Dom bruk glut jaleih di dom tỉnh ĐBSCL gam gam rahtabiak

Urak ini daok tame tukvak tabung glaong di bilan hajan, dom bruk glut jaleih di kraong Tiền, kraong Hậu saong dom ar tasik di dom tỉnh ĐBSCL gam gam rahtabiak. Tui Tong cục pacang caga bala meng langik tasik, tal urak ini, bhum ĐBSCL hu takik di nyu 751 labik glut jaleih atah abih tih tagok tal 976km. Urak ini hu labaih 20.000 baoh sang bhap bini di dom tỉnh Đồng Tháp, An Giang, Vĩnh Long, Cà Mau, ban Cần Thơ… daok tapen dom kraong mbuan glut jaleih glaong, njauk samar drah panduan ba nao daok di labik karei.

Beir harei 20/7, 4 urang tong ikan di tỉnh Bình Định gaok bala tuk tong chap di bhum tasik atah ban Nha Trang (Khánh Hòa) 121 hải lý hu kapan pandap PACIFIC SPIRIT (Hồng Kông) dong srong tagok. 4 urang tong ikan ni seik di angaok tasik atah di kapan ikan kram BĐ 91464 TS labaih 1,2 hải lý. Dahlau di nan, tukvak 9 tuk 13 minite dalam harei , kapan ikan BĐ 91464 TS (400CV) hu 4 urang, kayua ong Lê Văn Minh (daok di Hải Cảng, ban Quy Nhơn, Bình Định) ngak thuyền trưởng dok peih di bhum tasik atah ban Nha Trang 121 hải lý njauk ia tame, mbuan si kram. Urak ni, kapan PACIFIC SPIRIT dok pabak, piah jao 4 urang di kapan BĐ 91464 TS ka kapan SAR 27-01.

TP.HCM hu thuong chip 150 triệu đồng ka Nguyễn Việt Phong anek saih tal 12, Sang bac THPT chuyên Lê Hồng Phong, 1 dalam 4 anak saih mek hu huy chương ameh di mbang pacacah Olympic Hoá học dunya thun 2022. Ong Nguyễn Văn Hiếu, Yam ndok Sở Pato magru TP.HCM brei thau, biak lavik, TP.HCM meng hu anek saih mek hu jak jeng glaong yau nan. Ini lac bruk kham marat di adei jang yau di dalam sang, sang bac saong gru pato hu pato ka adei.

Harei ni, TAND TPHCM hu langyah 2 urang hu angan Nguyễn Võ Quỳnh Trang (ndih tapui thun 1995, di tỉnh Gia Lai, dok di quận Bình Thạnh) song Nguyễn Kim Trung Thái (ndih tapui 1985, dok di quận 1) dalam bruk uranaih kamei N.T.V.A. umo 8 thun, njauk tong phaok ba tal metai di boh sang chung cư di quận Bình Thạnh. Ni lac, bruk hu bhap bini biak caik hatai sangka. Luật sư khik ramik quyền ka boh sang di adei N.T.V.A. hu panuac ieu TAND TPHCM salih duas ka Nguyễn Kim Trung Thái- lac ame pajeng di adei A meng"ngak pap urang karei " tapa"pametai menuac".

Kapul doanh nghiệp TP.HCM hu peih tabiak bruk pilih ruah angan “Doanh nghiệp, doanh nhân ban raya.HCM hu angan je thun 2022” meng harei 20/7 tal harei 24/8. Angan ini kayua UBND TP.HCM brei harak chứng nhận, hu peih tabiak ngak 2 thun sa mbang. Thun ini, bruk pilih ruah hu pathau khan di mbang Parang iek pok mayaom pandap panda Việt thun 2022 hu peih tabiak meng harei 15/9 tal harei 18/9 di Sang pacacah thể dục thể thao Phú Thọ, Quận 11. Dom doanh nghiệp, doanh nhân mek hu angan meda hu pok mayaom di tuk pahadar harei Doanh nhân Việt Nam 13/10.

Hadei di dom harei trun pandiak, sa mbang pandiak bahrau gam rah tabiak di labaih 1/2 dom tỉnh, ban di taneh ia ni. Urang langyah gah khí tượng langik tasik Trung Quốc Trương Quyên (Zhang Juan) brei thau, dut song mbang pandiak khang dahlau, bhum pasak pandiak glong mbang ni, mboh rilo di gah Merong, song dom labik di tỉnh Chiết Giang song Phúc Kiến meda rah tabiak langik pandiak khang song pandiak tal tanut kỷ lục. Rilo labik di Tân Cương, Nội Mông, Chiết Giang, Phúc Khiến pandiak labaih 40°C, dalam nan ban Ninh Đức, tỉnh Phúc Kiến , meda tagok tal 43°C dalam harei 23/7.

Di ban New York, pasak di mbang tamuh jit ruak đậu mùa khỉ di Mỹ, hu biak rilo bhap bini dalam umo thun meng 20-40 dang jeng talei atah piah cang tal mbang klauk vaccine pacang caga ruak ini. Kuhria tal harei 15-7, New York hu mboh abih tih 461urang njauk ruak đậu mùa khỉ meng di tuk jit ruak ini tamuh di Mỹ meng bilan 5. Bruk ini nyu tagok tal 2 mbang dut saong tanut 223 urang ruak tal harei 11-7. Di ban hu 8 triệu bhap bini ini daok caong meda jhul samar bruk klauk jru pacang caga ruak saong tui kuhria lac klauk hu ka labaih 30.000 mbang.

Harei kabroi, dom taneh ia di Liên minh châu Âu (EU) njauk gauk ba tabiak pok tong phạt ka 7 pamong tame Nga, dalam nan pankuah bruk blei tame ameh di taneh ia ni, song pacang veik drap ar di gilang pariak prong abih di Nga Sberbank. Bruk tong phạt nan tui kuhria hu batabiak pandar meng harei ni (21/7)./.

Urang lang: Hani Pha & Thu Thảo – 21/07