Dah page ini (20/02), Kapul pasang iek di Ủy ban Thường vụ Quốc hội ka bruk “Peih ngak Sarak 88 saong sarak 51 di Quốc hội ka bruk salih bahrau danak dak, tapuk siphau pato magru phổ thông” peih nyaom biai mbang ka 2. Di mbang nyaom, Phó akaok Thường trực Quốc hội Trần Thanh Mẫn khan lac, bruk pato magru tuk halei jeng hu rahra caik hatai sangka. Dalam dom mbang nyaom di Quốc hội, pataom veik panuac di cử tri saong rahra di Uỷ ban Trung ương Mặt trận negar Việt Nam jeng biak sangka tal bruk peih ngak danak dak pato magru bahrau saong tapuk siphau. Kayua yau nan ye, bruk peih ngak asal kadha pasang iek ini njauk hu peih ngak biak catang, hu kein lagaih. Phó akaok Thường trực Quốc hội ieu kakei pasang iek cambaih laih dom asal pilih ruah dom labik pato magru di labik bo Kapul mai ngak bruk, tani tanat dom janih, asal kadha ngak bruk. Danak dak pasang iek cambaih laih saong dom bruk ngak cambaih laih njauk rami ramik hu ilamo, siam lagaih,  patak pataom hu tukvak, hu kein lagaih.

Cục Thuế TP Hồ Chí Minh meda brei trun yaom jien pah taneh, pah mbaok ia ka dom urang, dom labik njauk kan kandah meng jit COVID-19. Dalam nan, yaom trun lac 30% jien pah taneh, pah mbaok ia (kuhria tui yaom jien njauk kak tame) di thun 2022. Daok yaom jien pah daok tavak di dom thun dahlau 2022 oh hu trun. Urang pah taneh, pah mbaok ia brei ngak harak likau trun yaom jien pah taneh, pah mbaok ia payua tal chi cục thuế labik hu taneh atau Mban khik ramik khu kinh tế, khu công nghệ glaong…

HĐND tỉnh Hậu Giang brei tapa sarak ka bruk daong an sinh xã hội saong yaom jien blei bảo hiểm y tế tal thun 2025 ka dom urang. Dalam nan, tal bilan 12.2025, dom baoh sang kan kathaot saong jaik kathaot hu manuac urang lac hu buh prein ka cách mạng hu daong veik 500.000 đồng sa baoh sang sa bilan. Uranaih lac dom urang mbuan njauk rapeik rapai, njauk taong paoh, gaok bala rambuac njauk daok di labik y te piah taong ruak hu daong chip 3 triệu đồng sa urang. Langiu di nan, tinh meda daong glaong abih lac 10 triệu đồng sa urang ka uranaih lac sang kan kathaot, sang jaik kathaot, sang bangsa takik, daok mbang tui paok daong xa hoi yaok bilan.

Taneh pala phun mbang baoh di tỉnh Bà Rịa-Vũng Tàu daok tagok khang. Meyah thun 2019 lac 10.300ha ye tal jhung thun 2022, abih tih taneh pala lac labaih 13.700ha, tagok jang 3.400ha. Tui Sở Ngak nong saong patagok palei pala tỉnh, makna lac kayua yaom dom janih phun pala yau cao su, amriak kalu, pa-ok blait, càphê... laik yaom khang nan ye rilo urang nong salih tapa pala dom janih phun mbang baoh ba jien tame rilo yau ye kruac bhung, patei, pa-ok, durian, mbơ… Urak ini gah ngak nong daok kakei bhap bini jhui ba gauk peih praong taneh pala, piah paglaong yaom, saong daong ka dom puk palei, doanh nghiệp, hợp tác xã haong urang ngak nong ngak jeng dom bhum pala sa janih, padang mã số bhum pala ka phun mbang baoh hu pala rilo, piah pabak tanut pablei tapa negar langiu.

Yaom ikan pra di An Giang tagok khang dalam dom harei jaik di ini, meng 28.000 đồng/kg tagok 31.000 - 32.000 đồng/kg. Min, dom sang mac ngak kaya ikan oh blei hu ikan piah ngak, kayua urang raong daok khik piah ikan,  cang yaom tagok jang. Tui kuhria, tal puac bilan 2, yaom ikan meda di tanut 33.000 đồng/kg. Tapa bilan 4, yaom meda tagok 35.000-36.000 đồng/kg. Tukvak tapa, kayua raong khat, urang raong klaak danao biak rilo, tuk Trung Quốc blei ikan gilac veik, ikan oh ginup piah pablei.

Mintri Quốc phòng Japon tabiak harak khan lac, Mỹ hong Japon hu peih bruk pasram mesruh kapal haoh haong gauk di harei 19/2. Bruk pasram mesruh ini rah tabiak sa harei hadei di tuk Triều Tiên cuh iek lửa đạn đạo xuyên lục địa saong laik tame bhum tasik gah pai di Japon. Min sabuh mesup ini, Triều Tiên brei cuh iek 2 tên lửa đạn đạo jalan nao katut panak di langiu tasik gah Timur. Mỹ, Japon saong Hàn Quốc maong ini lac bruk ngak biak jhak tal bruk sron mbon di bhum taneh ini.

 Tapa mbang pasang iek kayua jabat duah thau hatai sahneng manuac sia di Hàn Quốc Realmeter brei thau di harei 20/2, brei mboh bruk pachreih tui Tổng thống negar ini Yoon Suk-yeol hu tagok tal labaih 40% mbang camriep hadei di 6 adit meng sarak pataom tame dom bruk kinh tế saong mbang ngui di rahra. Ini lac tanut tagok tui yaok adit praong abih di dalam dom mbang pasang iek kayua Realmeter peih ngak meng di tuk ong Yoon Suk-yeol tagok par akaok taneh ia meng di bilan 5/2022.

 Kuhria tal harei 19/2 (tui mon pak nan) hu takik di abih 36 menuac metai kayua ia dauk saong glut jaleih taneh di takai tasik gah Đông Nam bang Sao Pao-lô di Braxin. Karja bang Sao Pao-lô tabiak panuac brei thau, hajan praong dui atah dalam rilo harei tapa ngak brei dauk praong saong jaleih taneh di rilo ban. Harei pataom hóa trang Sao Pao-lô, sa dalam dom harei pataom praong abih di Braxin jeng brei padeih. Urak ini, Rajaei liên bang hu ba menuac di jabat phòng thủ dân sự negar nao tal dom bhum njauk bala piah daong./.