut angan caong khin tame bac dom sang bac đại học, kayua yau nan  abih Mentri Pato hu brei peih veik hệ thống tut angan caong khin palih ruah tame đại học thun 2022 mbiah tal 17 tuk harei ini 23/8, piah ba mbuan lagaih ka dom anek saih  eng drei tut angan, pasiam khaw tin. Ini lac bruk ba mbuan lagaih puac abih piah anek saih salah bruk tut angan palih ruah tui caong khin di drei.

Urak ini, dalam taneh ia hu 30 tỉnh hu peih pato sap bangsa takik di 700 sang bac, patabiak 8 danak dak sap bangsa (Chăm, Khmer, Gia Rai, Ba Na, Ê Đê, Mông, Mnông, Thái); saong 6 bộ tapuk pato sap bangsa (Chăm, Khmer, Gia Rai, Ba Na, Mông, Ê Đê); 23 tỉnh, ban peih pato sap bangsa dalam sang bac phổ thông... Dalam nan, praong di abih lac bruk pato sap Khmer (hu jaik 1,3 triệu urang Khmer, meblah 7% rahra). Bruk pathau khan meng sap bangsa, ba sap bangsa tame danak dak pato pakai, gam daong ka bhap bini bangsa takik khik ramik ilamu di drei, gam khik hu samu gauk dalam bruk mbang tui dom yaom glaong ilamu saong pato pakai.

Sở Ngak nong saong patagok palei pala tỉnh Trà Vinh birau peih pakak balai njuk pruh ia pandar công nghệ birau akaok meti di tỉnh. Balai njuk pruh ia hu padang di xã Ngãi Hùng, huyện Tiểu Cần di ribong 3 bilan 2, lac labik meda njuk pruh ia ka labik bhian kurang ia di bilan pandiak bhnag. Danak dak hu hệ thống brong ba ia saong balai njuk pruh ia, 5 brong peih, hệ thống điện. Kuhria abih tih phun jien buh tame nmgak labaih 244 tỷ đồng. Balai ba tame pandar meda langyah hu bruk kurang ia pala drak tuk pandiak bhang, njom ia mbak; rik tame jhul pakhang bruik ramik pasiam gah ngak nong patgaok palei pala hu khang kajap.

Bruk jit ruak pandiak tabiak darah di tỉnh Long An hu rilo srau kadau. Meng akaok thun tal ini, hu labaih 7.000 mbang urang njauk ruak pandiak tabiak darah, tagok jaik 9 mbang duk haong tukvak ini thun 2021 saong hu 8 urang metai kuhria tal tukvak ini. Huyện Đức Hoà hu urang ruak pandiak tabiak darah rilo abih dalam tỉnh ngan saong jaik 3.000 urang. Tal tukvak ini, jit pandiak tabiak darah di huyện ini hu trun min jeng daok hu 50 urang ruak yaok harei. Ta-eng sang iek ruak Đa khoa khu vực Hậu Nghĩa tal urak ini hu labaih 450 urang ruak pandiak tabiak darah, urang ruak trak jeng rilo jang duk haong tukvak ini thun bloh.  

Cục Cảnh sát Hình sự Bộ Công an (C02) birau pambuak saong Công an Ban raya HCM, Công an tỉnh Sóc Trăng, Công an Ban Cần Thơ…chap khik kol blah mek drap ar  di Ban raya HCM saong dom tỉnh bhum Pei negar. Tui khaw tin camereip, di Ban raya HCM saong dom tỉnh gah Pei  rah tabiak rilo bruk blah drap ar angaok jalan mbak. Kol nan hu kapol nyaom di nyu saong oh huac hagait, urang kol nyu blah ralo meng lac kumei cuk talei koi ameh atau bak kadung peih nao angaok jalan. Kol blah bhian peih radaih gah lukuh pagui tui blaoh blah mek drap ar. Hu urang njuak rambuac biak trak. Hadei di tuk hu bhap bini khan brei thau,  công an dom tỉnh ban tame pasang iek, duah thau.

Urang brei panuac di Mintri Ngoại giao Mỹ Ned Price hu panuac tah klaak dom panuac di  Iran lac Mỹ ka oh khin pambuak veik thỏa thuận hạt nhân 2015 haong Iran, kayua oh ka javap jalei panuac ba tabiak di EU. Panuac nan piah tah klaak dom panuac di gah Iran ba tabiak dahlau di nan lac Mỹ daok dui atah tuk oh ka javap jalei panuac ba tabiak bahrau abih di  EU. Min Mỹ hu mboh bruk kham merat saong siam tagok tuk Iran yau daok klaak nao bruk ndok  Mỹ ba Gah Vệ binh Cách mạng Hồi giáo Iran tabiak truh angan dom kapul nyaom khủng bố taneh ia langiu di Mỹ.

Takik di nyu 7 urang metai saong 10 urang karei njauk rambuac hadei di tuk tabung sang di Sang megik Islam jaleih di tỉnh Sindh, gah Meraong Pakistan. Labaih 100 urang gar ala dom patau kayau tuh trun. Tui urang jakar paka nan, bala nan rah tabiak  tuk page harei kabroi tukvak pak nan, tuk urang daok ndih dalam samegik, piah plaik njiak ia sua. Dom urang nan lac menuac plaik njiak ribuk ia sua khang meng labik di Pakistan. Bruk ba tal jaleih tabung sangmegik  kayua hajan saong hangin khang.

Hadei di  2 thun kreik pabah mbang sang bac kayua COVID-19, harei kabroi 22/8, yaok triệu uranaih di Philippines hu mai veik sang bac tame thun bac bahrau. Piah caga ka bruk peih pabah mbang veik dom sang bac, Rajaei Philippines brei patagok bruk klauk caga COVID-19, saong khan lac meda brei radaih pajeng anek saih nao mai oh mek jien mbiah tal puac thun 2022. Rajaei Philippines jeng daok ginum biai dom pok jien daong ka anek saih saong amaik ame di anek saih oh hu jien ka bruk bac da-a di anek bhik./.

Urang lang: Bhumi & M. Phương – 23/08