Rajaei bahrau ba tabiak sarak adat ka asal kadha brei mboh cambaih laih urang ngak bruk hu jien mek tame biar daok dalam Danak dak pakat negar trun kathaot karo kajap tukvak thun 2021 – 2025. Tui nan, urang ngak bruk hu jien mek tame biar lac urang ngak bruk daok dalam baoh sang, langiu di urang daok dalam baoh sang kathaot, jaik kathaot mbang tui sarak, hu jien mek tame biar. Ngan haong bhum palei, urang hu jien mek tame biar hu kuhria tui akaok menuac sa bilan meng 2,250 trieu dong ba trun. Ngan haong labik dalam ban, urang hu jien mek tame biar kuhria tui akaok menuac sa bilan meng 3 trieu dong ba trun.

Mikva bangsa Cam tui agama Bani daok di palei Katuh, xa An Hải, huyen Ninh Phước, tinh Ninh Thuan, daok dalam bruk bui sambai raok uan Ramawan thun ini. Palei Katuh urak ini hu 539 baoh sang, hu 2.540 urang. Dom thun tapa, ngan haonng bruk sangka di Karja, ket cau ha tang palei pala hu buh jien tame ngak salah blaoh brei kein lagaih piah rahra patagok bruk ngak mbang. Dalam bhum palei hu labaih 100ha njam salamat; padang hu 1 taneh pala rabung tei hijao labaih 65ha taneh tui jalan pambuak, ba mai siam lagaih glaong. Gam haong nan patagok khang gah raong glang athur hu labaih 5.750 drei. Meng nan, raidiuk mikva dak harei dak hu tani tanat.

So Ilamo, Padhih saong Yulit tinh An Giang pambuak haong ban sit Tân Châu peih tamat tal pato drap ar ilamo oh mboh di meta lac ragu ragam Rappana di mikva bangsa Cam daok di xa Châu Phong. Tal bac hu peih dalam 1 bilan, dom gru paoh Rappana pato ka urang bac megru sa ilamo lagaih piah pandar; dom kadha paoh Rappana bhap bini meng kal. Bruk pato paoh Rappana piah khik ramik, paglaong yaom kaom ilamo bhap bini meng kal. Tapa nan, paglaong ilamo ka halau agha saong ilamo bangsa, pambuak pagam bol bhap rahra, patagok yulit, yaih khan ilamo bhum palei.

Rilo urang ngak nong daok di tinh Soc Trang hu pilih phun tamekai pala angaok taneh hamu padai Dong Xuan suai (mbang pala ka 3) piah salih ka phun padai. Langik lagaih, urang ngak nong meda paik hu meng labaih 3 tan tal labaih 4 tan tamekai sa công. Pala tamekai mikva oh suhsah ka ia tuh pruh dalam bilan thu saong brei bruk ngak haong tagok jien mek tame di dom tuk lahei. Tukvak pablei hu yaom, urang ngak nong meda duah meng 10 trieu dong tal 20 trieu dong sa công jien labameng bruk pala tamekai mala takai hamu.

Thanh trà daok tame bilan paik baoh, thun ini thanh trà pablei hu yaom. Haong yaom pablei meng 160.000 - 200.000 dong/kg, dom baoh sang urang ngak nong di xa Đông Thành, ban sit Bình Minh, tinh Vinh Long biak chreih chrai. Ong Trương Văn Hoàng - HTX Thanh trà yamen Đông Thành klah rabha, ini lac 1 thun paik baoh hu rilo di HTX, kuhria mboh laba tagok meng 40 – 45% dut haong tukvak ini thun dahlau. Yaom lac yaom kaom tagok glaong min thanh trà yamen jeng pablei hu, rilo urang ikak kaiy meng Ban raya Ho Chi Minh mai blei, paik baoh hu dom jeng pablei abih. Urak ini HTX Thanh trà yamen Đông Thành oh hu ginup thanh trà piah pabak ka urang ikak kaiy.

Dalam adit ini rilo labik di Trung Quoc tagok samar tal 30 ndo C, sa bruk rah tabiak oh bhian di bilan ini. Rayo papar binguk Trung uong Trung Quoc brei thau, bruk pandiak tagok di negar ini hu kuhria patui veik rah tabiak dalam 5-6 harei anak tal, ngan haong langik pandiak tagok tal tabung glaong dalam harei Suk saong harei Sanecar. Njauk caik hatai sangka, bruk oh samu gauk ka pandiak la-an di harei saong malam meda tagok labaih 15 ndo C. Mbang pandiak tagok ini jeng jhul samar bruk salih tapa bal Pataih.

 Canh sat Campuchia bahrau daong hu labaih 200 urang negar langiu, dalam nan hu 109 urang Thai Lan, tabiak sa labik pachot pagat di ban Poipet. Bruk taong tayah ini rah tabiak hadei tuk urang jakar Campuchia saong Thai Lan bahrau njauk hatai pambuak gauk pacang cakak dom kapul nyaom pachot pagat di labik tapen dua negar. Dahlau nan, taong abih 621 urang Trung Quoc hu pablei tame Myanmar piah ngak bruk ka dom kapul nyaom pachot pagat hu daong ba tabiak saong gilac nao sang pak negar Trung Quoc.

Sa ruak oh ka thau cambaih laih ngak ka labaih 50 urang metai di labik Pei Barak CHDC Congo. Jit ruak akaok meti meng harei 21/1 saong taduan hu 419 urang njauk ruak, dalam nan 53 urang metai. Mbang tamuh ruak camreip di ban sit Boloko hadei tuk 3 uranaih mbang ralo ciim dhun blaoh metai dalam 48 mon haong dom bruk brei mboh ruak pandiak tabiak darah. Thun blaoh, sa ruak kan si duah mboh karei hu brei mboh dahlau yau ruak kum ngak metai ka yaok pluh urang di sa labik karei di CHDC Congo saong hu brei thau meda lac ruak padiak rup la-an langaoh.