Kuhria meng akok thun mbiah tal ini, dalam negar hu jaik 282.000 mbang urang njom ruak pandiak tabiak darah, 110 urang metai. Njauk caik hatai, di dom tỉnh gah Meraong negar, langiu Ban raya HCM, rilo tỉnh, ban karei dalam bhum hu mboh urang ruak pandiak tabiak darah ralo dang tanut glong; dom tỉnh, ban di bhum kreh negar, Tây Nguyên jeng mboh hu urang ruak saong metai ralo. Dom urang ilamu kuhria mboh dahlau dalam tukvak anak tal urang njom ruak saong metai kayua ruak pandiak tabiak darak rah tabiak sraw kadau saong ralo kayua tal tukvak tabung glong bilan jit ruak yaok thun rah tabiak meng bilan 11 tal bikan 12.

Urang kumei umo 38 thun lac urang ka 2 njauk ruak đậu mùa khỉ di Việt Nam hu tabiak sang iek ruak hadei di 2 adit taong ruak saong brei daok karei di Sang iek ruak Bệnh nhiệt đới TP.HCM. Dom bác sĩ kakei lac piah khik salamat ka drei saong ka rahra, bhap bini njauk pacang caga ruak đậu mùa khỉ tui panuac kakei di gah y tế. Tuk mboh dalam rup medil lac njauk ruak atau taom gaok urang medil njauk ruak đậu mùa khỉ, khan brei Pasak pasang iek ruak kik, Sang iek ruak Bệnh nhiệt đới atau labik y tế jaik di abih thau piah hu pato tacei.

Meng harei paguh di tỉnh Sóc Trăng peih ngak “Nyaom darak pasar pachreih bruk pablei salih pandap OCOP saong pandap đặc sản bhum Sòc Trăng thun 2022”. Tui kuhria mboh hu labaih 400 labik parang pandap mai meng  labaih 300 D.N di dom tỉnh, ban dalam negar. Langiu di nan, nyaom darak pasar  daok hu 12 cụm labik parang pandap, yaih khan ilamu meng kan di bhum palei dalam bhum taneran kraong Cuu Long.

Meng melam 31/10 tal harei ini ( 1/11), rilo labik pablei xăng di ban raya Hồ Chí Minh pacang talei, padeih pablei, dom labik daok pablei ye peih meng 1 – 2 trụ bơm saong brei tuh rilo abih lac 50.000 đồng yaok radaih. Njauk caik hatai lac, urak ini bruk pablei takik atau padeih pablei daok hu mboh di rilo labik pablei xăng di Petrolimex dalam ban raya.

Dalam 10 bilan tapa, dalam tỉnh Tiền Giang hu 98 labik glut jaleih, kuhria abih tih  atah jaik 4.200 m, kuhria rah tapa jien buh tame pasiam jaik 69 tỷ đồng. Trak abih lac labik dom huyen, ban sit pacang ia ribuk gah Pei angaok kraong Tiền. Di labik ini, bruk glut jaleih rah tabiak sraw kadau, oh ka padeih, ngak kan kandah tal bruk ngak mbang saong raidiuk bhap bini. Anak bruk nan, Tiền Giang brei ba tabiak dom jalan peih ngak danak saong langiu danak dak pacang caga glut jaleih, khik caga drap ar, diuk metai di bhap bini saong dom danak dak padang ngak palei pala. Tui nan, pok panuac tagok T.Ư likau daong brei ka tỉnh 700 tỷ đồng peih ngak 4 danak dak  langayah drah samar bruk glut jaleih takai kraong, takai tasik dalam tỉnh.

Mintri Ngoại giao Triều Tiên ieu Mỹ saong Hàn Quốc padeih dom bruk pasram mesuh praong haong gauk di dalam bhum. Mintri Ngoại giao Triều Tiên taong yaom lac, bruk di kaoh pulao Triều Tiên saong dom bhum jaik taphia daok yam tame tukvak cagar gauk khang kayua dom bruk quân sự oh padeih di Mỹ saong Hàn Quốc. Dahlau di nan Mỹ saong Hàn Quốc hu peih bruk pasram mesuh không quân hu angan ieu lac Vigilant Storm dalam tuk daok hu dom huac kanda lac Triều Tiên meda cuh iek vũ khí hạt nhân mbang camriep kuhria meng di thun 2017.

Jabat  Khí tượng Anh ba tabiak bruk kuhria mboh dahlau nhiệt độ di châu Âu meda la-ar jang  dalam 3 bilan anak tal. Di Anh saong bhum Bắc Âu nhiệt độ 3 bilan anak tal  meng âm 3 tal âm 4 độ C, biar jang  nhiệt độ kuhria rah tapa dalam 5 thun jaik ini. Langik jeng thun lagu jang, ngak takik hu hajan praong meng bilan 11 thun 2022 tal bilan 1 thun 2023. Kayua yau nan ye, dom urang ilamu kuhria mboh lac tuk camereip ini  bruk blei khí đốt ghang am dalam bilan la-ar ini tagok, kayua urang oh khin padam ging ghang dalam tuk langik la-ar./.

Meng harei ini Ấn Độ ba jien kỹ thuật số hu angan ieu lac e-rupee tabiak darak pasa. Jien kỹ thuật số meda hu pandar piah biyar jien dalam dom bruk pablei salih di darak pasa chứng khoán thứ cấp di rajaei. Gilang pariak negar Ấn Độ caong lac bruk pandar jien điện tử meda ngak ka darak pasa dom gilang paraik hu siam lagaih jang, saong daong ka gilang paraik trun yaom jien pablei salih./.

Urang lang: Thu Thảo & Bhumi – 01/11