Tui yaok pataom bahrau abih di Mintri Y tế, dalam bruk pacang caga jit COVID-19, tal urak ini dalam taneh ia hu 33 tỉnh, ban bhum hijao; 23 tỉnh bhum kanjik saong 7 tỉnh, ban bhum katam lac Thừa Thiên Huế, Bình Định, Bình Phước,  Tây Ninh, Vĩnh Long Hậu Giang  saong Ban Hải Phòng; Oh daok tỉnh halei lac bhum bhong. Dalam 2 adit gam gam, Ban raya Hồ Chí Minh khik hu angan lac “bhum hijao”, pakat 1. Ini hu taong yaom lac sa bruk biak siam, abih di nyu nan lac dalam tuk dom urang njom ruak bahrau, trak tagok saong metai yaok harei di ban ini trun khang. 

Tỉnh Trà Vinh dok jhul samar bruk peih ngak danak dak bruk ngak negar  padang ngak palei pala bahrau, piah mek hu tanut palei pala bahrau dahlau di thun  2025. Dalam 2 thun  2022 - 2023, tỉnh kham merat hu bahrau 8 xã song  3 huyện mek hu  chuẩn palei pala bahrau. Piah mek hu bruk ni, tỉnh ieu pataom dom pren khang meng Trung ương, puk palei song dom pren khang karei karei piah peih ngak danak dak; brei buh prein daong dahlau ka dom  xã biak kan kandah, xã bhum palao tasik hu sang kathaot glong, dom puk palei hu tanut  palei pala bahrau biak bier. Urak ni, dalam tỉnh hu  77 dalam 85 xã mek hu tanut palei pala bahrau, 21 xã mek hu angan  palei pala bahrau paglong.

Meng harei ini tal tuk tết nguyên đán thun sak rimaong, tỉnh Lạng Sơn saong Quảng Ninh brei padieh bruk taduan radaih pajeng baoh kayau that, kaya tasik caik laar tapa pabah mbang negar dunya. Bruk brei padieh ini, lac kayua doanh nghiệp, urang ngak di Trung Quốc hu padieh Tết aval jang yaok thun. Dalam tuk nan, meng harei paguh tỉnh Lào Cai jeng brei padieh bruk taduan radaih pajeng baoh kayau that tagok pambah mbang negar dunya di jalan ka II Kim Thành. Urak ini hu labaih 700 sruh radaih pajeng baoh kayau daok ndih di dom mblang pataom gah langiu pambah mbang negar Kim Thành cang ngak adat brei tapa.

Meng akaok bilan sa tal ni, bruk pablei thanh long di  Bình Thuận gaok kan kandah kayua yaom trun khang. Nan ye, rilo urang pala  thanh long brei pah radaih pajeng thanh long tame  TP.HCM, Bình Dương song tagok  Lâm Đồng pablei yaom meng  5.000 -7.000 đồng sa kg. Tui yaom ni urang pala  jeng tok ginup phun jien. Tui kuhria, baoh thanh long paik di  Bình Thuận dalam tuk Tết Nguyên đán 2022 labaih 120.000 tấn. Dalam tuk nan, bahrau hu 111 labik  blei khik piah dalam kho la-an hu abih tih lac 16.000 tấn. Anak bruk ni, Sở Công Thương Bình Thuận hu panuac cong dom doanh nghiệp, hợp tác xã palih ruah jalan pablei tabiak tapa pabah lamnge, peih prong drak pasa pablei dalam negar, pataom tame dom labik pablei rai, dom siêu thị dalam taneh ia.

Klau hãng kapal haok praong lac VietNam Airlines, VietJet saong Bamboo Airways bahrau mbaoh tangin tame harak peih ngak dom jalan dui pachreih, yaih khan thaot binguk du lịch Phú Quốc, Kiên Giang lac labik tal salamat, brei mboh angan je labik tal piah rivang main di Việt Nam. Tui amuk Nguyễn Duy Linh Thảo, Giám đốc Pasak pachreih bruk buh jien tame ngak mbang saong rivang main tỉnh Kiên Giang, ngak pasiam, cak rok patagok du lịch jalan kapar haok lac sa bruk ngak hu makna praong ka bruk ngak pasiam saong cak rok patagok dom bruk pablei salih nao mai, buh jien tame ngak di tỉnh. Kayua yau nan ye, Kiên Giang caong khin lac dak harei dak pasiam veik darak pasa tuai du lịch, pasiam viek dom bruk pabak ka bruk pambuak tal di gah du lịch.

Bol bala Hàn Quốc bahrau brei thau, Triều Tiên hu cuk  2 tên lửa đạn đạo jalan katut panak mboh yau cuh meng sa mblang kapan haoh  di ban ine Bình Nhưỡng tuk mesup ni . Rajaei Japon  dahlau di nan jeng brei thau ka bruk cuk iek mbang ni, dalam nan Chánh văn phòng Rajaei Japon  Mát-sư-nô Hi-rô-ka-du  hu panuac lên án bruk  cuk nan, lac  bruk  đe dọa ngan song siam mekre salamad di bhum taneh ni. Ni lac mbang cuk iek  tên lửa ka 4 gam gam dalam  bilan ni di  Triều Tiên, ngak catang tagok bruk dalam bhum.

Dalam tuk daok tagok khang di abih dom urang njom ruak, Phi-líp-pin daok brei ba tabiak sarak “Oh klauk jru, oh par” ngan haong tuai dalam taneh ia piah jhul patagok glaong di abih bruk klauk vaccine Covid-19. Piah hu brei adat tagok kapar haoh, tuai njauk ba tabiak hu harak klauk ginup 2 mbang vaccine Covid-19 kayua karja palei pabak brei, harak lac klauk bloh vaccine kayua Mintri Y tế pabak brei atau harak oh njauk klauk vaccine kayua Kapul Đặc nhiệm pabak brei. Dahlau di nan, Philippines hu ba tabiak sarak “oh klauk jru, oh nao radaih”, dalam nan dom urang ka oh klauk vaccine Covid-19 ginup oh hu pandar dom dịch vụ nao mai ka rahra.

Ban  Grenoble di Prang bahrau taduan hu angan"ban ine hajao di châu Âu" 2022, kayua  Ủy ban châu Âu alin brei, meng hu panuac sinya biak khang lac jeng sa ban khang kajap jang, kayua bhap bini song meng bruk pambuak gauk di bhap bini. Thị trưởng Grenoble khan lac: “Langik tasik di ceik Alpes njauk jhak jang jaik 2 mbang duk saong dom labik karei. Nhiệt độ di pak ni tagok  2 độ C  dut song dahlau deih song kol hulin brei ngak khang piah khik ramik alam môi trường." Dahlau di nan angan ni  hu jao ka ban Lahti di Phần Lan./.

Urang lang: Thu Thao & H.Pha -17/1/2022