Rilo labik pablei xang menyek krek mbang oh hu xang blei 

Dang akok mbang nyaom Mban tacei jalan Trung ương dom Danak dak pakat negar vaktu 2021 -2025, nan lac: padang ngak palei pala birau, patruh iek patrun kathaot saong patagok kinh tế - xã hội bhum urang bangsa takik saong bhum ceik peih tabiak di biar harei 18/10, Phaok Thủ tướng Thường trực Chính phủ Phạm Bình Minh brei thau: 9 bilan tapa, bruk peih brei phun jien meng kadung jien karja dalam negar bahrau hu ala 50%. Kuhria ta-eng phun jien buh tame ngak 3 danak dak pakat negar daok biar, bahrau hu ala 1%. Ba tal bruk nan lac mai meng dom jalan ngak, adat hukum buh jien tame ngak dom danak dak birau daok lahik abih rilo tukvak. Mbiah tal ini, dom harak gal tui hukum hu ngak salah blaoh, yau nan min daok 5 sarak di dom mentri ngak oh samu, Phaok thu tuong caong khin dom mentri hu pambuak tal bruk peih ngak, patabiak dom sarak nan dalam bilan 10.

Urak ni, rilo cửa hàng, labik pablei salih xăng menyek di dom tỉnh Tiền Giang, Bến Tre daok khik bruk peih pablei dalam khat lahik kayua yaom jien hoa hồng biak bier, 250 đồng/sa lít; gaok mai, rilo doanh nghiệp pablei salih hu hoa hồng lac zero đồng.Tui dom doanh nghiệp yaom  hoa hồng 500 đồng/sa lít, meng samu yaom phun jien,ginup piah bayar jien bilan ka urang ngak song bayar jien điện, jien ia.Langiu di nan, dom  xăng menyek pabak tal dom đại lý, cửa hàng pablei rai  xăng menyek biak suai damuia, hu tuk nyu kurang nan ye brei kreik pabah mbang.

Tui Mentri Y tế, meng kaok thun mbiah tal ini, dalam negar hu abih tih 258.480 mbang urang njom ruak pandiak tabiak darah, dalam nan hu 102 urang metai. Dut saong tukvak ini thun 2021 urang metai tagok 81 mbang. Jit ruak pandiak tabiak darah rah tabiak sraw kadau di bhum gah Meraong negar, bhum kreh negar, Tây Nguyên hu manuac ruak saong metai rilo. Dalam tuk jit kateik angaok jit yau urak ini, meyah mboh jaik ruak yau: pandiak, patuh, pandik lagah dalam rup pabhap ye mikva brei nao tal dom labik y tế piah hu pasang iek ruak, meyah ruak padiak tabiak darah, bác sĩ meda hu jalan taong ruak sumu.  

Sở Ilamu song Thể thao TPHCM bahrau hu harak payua dom sở song quận huyện pagam tal mek  panuac tangi sua  caik angan ka  2 boh tatua meng   Quận 1 song  Bình Thạnh nao tapa krong Sài Gòn pambuak song labik dok bahrau  Thủ Thiêm. Tui nan, tatua Thủ Thiêm 1 hu peih brei nao mai di thun 2007, pambuak ban Thủ Đức song  quận Bình Thạnh, tui kuhria hu caik angan lac tatua Thủ Thiêm. Tatua Thủ Thiêm 2 bahrau hu ba tame pandar di bilan  4, pambuak ban Thủ Đức song Quận 1, tui kuhria caik angan lac tatua Ba Son.

Meng harei paguh di Palei dulich sinh thái Ông Đề, xã Mỹ Khánh, huyện Phong Điền, thành phố Cần Thơ hu peih Harei pataom ilamu kaya mbang menyum 1.000 janih pandap mbang bingi meng kan saong urak ini. Bruk nan hu peih ngak saong hatai caong khin rik tame khik ramik, patagok saong paglong pandap mbang Viet Nam jeng yau pandap mbang Nam Bộ, dalam nan caik hatai tal dom pandap mbang, ahar daok dak harei dak lahik, oh hu thei patoa veik. Abih di nyu, ini lac harei pataom oh duah jien laba, yaok labik parang pandap tut angan  meda hu daong  ginup pandap pandar ngan haong yaom jien 1 trieu dong hadei di tuk tamat harei pataom; hu mek tame abih jien pablei pandap mbang, ahar dalam tuk peih harei pataom. Mban peih bruk caong khin rik tame daong dom nghệ nhân hu pabak prein  dalam bruk khik ramik bruk ngak meng kan.

Mblang vận động Kanjuruhan di  Indonesia labik rah tabiak bruk juak gauk ngak ka labaih 130 urang metai meng bloh  hu yah klak song padang ngak veik tui tanut di  FiFa. Indonesia song FIFA dahlau di nan, njauk gauk brei padang sa kapul đặc nhiệm haong gauk hadei di bala di mblang  vận động, dalam tuk taneh ia ni dok caga peih ngak  World Cup U-20 dalam thun 2023.

Tổng Yam bdoc Y tế dunya (WHO) kakei lac juai taong yaom biar bruk jit ruak di dunya, yaom  lac urang metai dalam jit ruak praong COVID-19 trun khang. Ong  Tedros lac dunya daok dang anak bruk biak kan kandah: jit ruak COVID-19 oh ka abih, ruak đậu mùa khỉ daok njom pambak praong, jit ruak Ebola di Uganda saong jit tả di 27 taneh ia, dalam nan 11 taneh ia oh ka hu ruak tả meng dahlau diah.

Jit kum menuk ada tamuh tabiak di  Mỹ ngak brei yaok  triệu drei menuk ada metai, ngak ka dom bein athur di grauk labik dalam negar ni  njauk patagok bruk pacang caga jit.  Mbang tamuh jit ni  ngak ka yaom rilow menuk song boh menuk tagok anak dom mbang padeih  lễ prong song nyu ngak brei trak damak jang  kinh tế bo urang pandar di Mỹ dok dang anak. Ni jeng lac mbang jit kum menuk ada trak di abih  rah tabiak di Mỹ meng di thun 2015./.

Urang lang: Hanipha- Ái Nghiêm -19/10