Mesup ini di Hà Nội hu peih Parang iek Quốc phòng Dunya 2022, hu mbaok di 30 taneh ia. Peih tabiak tal harei 10/12, ini lac mbang camereip abih Parang iek Quốc phòng Dunya hu peih tabiak di taneh ia drei. Di tuk peih mbaok, gah không quân bhap bini Việt Nam par iek salam uan. Trung đoàn 927, Sư đoàn 371, Quân chủng phòng không không quân hu pilih ruah dom urang peih kapal haok naih gheih hu rilo ilamu piah pato pasram kadha par tui kapul, bruk njauk biai nan lac par iek meng kapal haok Su - 30MK2 cuh phao samu gauk, pambuak haong dom ilamu par ngak jeng thaot binguk mekre meta di abih.

Di Nghệ An, harei 7/12, jaik 200 urang akaok palei angan je mai meng 10 tinh bhum tapen negar Việt Nam saong 10 tỉnh bhum tapen negar Lào hu mbaok tame rivang iek Labik inem mek Kim Liên -  lac labik pambuak haong dom thun bilan daok ranaih di Bác Hồ. Bruk ini daok dalam dom bruk ngak uan salam 60 thun Harei padang  talei pambuak bruk ngoại giao (1962-2022), 45 thun mbaoh tangin tame Hiệp ước Hữu nghị saong pambuak gauk, 45 thun Hiệp ước Hoạch định jalan tapen negar di Việt Nam - Lào (1977-2022). Tapa nan, dom akaok palei angan je di dua taneh ia ngan haong hatai thau dhal phol hu cuh gilau, pok bingu piah pahadar Chủ tịch Hồ Chí Minh –  urang padang talei rohim anit ranam gauk di dua Đảng, dua bangsa Việt Nam - Lào.

Harei pataoom ragu ragam dunya TP.HCM - “Hò Dô” 2022 mbang ka 2 pambuak haong Harei pataom Khinh khí cầu TP mbang ka 2 hu peih tabiak tuk mesup ini saong rah tabiak tal harei 11/12 di jalan nao takai Nguyễn Huệ (Quận 1) haong Mblang bein tatua Thủ Thiêm 2 (TP Thủ Đức). Tui kuhria hu jaik 500.000 mbang tuai hu mbaok tapak, 10 triệu mbang tuai hu mbaok tapa online. Di harei pataom Khinh Khí cầu, bhap bini hu maong iek saoh, oh abih jien, hu mek rup thaot mekre, par iek mangaok langik. Harei pataom ragu ragam hu peih mbaok meng show nhạc brei ka uranaih, hu mbaok di dom nhạc sỹ hu pok angan piah pilih ruah Grammy mai meng Mỹ saong dom kapul daoh tamia uraniah di Việt Nam.

Sóc Trăng lac tinh hu rilo urang bangsa takik di abih dalam bhum taneran kraong Cửu Long, meblah labaih 36% rahra. Langiu di dom sarak daong cak rok patagok kinh tế, thun bloh tỉnh hu peih ngak siam dom sarak brei saoh oh mek jien thẻ bảo hiểm y tế ka sang kan kathaot, abih di nyu nan lac daong jien piah blei bảo hiểm y tế ka mikva bangsa takik dalam tỉnh tui kuhria lac labaih 251.354 urang, mek hu 58,76%.

Công an tỉnh Bình Dương daok ba tabiak dom jalan ngak, kham merat tal puac thun 2022 ngak hu salah bruk ngak căn cước công dân (CCCD) brei ka taong abih urang thường trú. Kuhria tal harei 7/12, taduan hu labaih 1.848.000 hồ sơ likau ngak harak CCCD saong Bộ Công an hu ngak blaoh 1.517.000 thẻ, dalam nan ngak brei ka urang thường trú hu 97,3%. Piah ngak hu bruk ba tabiak, dom urang jakar urang lin parabha jeng kapul, salih gauk trun tal dom xã, phường, ban sit ngak CCCD ka bhap bini. Harei puac adit ye rami ramik 1 kapul nao tal sang bhap bini piah ngak CCCD ka urang taha, urang ruak kik oh nao mai hu.

Akaok Mintri Ngoại giao, Quốc phòng Mỹ saong Australia bahrau hu mbaok tame mbang tham vấn ka 32 di Washington. Bruk di mangaok pulao Triều Tiên lac sa dalam dom kadha hu tabiak panuac brei thau haong gauk hadei di mbang tham vấn. Mỹ saong Australia brei thau veik bruk sanya mek hu bruk phi hạt nhân hóa abih di  pulao Triều Tiên saong langyah danak dak tên lửa đạn đạo, hạt nhân suan adat hukum di Triều Tiên. Dom gah sanya patui veik jalan pambuak bruk di dua gah, di rilo gah saong khan brei thau veik bruk hu makna praong di bruk dom taneh ia dunya peih ngak abih tih dom sarak di Hội đồng bảo an pambuak tal Triều Tiên.

Thun ini, Ấn Độ mboh tagok samar dom bruk oh siam di langik tasik yau ye sóng nhiệt saong jakala klaak, hu tal 2.183 urang metai, lac glaong di abih kuhria dalam 3 thun tapa. Dom urang ilamu ndom lac biến đổi khí hậu ngak ka Ấn Độ rah tapa bilan 3 pandiak abih dalam labaih 1 abap saong nhiệt độ glaong oh bhian mboh di bilan 4 haong bilan 5. Taneh ia jaik taphia daok gah pai di Ấn Độ lac Pakistan njauk ia dauk ia sua khang abih dalam thun ini, sa dalam 3 mbaok taneh di taneh ia dauk dalam ia, ngak brei labaih 1.500 menuac metai saong ngak kan kandah tal yaok triệu urang.

Liên minh châu Âu (EU) mek hu bruk sanya ka hukum ieu  dom hãng kapar haoh njauk biyar jien tuk tathuak nerak khí carbon dioxide ngak pandiak tagok baoh taneh, ngak catang jang piah ka gah ini cakak klaak nhiên liệu hóa thạch. Urak ini dom hãng kapar haoh peih dom mbang par di châu Âu hu pabak harak adat tathuak nerak CO2 oh lahik jien. Tui hukum bahrau, meda klaak dom adat oh mek jien di thun 2026. Bruk ini hu makna lac dom hãng kapar haoh njauk biyar jien piah hu pabak harak  adat tathuak nerak CO2./.