Urang nong pala tui tanut chuan 

Rajaei bahrau tabiak sarak ka bruk ký quỹ saong daong brei mesraiy piah ký quỹ ka urang nao ngak bruk di Hàn Quốc tui Danak dak brei adat bruk ngak ka urang ngak negar langiu di Hàn Quốc. Tui nan, urang ngak lac menuac hu mesraiy jien di Gilang pariak sarak karja bo khin mesraiy jien piah nao ngak bruk di Hàn Quốc tui harak pambuak bruk ye hu mesraiy tal 100 triệu đồng piah ký quỹ di Gilang pariak sarak karja bo oh cang hu pandap padang piah mesraiy jien.

Hadei di jaik 4 thun ginum biai, Việt Nam saong Trung Quốc hu mbaoh tangin tame harak hu dom adat cambaih laih piah pablei sầu riêng Việt Nam tame darak pasar Trung Quốc. Meng harak hu mbaoh tangin bloh, dom lô pandap sầu riêng meyah hu mã số bhum pala, hu tame paok njauk tui adat ba tabiak saong ngak njauk tui dom bruk gah dut iek, ye hu pablei tapa di taong abih dom pabah mbang negar piah tame darak pasarTrung Quốc. Dalam dom taneh ia blei durian, Trung Quốc daok dalam dom darak pasa praong abih blei baoh durian that di Việt Nam min rilo meng lac pablei tui jalan tiểu ngạch.

Urak ini, tỉnh Đồng Tháp hu jaik 6.000 ha hu brei mã số bhum pala pa-ok, rik daong pambuak bruk pablei pandap. Dom janih pa-ok hu pala rilo nan lac: xoài cát Chu, Cát Hòa Lộc, pa-ok tượng kalik jao...Pa-ok hu brei mã bhum pala hu pablei tabiak darak pasar dom taneh ia yau: Hàn Quốc, Nhật Bản, Australia, Mỹ, EU…Bruk pamaong tal thun 2025 lac, Đồng Tháp peih ngak taong abih  taneh bhum pala phun mbang baoh, dalam nan  hu pa-ok pataom sa labik hu brei mã số bhum pala; pala tui jalan hacih sa-at.

Piah patui jalan jhul samar bruk klauk jru vacxin pacang caga COVID-19 ka bhap bini, Sở y tế TPHCM daok brei dui atah tukvak klauk tal abih bilan 7 ini, klauk gam harei puac adit. Langiu di labik klauk ka rahra urak ini daok hu di dom puk palei, Sở Y tế pachreih dom sang iek ruak công lập saong langiu công lập tut angan labik klauk piah klauk ka bhap bini. Sở Y tế ieu kakei dom labik oh caik rahtabiak bruk padeih klauk dalam tuk ban raya jeng daok hu ginup vacxin piah klauk.

Meng akok thun mbiah tal ini, jit tả pabui Châu Phi rah tabiak di 75 baoh sang raong pabui dalam tỉnh Bạc Liêu, ngak ka labaih 660 drei pabui njauk am cuh klak. Piah patrun patakik jit ruak njom mbak ngak khat lahik ka bhap bini, gah thú ý  pambuak saong karja samar peih ngak dom jalan pacang, padam jit. Tui nan, jak ba dom baoh sang oh pablei salih, pajeng ba pabui dalm bhum hu jit, oh parah klak pabui metai gah langiu, oh blei pabui pajaih  meng labik karei oh tapa dut iek.

Meng di tuk Nga khan lac brei padeih pajeng khí đốt meng Nga tal Đức dalam 10 harei piah ngak pasiam jalan nding duy nhất (Nord Stream 1), dom taneh ia châu Âu haduh hatai lac Nga meda dui atah tukvak ngak pasiam piah patakik  pabak khí đốt di châu Âu. Bruk ini meda ngak ka bruk pabak gilang khik caga ka bilan li-ar jeng sarau kadhau saong ngak patagok bruk khủng hoảng khí đốt, ngak ka rajaei njauk ba tabiak dom jalan ngak samar drah.

Thủ tướng Pháp Elisabeth Borne yam tapa hu mbang buh phiếu oh njuak hatai palih ruah akaok meti di QH taneh ia ini, kayua gah cực tả ba tabiak. Yau nan, mbang akok meti kuhria meng 30 thun dahlau tal ini negar Prang hu urang kumei ngak praong di rajaei. Dalam harak ndom puac katut panak akaok meti di drei, urang Thủ tướng birau di Prang hu ndem tal dom bruk brei ngak dahlau dalam sarak anak tal, yau bruk pablei salih atau pacang bruk bien doi khi hau. Abih di nyu, muk khin jak ba patua veik brei ka taong abih uranaih kumei piah ngak hu tui dom caong khin di drei.  

Mintri Y tế Israel brei thau, taneh ia ini bahrau hu  veik 11 urang njauk vi rút đậu mùa khỉ, ngak patagok dom urang njauk ruak lac 66 urang. Piah patakik veik dom urang ruak njom mbak tabiak, langiu dom vacxin hu pandar, Israel daok blei vắc xin rai ka 3 pacang veik vi rút. Tui kuhria, anak tal Israel meda raok 1 lô pandap hu 2.000 mbang vắc xin Bavarian Nordic, ginup piah klauk ka 1000 urang. Mintri Y tế taneh ia ini ieu kakei bhap bini samar drah nao tal bác sĩ mayah mboh rup pandiak, ndaih baoh ia atau hu taom gaok haong urang karei medil lac njom  vi-rút./.

Urang lang: Thu Thảo _ Ái Nghiêm -12/7