Tong LĐLĐ Viet Nam kuhria buh jien tabiak daong ka labaih 100 ribau urang ngak njauk cakak bruk trun, lahik bruk haong yaom jien abih tih labaih 300 tỷ đồng. Dalam nan, yaok urang njauk cakak trun tukvak ngak bruk hu taduan 1 trieu dong, yaok urang ngak brei padeih pambuak bruk min oh ginup piah mbang tui jien daong lahik bruk ngak hu taduan 2 trieu dong saong urang ngak padeih pambuak bruk min oh ka duah hu bruk ngak birau hu taduan  brei 3 trieu dong. Dalam 11 bilan tapa hu labaih 600 ribau urang ngak gaok kan kandah tapak kayua takik bruk, dalam nan hu jaik 9.500 urang ngak lac kumei  dalam tuk metian atau raong anek sit ala 12 bilan.

Sang iek ruak Quân - Dân y tỉnh Sóc Trăng pambuak bruk haong pasak iek ruak huyện Long Phú bahrau peih bruk iek ruak, brei jru ka labaih 350 urang sang sarak karja, urang buh prein ka taneh ia saong sang kan kathaot. Ini lac sa dalam dom bruk ngak di danak dak “Tết quân – dân” tapa nan brei mboh bruk sangka di pakat ủy, karja, kapul nyaom dom pakat di puk palei, bruk ba tangin tame daong di dom kapul nyaom, menuac urang ngak pahla daok dalam saong langiu tỉnh brei ka bruk an sinh xã hội tuk Tết mai.

 Ban raya HCM urak ini hu yaok rituh birau urang ngak di dom sang mac, KCN, min dom sang daok tok hu sumu labaih 14%. Tui Sở Padang ngak Ban raya HCM, thun 2023, ban raya meda jhul pasamar bruk brei buh jien tame padang ngak sang ka urang ngak kong daok, pabak sumu labaih 12.000 labik daok. Gam haong nan pok panuac tagok likau mese phun jien tukvak suai meng 10 thun tagok ngan haong danak dak ngak sang daok ka urang ngak kong, piah patagok samar jang sang daok ka urang  ngak, daong ka urang ngak pambuak haong ban raya hu suai lavik.

Jalan tagok cao tốc TP. HCM- Trung Lương (labik dalam huyện Châu Thành, tỉnh Tiền Giang) daok khut, mbaih mbaoh trak, bhian dauk ia, oh siam ka radaih nao mai. Bruk njauk biai nan lac di dom labik ini, urang jakar hu caik biển báo oh brei padeih, pataok radaih min radaih jeng daok pataok, padeih gam gam saong rah tabiak dalam rilo thun tapa. Kayua yau nan ye, bhap bini daok jaik labik ini hu panuac caong gah chức năng brei hu jalan ngak piah pasiam veik bruk ini.

Dalam 2 harei tapa, dom gah chức năng di huyen Tra On, tinh Vinh Long hu nao tal puk Long Thanh, xa Lục Sỹ Thành peih bruk daong panduan ba sang danaok bhap bini  tabiak truh labik glut jaleih, khik brei tani tanat riadiuk. Dahlau di nan, biar harei 27/12 di palei Long Thanh rah tabiak glut jaleih taneh ar kraong pambak tal 4 baoh sang bhap bini jaik nan. Labik glut jaleih  atah labaih 32m saong tame dalam  labaih 6 m taneh. Ong Huỳnh Văn Thắng, Akok UBND xã Lục Sỹ Thành brei thau, urak ini daok dom baoh sang bhap bini dalam bhum mbuan glut jaleih njauk brei tui iek piah hu jalan langyah sumu.

Hadei di 2 thun oh hu peih ngak kayua jit praong COVID-19, bruk countdown (yaok cagar veik) saong cuh phao bingu angaok Vịnh Marina di negar Singapore hu peih ngak veik haong bruk cuh phao bingu gheih mekre dui atah dalam 7 minit di melam Giao thừa piah salam uan thun bahrau 2023. Dom urang jakar di Singapore kuhria mboh dahlau lac, meda hu 500.000 menuac hu mbaok di Vịnh Marina piah uan raok Giao thừa. Piah khik siam mekre salamat ka bruk pataom rilo menuac ini, meda hu labaih 700 sỹ quan mai tal labik ini piah khik iek di dom labik karei di gauk dalam bhum jaik taphia.

 Njauk di tuk Giáng sinh – thun birau, rilo bang di taneh ia Mỹ daok rah tapa sa mbang langik la-ar, ribuk tuyet. Ribuk tuyet khang abih ngak ka labaih 5.000 mbang kapal haok brei kadun tuk par atau padeih par, ngak ka yaok ribau  tuai damuai daok tavak veik. Mbang ribuk  praong oh ka bhian mboh  dalam yaok pluh thun jeng ngak ka rilo dich vu jao pandap  online gaok klaik klaoh, kayua rilo jalan gar tavak. Ini meda lac sa bruk haduh hatai njauk tame tuk dom bruk ngak dulich saong blei pandar di Mỹ daok kham ngak brei pasiam veik dalam bilan blei pandar puac thun.

Patao caoh mbanh Brazil lac ong Pele, palăng lahik tuk mesup ini 30/12 tui mon Việt Nam di umo 82 thun.  Ong Pele hu taong ruak dalam sang iek ruak meng harei 29/11 kayua ruak ung thư tung gam saong ruak baoh hatai haong ruak thận dak harei dak trak. Patao caoh mbanh Pele hu 3 mbang dang akaok World Cup haong kapul Brazil meng thun 1958 tal thun 1970, ong lac 1 urang caoh mbanh, dit blong duy nhất dalam sajarah caoh mbanh mek hu bruk ini. Bruk njauk biai di ong lac ong dit mbang hu 1.279 baoh hadei di 1.363 mbang caoh mbanh, dalam nan hu kuhria gam dom mbang dit giao hữu, hu Kỷ lục Guinness dunya pok angan./.